Ɣodh 1 - JAM DE NHIALIC 2011

¹ Jam de Bɛ̈nydït kï, jam ë bɔ̈ tëde Ɣodhiya wën ë Beeri, në akööl ɣɔn ye Yudhia kekë Jotham, ku Aɣadh, ku Ɣedhekia meliik ke Juda. Ku ye Jerobowam wën ë Jowac meliŋ de Yithriɛl.

Tiiŋ de Ɣodhiya kekë Mïthke

² Të ɣɔn gɔl ë Bɛ̈nydït jam kekë kɔc ke Yithriɛl në kueer de Ɣodhiya, kë ë kɔn lɛ̈k en kï an, “Lɔ thiak tiiŋ akɔɔrröör, ke bï yï dhiëth mïth kɔ̈k adhiëthlëër. Në biäk cïï kɔckï ya nyääŋ piny, ku lamkï Baal.”

³ Ago Ɣodhiya Gomer thiaak, nyan ë Diblaim. Go liac ku dhiëëth mɛwä.

⁴ Go Bɛ̈nydït lɛ̈k Ɣodhiya an, “Cäkë an Jedhreel (yen aye kɔc cï Nhialic thiäi piny). Në baŋ bän baai de melik Jeɣu dap luöi këtuc, në biäk de nääk ɣɔn nɛ̈k en kɔc në wak de Jedhreel yic. Ku Yɛn bï ciɛɛŋ de baai de Yithriɛl jɔ teem kɔ̈u. Yɛn bïï bääny de dhiën ë Jeɣu tɔ kääc.

⁵ Ku në wak de Jedhreel yic ëtɛ̈ɛ̈n, Yɛn bï riɛl de rem de tɔŋ ë Yithriɛl dhoŋ kɔ̈u.

⁶ Go Gomer bɛ liac, ku dhiëëth duet. Go Bɛ̈nydït lɛ̈k Ɣodhiya an, “Cäkë an Nyaman, në baŋ cän piɔ̈u bï bɛ kok wokë baai de Yithriɛl, ku cä be päl awäc.

⁷ Ku Yɛn bï kɔc ke Juda nhiaar, ku abä keek luök. Ku acä keek bï luök në dhaŋ, ku abätäu, ku tɔŋ, ku cä keek luäk në jöŋgöör ke tɔŋ. Abä keek luök Yɛn Bɛ̈nydït Nhialicden.

⁸ Na ɣɔn, aacï Nyaman nyueth thok, ke Gomer ë be liac. Go mɛwä dhiëëth.

⁹ Go Bɛ̈nydït lɛ̈k Ɣodhiya an, “Cäkë an, ‘Monyjai’ në biäk cä wek ee kɔckï, ku cä ye Nhialicdun.”

Yithriɛl abï Luök

¹⁰ Acïï Nhialic lɛ̈k kɔc ke Yithriɛl ënɔɔnë an, “Wek cie kɔckï, ku abï bɛ lɛ̈k keek wadäŋ an, “Wek ee mïth ke Nhialic Pïïr. Ka kɔc ke Yithriɛl abïk bɛ juëc arëët, abïk ciët liɛɛt de wɛ̈ɛ̈r yɔu. Ka acï keek bï ya lëu në kuɛ̈n, ku cïï keek lëu në thëm.”

¹¹ Ku kɔc ke Yithriɛl abïk bɛ mat në kɔc ke Juda, ku pukkï kenïïm pinyden. Ku abïk röt bɛ aa kuɛ̈ny bɛ̈ny tök. Ku akööl ke Yithriɛl abïk bɛ aa akööl lɔyum arëët.