Ɣodh 12 - JAM DE NHIALIC 2011

¹ Eparaim acamkï ɣääriic. Ayek yom de aköl amiäk cop cök ëceŋ. Ku acïk tör ŋuak nyin, ku tɔɔŋ acïk juëc në keyiic. Acïk mät looi në Athiriya ku Rip, ku ayek miök de olip gäm keek kɔk kek keek.

² Ku Bɛ̈nydït ade gääk wël nɔm kɔc ke Juda. Ku abï baai de Jakop luöi këtuuc rɔ̈ŋ kekë karɛckɛn yek looi.

³ Kuɛɛrëdun Jakop ɣɔn aacï acueekde dɔm ŋuur në man yäc, na ɣɔn aacï dït, ke wiët kekë Nhialic.

⁴ Acï wït kekë tunynhial, go tunynhial tiaam. Na wën, ke dhiau, ku lip athiɛɛi. Acïï ë Nhialic en bɛ̈n yök në Bethel, go jam kekë yen ëtɛ̈ɛ̈n.

⁵ Kënë ee Yen Bɛ̈nydït Awärjäŋ. Ku kek rinkɛn bïï ë Yen aa lam ka.

⁶ Ku ënɔɔnë, wek kuat de Jakop, puɔ̈kkï röt Nhialicdun. Muɔ̈kkï nhiëërde yic, ku luɔi de yic. Ku yak kë bï ë Nhialicdun looi tiit.

Wël Kɔ̈k ke Guiëër ë Löŋ

⁷ Aye Bɛ̈nydït lueel an, “Ku kɔc ee ɣɔɔc, ayek kɔc thɛ̈m në kake thëm dak thook, anhiaarkï ka lei.

⁸ Aye kɔc ke Eparaim lueel an, “Wok kueth, wok cï dɛk kajuëc. Ku në kuɛth kueth wokë ëbɛ̈n, acïn raan lëu en bï wook gɔ̈k, ku cïn raan duëër en lueel nɔn cïï wok wäc.

⁹ Ee Yɛn Bɛ̈nydït Nhialicdun, raan wään bïï week bei paan ë Rip. Wek bä bɛ tɔ cieŋ pɛɛny, cït man ɣɔn kan wek pɛɛny cieŋ në akööl ɣɔn ke dhuëŋ cï kuɛ̈ny bei ë jɔ̈ɔ̈ric.

¹⁰ “Yɛn ë cï jam wokë tït ke Nhialic, ku gäm keek nyuuth juëc. Ku jääm kɔc ke Yithriɛl në kɛ̈ŋ, në liëp ke tït ke Nhialic.

¹¹ Ku ŋoot Giliyad ke loi karɛc? Ee kɔc cïn naamden. Aŋootkï ke ke ye yiëth näk miöör në Gilgal? Yïïkken abïk ciën nɔmden, abïk ciët kur ë nyiɛɛiyë keek të gɔl ë dom.

¹² Ku kuɛɛrëdun Jakop ëbɛ̈n kat ke lɔ Methopotamia, go lɔ luui ëtɛ̈ɛ̈n athiɛɛk en tik. Go thiëëk në ariöp de tiët ë thök.

¹³ Go Bɛ̈nydït tiët tooc, bïï kɔc ke Yithriɛl lɔ luäk bei në yaaŋic ë Rip, ku tiit keek.

¹⁴ Ku wek kɔc ke Eparaim, wek ë Bɛ̈nydït wööc piɔ̈u arëët në awɛ̈ɛ̈ckun. Ku Bɛ̈nydïtdun, abï we gäm ariöp de awɛ̈ɛ̈ckun, ka wek bï thou. Ku abï we luöi këtuc në biäk kɛ̈n wek En riëëu guöp.