Ɣodh 14 - JAM DE NHIALIC 2011

Ɣodhiya Acɔl Yithriɛl

¹ Puɔ̈kkï röt Bɛ̈nydït Nhialicdun, wek kɔc ke Yithriɛl. Awɛ̈ɛ̈ckun acïk week tɔ tuëk ku wiɛ̈ɛ̈kkï.

² Puɔ̈kkï wenïïm Bɛ̈nydït, lak läŋkï, lɛ̈kkï ee kënë ke ee yen ee miɔ̈cduön gämkï Yen an, “Pälë wook awɛ̈ɛ̈ckuɔ kedhie, ku gam lɔ̈ŋda në dhuëëŋ de yïnpiɔ̈u, ku Yïn buk jɔ aa piɔɔny cït man cï wok gutguut lueel.

³ Athiriya acïï wook duëër kɔn luök taitai. Ku wok cï bï bɛ kɛɛc në jöŋgöör ke tɔŋ kɔ̈ɔ̈th. Ku acuku bï bɛ nyɔk ë lëk wok en yiëthkuɔn ë loiku keek në wocin, an wek ee Nhialicda. Në baŋ ye abaar kokëpiɔ̈u yök tëde Yïn.

Bɛ̈nydït Athön Yithriɛl Pïïr ë Piac Bɛ̈n

⁴ Aye Bɛ̈nydït lueel an, “Yɛn bï kɔckï bɛ puɔ̈k nïïm rɔ, ku nhiaar keek në piɔ̈ndï ëbɛ̈n, Yɛn cï bï bɛ gɔ̈th wok keek.

⁵ Yɛn bï ciët thäc tëde kɔc ke Yithriɛl. Abïk gaak moc cït man agurbiök, Abïï keek riɛɛt piny ka meiken abïk ɣet piny ya cït man ë mei ke tim de thidar de Lebanɔn.

⁶ Abïk bɛ piɛɛr apiɛth, ka dhuëëŋden abï ciët tim de olip. Ku awäuden abï ciët awäu de tim de thidar de Lebanɔn.

⁷ Ku kɔc abïk bɛ rëër në atïmde yic. Abïk bɛ kaar cï rap ku abïk bɛ luɔk cï enap. Abï keek bɛ aa leec cït man de mɔ̈n de Lebanɔn.

⁸ “Yïn Yithriɛl, eeŋö bä bɛ looi në yiëth? Ee Yɛn ee lɔ̈ŋdu gam, ku dɔ̈t yïn apiɛth. Ka Yɛn ë ciët tim de ameth tɔ̈c ëbɛ̈n, mïth yïnke luɔk abïkï tëde Yɛn.

Thök

⁹ Go Ɣodhiya lɛ̈k keek alëyɔ̈ɔ̈ an, “Na de raan pel nɔm? Ke yök ee kakë yiic kedhie. Kuɛɛr ke Bɛ̈nydït ayek yith, ku aye kɔc piɛthpiɔ̈ɔ̈th ke kuany yiic, ku raan reec Bɛ̈nydït, ee tuëk thïn ku wïïk, në biäk ye kek keek dhɔ̈l yiic.