Ɣodh 2 - JAM DE NHIALIC 2011

¹ “Wɛ̈ɛ̈tëkɔckuɔ ku nyïïrëkɔckuɔ wok ee kɔc ke Nhialic, wok cï kokëpiɔ̈u yök tëde Yen.”

Nɔ̈m de Gomer ku Këtuc cï Yök

² “Jänykï mɔɔrdun mïthkï, na cakaa nɔn cï yen a puɔ̈l ku tɔ rɔt ee tiiŋ ë mony däŋ. Jamkï në yen, takï päl kɔ̈ɔ̈r ë röör ku cäth thïn. Ku ë cïï rɔt be gäm röör.

³ Na le ye cuök päl, abä yɔ̈ɔ̈t kɔ̈u bei në lupɔɔ, ka abï cath në yekɔ̈u cït man ɣɔn dhiëëthë yen. Abä tɔ cït jɔ̈ɔ̈r cïn yic pïïu, ku ta nɛ̈k ë rou.

^4-5 Mïthke acä keek bï nhiaar, në biäk ye kek adhiëthlëër. Mɔɔrdun ee akɔɔrröör, ka wek ee mïth ka ayäär. Aye mɔɔrdun lueel an, ‘Yɛn lɔ tëde röörkiën ke cuëër, ayek ɛn gäm këcam, ku gëmkï ya këdek, ku gëmkï ya lupɔɔ ku linɔn, ku gëmkï ya miök ku mɔ̈n dɛk!’

⁶ “Ku ënɔɔnë, kueerde abä gël në rɔk, ku yiëk kal bï ye gël nɔm.

⁷ Abï röörke aa cop cök, ku cïï ke gïth. Abï keek aa kɔɔr, ku cïï keek yök. Ku ëtɛ̈ɛ̈n, abï jɔ lueel an, “Yɛn bï yanɔm puɔ̈k monydï cït man wään tueŋ, yɛn aa ŋuän wään në ënɔɔnë.

⁸ Akuc ë kɔc ke Yithriɛl nɔn ee Yɛn ë gëm keek rap, ku mɔ̈u, ku miök. Ku akuckï aya nɔn ee Yɛn ë ŋuak adhɛ̈pke nyïïn, ku atekkɛn ye kek Baal lam.

⁹ Ku ënɔɔnë, Yɛn bï rɛɛpkï kuany nïïm, ku kuany mɔ̈u nɔm, ku kuany lupɔɔ nïïm, ayï linɔn, ɣɔn cä gäm keek bï kek aa kum.

¹⁰ Abä keek yɔ̈ɔ̈r gup, ka abïk ciët mony cï tiiŋdɛn ee röör kɔɔr yɔ̈ɔ̈t kɔ̈u bei në röörke nïïm, ku acïn raan bï keek luäk bei në yacin.

¹¹ Ku akööl ke dhuëŋken ëbɛ̈n, abä ke tɔ kääc kedhie. Dhuëŋ ke ruöön, ku dhuëëŋ de wil ë pɛɛi, ayï dhuëëŋ de Thabath, ku jɔ aa yen dhuëŋ cïk mäc röt ëbɛ̈n.

¹² Ku tiimkɛn ke enap abä keek riɔ̈ɔ̈k, ayï tiimkɛn ke ŋaap, tiim yek lueel an ë röörken kek ë riɔp keek në keek. Abä keek tɔ ye roor, ku abïï läi roor ke riɔ̈ɔ̈k.

¹³ Abä keek luöi këtuc në biäk de aköölkɛn ɣɔn cï kek a puɔ̈l, ku yek Baal nyuöp wal ŋïr. Aake ye röt jäm në joth, ku kur tuc ë ɣööcden, ku riŋkï në röör cök, ku mɛ̈ɛ̈rkï nïïm në Yɛn. Kë cïï Bɛ̈nydït lueel ka.

Nhiëër Nhiɛɛr ë Bɛ̈nydït Kɔcke

¹⁴ Ku ënɔɔnë, Yɛn lɔ kɔc ke Yithriɛl bɛ̈ɛ̈i piɔ̈ɔ̈th. Abä keek lɔ luk në jɔ̈ɔ̈ric. Ku abä keek lɔ jääm apiɛth ëtɛ̈ɛ̈n.

¹⁵ Ku Yɛn bï wak de Akor puk aye kueer de aŋäth. Yithriɛl abä puɔ̈k nɔm duumkɛn ke tiim. Ka Yithriɛl abï piɔ̈u bɛ miɛt ke Yɛn cït man ɣɔn yen meth, në akööl ɣɔn bɛ̈ɛ̈i Yɛn en bei paan ë Rip.

¹⁶ Ka Yithriɛl abï Ya bɛ aa cɔɔl cït man ë monyde, ku pɛ̈l cɔ̈t yen a cɔɔl an Baal.

¹⁷ Ku rin ke Baal abä keek nyaai në kethook, ka acïkï bï bɛ aa lɔ̈ŋ në rinke.

¹⁸ Ku ëtɛ̈ɛ̈n, Yɛn bï mät looi wokë läi roor, ku diɛt, ku ka ee mol piny, në biäk cïï kek kɔckï bï bɛ luöi kërac. Ku këriëëc de tɔŋ ëbɛ̈n, abä ke nyaai pinyden: abätäu, ayï dhaŋ abïk liu, ke kɔckï ë ke bï tɔ̈c ë läŋ kedhie.

¹⁹ “Ku yïn bä lɔ̈c rɔt aɣet athɛɛr, Yithriɛl. Yïn bä lɔc në piathëpiɔ̈u ku yic, ku nyuöth yïn nhiëër agɔk ku kokëpiɔ̈u, ku ta yïn ee këdï aɣet athɛɛr.

²⁰ Yïn bä lɔc në piɔ̈n adöt, ka yïn bï Bɛ̈nydït ŋic ke ee këdu.

^21-22 Ku lueel ë Bɛ̈nydït, an, “Ku në ee köölë, Yɛn bï tënhial piŋ thok, ku tënhial abï piny nɔm piŋ thok. “Ku piny nɔm abï rap piŋ thok, ku piŋ mɔ̈u thok, ku miök, ku abïk piny de Jedhreel jɔ piŋ thok kedhie.

²³ “Ku Yɛn bï kɔckï tɔ ye kɔc ke nɔmdï, ku nyuööc keek pinyden. Ku nhiaar raan ë cï cɔɔl ɣɔn an, “Yïn kɛ̈n nhiaar. Ku abä lɛ̈k kɔc ë cie cɔɔl ɣɔn an kɔckï an, ‘Wek ee kɔckï.’ Ku abïk puk nɔm an, “Ee Yïn aye Nhialic.