Ɣodh 11 - JAM DE NHIALIC 2011

Nhialic Anhiaar Kɔckɛn Reec En

¹ Aye Bɛ̈nydït lueel an, “Yithriɛl aa nhiaar të ɣɔn ee yen meth. Guɔ cɔ̈ɔ̈l bei Rip, ke ye wëndï.

² Ku ënɔɔnë, të cɔ̈ɔ̈l Ɛn Yithriɛl në yalɔ̈ɔ̈m, yen aye kek röt mɛc wei në Yɛn. Kɔckï ayek Baal näk, ku nyupkï yiëth wal ŋïr.

³ Ee Yɛn guöpdï, Yɛn ë wëët Yithriɛl në cäth. Ee Yɛn ë thaai keek, ku akuckï nɔn yen Yɛn ë tɔ keek dem.

⁴ Ku caath keek në nhiëër ku kokëpiɔ̈u. Acä keek waar yiëth në kathiek ɣɛ̈ɛ̈ckï, ku nyuööc piny cääm keek.

⁵ “Cïkï kenïïm bï bɛ puɔ̈k ë lïïmic, cït man wään në Rip? Cïï Athiriya keek bï cieŋ? Në biäk cï kek puŋ de piɔ̈u rɛɛc.

⁶ Abätɛ̈ɛ̈u abïk lɔ bilbil në pɛ̈ɛ̈nydïtken yiic, ku abïk kɛ̈l ke pänydït dhuööŋ thook, ku riäkkï cääpkɛn cïk keek kiëët ëbɛ̈n.

⁷ Acïï ë kɔckï gam nɔn bïk kek a nyääŋ piny. Na cakaa nɔn ye kek Awärjäŋ cɔɔl rin, acïï keek bï kɔn jat nhial ë taiwei. Kënë atuc arëët, acä duëër lëu bä looi.

⁸ “Duɛ̈ɛ̈r week jɔ päl wei adï, kɔc ke Eparaim? Duɛ̈ɛ̈r week gam wei adï, wek kɔc ke Yithriɛl? Duɛ̈ɛ̈r week riɔ̈ɔ̈k taitai adï cït päny de Adama, ku nɔn luöi week kë cä luöi Dheboyim? Acïï ë piɔ̈ndï duëër tɔ luɔɔi! Nhiëërdiën nhiaar Ɛn week adït aläl.

⁹ Agönhdï acä päl piny ë määth, Yɛn cïï Eparaim bï bɛ riɔ̈ɔ̈k taitai. Në biäk yan Nhialic, Yɛn cie raan. Yɛn ee Töŋ Ɣeric në weyiic. Yɛn cï bï bɛ̈n tëde week, ke Ya göth.

¹⁰ Abïk Bɛ̈nydït kuany cök, cït man ye köör mïthke cɔɔl në kiɛɛu. Të le yen cööt, mïthke abïk aa bɛ̈n në riëëu të lɔ aköl athɛ̈i.

¹¹ Abïk dap bɛ̈n ciëën paan ë Rip cït diɛt pär, ku dapkï bɛ̈n ciëën në Athiriya cït guuk ŋic wut. Ku abä keek dɔ̈k nïïm paanden. Ee Yɛn Bɛ̈nydït Yɛn ë luel ee kënë.

Yithriɛl kekë Juda Ajänyke

¹² Aye Bɛ̈nydït lueel an, “Baai de Yithriɛl acï Ɛn gɛɛu cil në lueth ku ruëëny. Ku kɔc ke Juda acïk Ɛn rɛɛc, Yɛn Nhialic adöt ɣeric.