Ɣodh 13 - JAM DE NHIALIC 2011

Guiëër Ciëën de Löŋ ë Yithriɛl

¹ Të jiɛɛm ë dhiën ë Eparaim ɣɔn, dhiën kɔ̈k aake ye lath. Eparaim acï dhuëëŋ guöp në Yithriɛl. Ku ënɔɔnë, acïk wäc në läm ye kek Baal lam, ka abïk thou në biäk ee kënë.

² Ku ënɔɔnë, ayek awäc gïtic në luɔi ë cieŋ. Acïk röt luöi yiëth ke nɔmden në atekken. Yiëth cï atëët ke ŋiëc cuëëc ka acïk dikëdik, acïkï ee Nhialic. Ku yek lueel an näkkï yiëth miɔ̈c! Ku duëër kɔc yiëthkï ciim thook adï, yiëth cït gup dau!

³ Në biäk de ee kënë, abïk riäär ëthiäu cït man ë ruu amiäk. Ku dapkï tɛŋ cït thäny amiäk. Ku cïtkï ayiɛl të wiiuwë rap në yiɛɛuwic. Ku cïtkï tol kuël rɔt bei në awëërnyin.

⁴ Aye Bɛ̈nydït lueel an, “Yɛn aye Bɛ̈nydït Nhialicdun, raan ɣɔn bïï week bei paan ë Rip. Duökï bï dɛk Nhialic däŋ kaarkï pei, të cïn Ɛn. Ku cïn kony de wëi däŋ kɔ̈ɔ̈rkï röt, të cïn Ɛn.

⁵ Wek cä muk ɣɔn në jɔ̈ɔ̈ric, piny tuc arëët.

⁶ Të ɣɔn cääm Ɛn week, wek ë ye kuɛth, ku të cä wek kuɛth, ke wek ɣɛ̈ɛ̈c wenïïm, ku määrkï nïïm në Yɛn.

⁷ Ku wek bä gëëm cït man ë köör, ku mak week në kuɛɛriic cït man ë kuac.

⁸ Wek bä gëëm cït man köörayuääl cïï mïthke jɔt. Ku rɛt weyiic aköl. Wek bä rɛtiic, ku cuɛt week cït man ë köör.

⁹ “Yïn bï riääk yök, Yithriɛl, në biäk cï yïn yïnɔm wɛ̈l Ɛn, Yɛn konydu.

¹⁰ Melikdun nu ë nou, bï we bɛ̈n kony? Nu bänykun ë nou, bäny ke wuötkun kedhie? Bäny wään lɛ̈kkï Yɛn an, “Gämë wook melik, ku bäny? Yïkï dï, eeŋö cïï kek week be luök?

¹¹ Acä keek bɛ̈n gäm week ke cie piɔ̈ndï, na ɣɔn aa cä gɔ̈th ke ke bɛ keek nyaai.

¹² “Awɛ̈ɛ̈c ke Eparaim amɔ̈k keek në yapiɔ̈u, ku karɛcke acä keek thɔɔc nïïm.

¹³ Abä keek luöi këtuc, ka abïk ciët tiiŋ rɔ̈p. Acït mɛnh cï riëëu yiëëc, në akööl ke dhiëth, go dhiënhde yic riɛl.

¹⁴ Bä keek wɛ̈ɛ̈r bei paan ë thuɔɔu? Nu jɔɔkku ë nou yïn thuɔɔu? Luöi këtuc, nɔ̈k! Bɛ̈ɛ̈iyë Ku nu riääkdun ë nou wek rɛ̈ŋ? Yɛn cïï piɔ̈u bï bɛ kɔn kok wo keek.

¹⁵ Na cakaa nɔn cï yen bäny në juööriic, ka cï ciët aguun nu ë wɛ̈ɛ̈r yɔu. Abä tuöc yom tuuc de jɔ̈ɔ̈ric ee bɛ̈n të lɔ aköl amiäk, ku awɛɛŋke abïk dëu, ku nyïïnkɛn ke pïïu abïk liu. Ka abï këriëëcdɛn cïk kuɛ̈t röt jɔt ëbɛ̈n.

¹⁶ Kɔc ke Thamaria abïk awänyden dhiɛl guum, në luɔi cïï kek Nhialicden rɛɛc. Abï keek nɔ̈k tɔŋ, mïthken abïï keek dhiac piny, ku rëëtë diëërkɛn liac yiic bei në mïth.