Ɣodh 10 - JAM DE NHIALIC 2011

¹ Go Ɣodhiya lueel an, “Kɔc ke Yithriɛl aake cït tim de enap cï cuaar, ee mïth juëc bɛ̈ɛ̈i. Të cïï mïthke juëc, ayek yïïk juëc yïk. Ku të cïï pinyden luɔk arëët, ayek mën ke kurkɛn yaath yek lam jäm.

² Adekï yiic aguuk, ka abïk awänyden dhil thiëëp thok. Bɛ̈nydït abï yïïkken riäär piny, ku riëëk mënkɛn yaath.

³ Ku abï kɔc jɔ aa lueel an, “Wok cïn nïïm melik, në biäk kën wok Bɛ̈nydït riëëu. Ku na ë wok cak nïïm dɛk melik, eeŋö duëër luöi wook?

⁴ Ayek röt thɔ̈n kajuëc, ku kuëëŋkï në lueth, ku matkï kajuëc. Ku në biäk de ee kakë, ayek röt gaany arëët, cït man ye wɛl ke awɔɔk dap cil në dom cï puur yic.

⁵ Kɔc cieŋ Thamaria, ayek riɔ̈ɔ̈c në yanh dau, dan de Bethaben. Ku yen ee yanhë, abïï kɔc de ye dhiëëu mɛ̈tkï në bänyke, në baŋ de diɛkde në luɔi bïï ë ye peec.

⁶ Ku yath abï yiɛ̈n meliŋ de Athiriya, ke ya ariöp. Ku Yithriɛl abï yäär, ku abï guöp riɔ̈ɔ̈c, në biäk ye kek yiëth ke tiim lam.

⁷ Ku kɔc ke Thamaria, abï keek gap wei në meliŋden ëtök, cït man ë pän ë tim cïï kuëër ë pïïu gɔp.

⁸ Ku ɣään thöny ke Aben, ye kɔc ke Yithriɛl yiëth lam thïn, abïï keek riɔ̈ɔ̈k. Ee läm de yiëth yen aye awänydïït de Yithriɛl. Ka abï keek riɔ̈ɔ̈k, ku kuɔɔth, ayï thil abïk lɔ̈ɔ̈k cil në yïïkken nïïm. Ku kɔc abïk kur aa yɔ̈ɔ̈k an wïïkkï në kenïïm, ku lëkkï kur kor an, “Kuömkï wo piny!

Bɛ̈nydït Acɛɛl Luɔi bï ë Yithriɛl Luöi Këtuc

⁹ Aye Bɛ̈nydït lueel an, “Yithriɛl, wek cï wäc, gɔl në akööl wään ke Gibia agut cï ee köölë, we ŋoot ke we wäc. Kën tɔŋ kɔc ee karɛc looi bɛ̈n riɔ̈ɔ̈k ɣɔn në Gibia?

¹⁰ Go Bɛ̈nydït lueel an, “Kɔc ke Yithriɛl abä keek luöi këtuc në kööl cä tak. Abä keek tɔ dut ë juöör, ku peckï keek. Në baŋ de karɛckɛn juëc cïk looi.

¹¹ “Eparaim aa cït dan cï ŋiëc wɛ̈ɛ̈t, dan cïn luɔi dïït cï kɔn looi. Ku ënɔɔnë, yenhdɛn lɛ̈ɛ̈kë, abä yiëk wai ke puɔ̈ɔ̈r, ku kuaath. Ku Juda abï tiɔp geer, ku Jakop abï piny tuk.

¹² Gɔ̈lkï röt duum ku cuömkï röt piathëpiɔ̈u, ke wek bï kakë nhiëër agɔk yök, ke cie luɔi rac. Në biäk ye kek akööl ke kɔ̈ɔ̈r kɔɔr ë Bɛ̈nydït, agut kööl bï Yen bɛ̈n, bï week bɛ̈n gäm athiɛɛi.

¹³ Ku wek aacï röt cuöm karɛc, aguɔkï karɛc tem, ku camkï kɔ̈th ke ruëëny. “Në luɔi ë cä wek röt ŋɔ̈ɔ̈th, ku ŋäthkï jöötkuön juëc ke tɔŋ,

¹⁴ awuɔɔu de tɔŋ abï rɔt jɔ̈t week, ka pänykuön ril cäk yïk, abï keek thuöör piny kedhie. Abï ciët man ɣɔn thuur ë melik Calman pänydït de Beth Arbel piny në kööl ë tɔŋ, ago diäär dhiac piny abïk thou në mïthken ëtök.

¹⁵ Yen kë bï rɔt luöi week ka, wek baai de Yithriɛl, në biäk de dït de awänydun. Të le köölë thiɔ̈k, meliŋ de Yithriɛl abïï riɔ̈ɔ̈r nyin liŋliŋ.