Ɣeberuu 9 - JAM DE NHIALIC 2011

Läm ë Pinynɔm ku Paannhial

¹ Ee yic, löŋ cï mac thɛɛr aa de nɔm kuɛɛr cï kiëët ye kɔc Nhialic lam tëɣeric yic, ɣön cï yïk ë piny nɔm eenë, në kɔc.

² Ku yen ë paanydïïtë acïï gëlgël tekic, ɣön tueŋ acɔl tëɣeric kak ee nu thïn ee kë ye manyëalath cäp thar thïn, ku lɔ pamdït ye kuïn cï pam ɣeric cï gäm Nhialic tääu ë yenɔm.

³ Ɣön ee kek rou nu ë paany kɔ̈u ciëën, acɔl Tëɣeric aläl.

⁴ Ku kak ee nu thïn ee yïïŋ de nyum ë wal ŋïr cï cuëëc adhääp, ku athänduŋ de mät cï paat kɔ̈u piny në adhääp ëbɛ̈n ku ade yic käŋ kadiäk, kë tueŋ ee tööny adhääp de yic kuïn cɔl mana, kë ye kek rou ee thieny ë Aron wään cï kɔn nyok ku moc gaak, ku jɔ ya pɛɛm cï löŋ cï mac gäär ë kekɔ̈ɔ̈th.

⁵ Ku kääc tuucnhial kaarou në akum de athänduŋë nɔm, aake guaŋ ë tim, acɔlke cerubiim akumkï të de päl de awɛ̈ɛ̈c ë atïmden, wo bï kɔ̈ɔ̈c ëtɛ̈ɛ̈n, acïn të bï wok ee kakë giit nyïïn në luɛl ënɔɔnë.

⁶ Yen luɔi ë cïï ke kiëët ka, bɛ̈ny de kake Nhialic aaye cool ke loi luɔi de Nhialic aköölnyïïn kedhie, ë paanyic ɣön tueŋ.

⁷ Ee bɛ̈nydïït ë kake Nhialic yen aaye lɔ ë paanyic ɣön ciëën raantök ëruöön tökic ke lɔ riɛm wiɛ̈ɛ̈th në këde yenhde ku lɔ këde awɛ̈ɛ̈c cï kɔc looi ke ke kuckï röt.

⁸ Ku në kakë yiic kedhie, acïï Wëidït ɣer nyuöth wook në këde kueer lɔ Tëɣeric aläl nu paannhial an, aa kënë guɔ liëp thok wook, në biäk ŋoot ë paany ye Nhialic lam në kueer ë löŋ thɛɛr ke kääc.

⁹ Ku kënë ee kɛ̈ɛ̈r ŋoot ë ka gɛmë ka näk në kueer ë löŋ cï mac thɛɛr, ku ee kënë acïï kɔc duëër tɔ piɛthpiɔ̈ɔ̈th, kɔc ee Nhialic lam në ë kueerë, ku cïï keek ɣeet të duëër kek dikëdik abïk piɔ̈ɔ̈th lɔ̈ŋ.

¹⁰ Cït man ɣɔn thɛɛr ye kuïïn bɛ̈ɛ̈i ku ka ye dek miɔɔcë ke, acïtkï lööŋ wɛɛk ë kɔc kegup biic.

Ɣön de Läm Paannhial

¹¹ Ku ënɔɔnë Kërtho acï bɛ̈n ke ye Bɛ̈nydïït ë kake Nhialic, kapiɛth nu eenë, yï thon cï Yen thou ku pɛ̈l wook karɛckuɔ, ku paanydïït Yen luui thïn ee dikëdik aläl, acie paany ë yïk ë raan, ee tëɣeric nu paannhial.

¹² Në ye tëɣericë yic acïï Kërtho lɔ thïn raantök në thonde, ku riɛmde guöpde yen aa gɛm, wïïthë piny ke cie riɛm de thök bɔɔth ku miöör, ɣɔn cï riɛmde kuëër piny në nyinda yic, yen acï Yen kuɔɔnyda giit ëbɛ̈n aɣet athɛɛr.

¹³ Rim ke bɔɔth ku miöör ku lɔ ŋenh ë dan cï nyop, ye pɔɔr ë kɔc gup, kɔc cï wook në kacol, ago ke tɔ piɛth gup biic yen kueer ë löŋ thɛɛr ka.

¹⁴ Riɛm de Kërtho Raan cï rɔt gäm Nhialic ke cïn guöp tëthiin col në Wëidït ee tɔ̈u athɛɛr, bï keek wöör ë wär yïndï? Në wɛ̈k bï yen wook waak piɔ̈ɔ̈th në luɔi ee thuɔɔu bɛ̈ɛ̈i abuk ciën kë ŋïcku röt, ke wo bï kake Nhialiny pïïr aa looi.

¹⁵ Në biäk ee kënë, Kërtho aaye raan töŋ cï mät looi në löŋ cï piac mac, ago kɔc cï cɔ̈l pïïr athɛɛr lɔ̈ɔ̈k lak, në këde thon cï En thou bï awɛ̈ɛ̈c ke kɔc nyaai, awɛ̈ɛ̈c wään cï looi në kueer ë löŋ thɛɛr.

¹⁶ Yen aŋicku, tëde yen ka cï than piny, aye ke kɔn ŋic, na cï raanë thou,

¹⁷ kak ë thɛnë piny acïn kë duëërë ke lak të ŋootë raan ë thɛn keek ke kën thou, ee të cï yen thou yen aduëërë ke jɔ lɔ̈ɔ̈k lak.

¹⁸ Yen akënë löŋ cï mac tueŋ cak thar të cïn riɛm.

¹⁹ Aŋicku wään Mothe të cïï cök ke lööŋ ëbɛ̈n kuɛ̈n kɔc ago ke riëëu, ke jɔ rim ke miöör ku nyök bɔɔth cï liääp ë pïïu, ku nööm këër ë wɛ̈ɛ̈l cɔl ɣathop cï nhïm thith ke thök dɛɛr ë yenɔm ku joolë ke ku wïïthë ke në awerek de löŋ kɔ̈u ku kɔc gup kedhie.

²⁰ Ago lɛ̈k kɔc an, “Riɛm de löŋ kï, löŋ cï Nhialic mac ke week në riëëu bä wek ke riëëu.”

²¹ Ku yen nööm ë Mothe riɛm cït man awën ku wïïth ë paany ë lɔ̈ŋ kɔ̈u ku lɔ kake läm nu thïn kedhie.

²² Acï löŋ lueel an, tëdït ë käŋ kedhie abï ke dhil tɔ ɣeriic në wïïth ë riɛm, acïn päl awɛ̈ɛ̈c të cïn riɛm cï lɛ̈u.

Thon de Kërtho ee Karac Nyaai

²³ Kakë aake ye nyooth de ka yith nu paannhial, ku ayek kaken tɔ ɣeriic në ye kueerë. Ku na kake paannhial kapäc akɔɔrkï ka gɛmë ka näk ŋuän awär këden.

²⁴ Ku Kërtho akën lɔ në tëɣeric yic kë ë yïk ë raan ciin. Ee tëɣeric yic nu paannhial yen aleer En guöpde, ku ënɔɔnë ee tïc ë Nhialic nɔm në nyinda yic.

²⁵ Bɛ̈nydïït ë kake Nhialic de Judai ee lɔ tëɣeric në ruöön thok ëbɛ̈n ke muk rim ke thök, ku Kërtho akën lɔ paannhial ku gɛm rɔt raanjuëc cït man ë kek.

²⁶ Ku na ye rɔt gaam ë ruöön thok ëbɛ̈n Yen Kërtho adï cï gum raanjuëc gɔl të wään ciɛkë piny cït man ë bäny ke kake Nhialic ke Judai käŋ nɔ̈k ë ruöön thok ëbɛ̈n. Ku ë nɔn ciëënë në thök de luɔi de löŋ thɛɛr, ke jɔ rɔt nyuɔɔth raantök në luɔi cï yen riɛl ë kërac nyuän piny në gɛ̈m cï Yen rɔt gäm Nhialic näk nyiɛɛiyë karɛckuɔ.

²⁷ Cït man ye raan thou raantök ku jɔ lɛɛr të ye löŋ guiir.

²⁸ Yen acï Kërtho thou, nyiɛɛi karɛc ke kɔc juëc. Ku miäk të le Yen bɛ bɛ̈n në bɛ̈n ee kek rou, acie karɛc kek bï bɛ̈n bɛ nyaai, abï bɛ̈n bï raan ëbɛ̈n raan tit En bɛ̈n kony wëi.