Ɣeberuu 6 - JAM DE NHIALIC 2011

¹ Ënɔɔnë dï, jɔku wëët ë gɔl tueŋë në kë de Kërtho nyääŋ piny, ku jɔku lɔ tueŋ në wëët ë kɔc cï gïu, acïn këërkëër däŋ buk nyɔk ë tɛ̈ɛ̈u piny, ee yen aa gɔl ë wëëtda ɣɔn thɛɛr, yï wëët ë puŋëpiɔ̈u në luɔi cï thou ku lɔda në gäm de Nhialic yic.

² Cït nɔn e yï wëët ke jool kithiic ku thɛ̈ny de cin ë kɔc nïïm, ku wëët në kë de jön bï kɔc cï thou röt jɔt ë thuɔɔuwic, ku guiëër ë löŋ ee tɔ̈u athɛɛr.

³ Lɔ bï wok lɔ tueŋ yen abuk looi, cït man nu yen në Nhialic piɔ̈u.

⁴ Duëër kɔc cï lɔ ciëën bɛ dak nïïm ë puŋëpiɔ̈uwic adï! Të cï kek kɔn nu ë ɣɛɛric ku thiëpkï miɔ̈c ë bɔ̈ nhial, ku rɔmkï Wëidït ɣer ë wook ëtök,

⁵ ku thiëpkï jam piɛth ë Nhialic ku riɛldïït ë piny bï bɛ̈n.

⁶ Kɔckë të cï kek dɔk ciëën në gämic, arilic bïk ke bɛ puk piɔ̈ɔ̈th, ku dɔ̈kden ciëën acït ka cï Wën de Nhialic bɛ nyɔk ë piëët, ku tɔkï yäär guöp ë kɔc nïïm.

⁷ Ku abï ciët piny ye deŋ tuɛny thïn ë ceŋ ku lok në kapiɛth ku kɔc ee ye puur ayek yök në athiɛɛi de Nhialic.

⁸ Ku na le luɔk në thil ku kuɔɔth, ka cïn këpiɛth nu thïn, atit riäŋdïït bï Nhialic ye cieen ku nyop në mac.

⁹ Ku wek määthkï na wo cak jam aya, ke wek ŋäthku nɔn dɛ wek nïïm athiɛɛi ŋuän në këde kuny de wëikun.

¹⁰ Nhialic ee käŋ ŋiëc tiiŋiic ku cïï nɔm ee määr ë luɔiduön cäk looi, ku nhiëër cäk nyuöth En ɣɔn cä wek kakë kɔc ɣerpiɔ̈ɔ̈th looi, ku ŋuɔɔtkï ke ke luɔikï keek aɣet cï ënɔɔnë.

¹¹ Kë kɔɔrku wek mïthëkɔckuɔ, luɔi bï raan ëbɛ̈n ë weyiic kɔ̈ɔ̈c aril në cökke yiic, agut cï thök de käŋ, ago aŋäth de kapiɛth cïï Nhialic kiëët në këdun aa yic.

¹² Acuku kɔɔr luɔi bä wek aa adaakröt, akɔɔrku bäk ciët kɔc cï gam, ku yek tïït ku gumkï aɣet të bï Nhialic ke gäm kë cï thɔ̈n keek.

Thön Luel Yic de Nhialic

¹³ Ɣɔn kɔɔr ë Nhialic bï yen Abraɣam thɔn, ke jɔ kuëëŋ në rɔt, në luɔi cïn en raan dït në yenɔm tueŋ.

¹⁴ Go lɛ̈k en an, “Yïn bä thieei ku gäm yïn mïth juëc.”

¹⁵ Abraɣam acï bɛ̈n gum ke tït ë piɔ̈n lir aɣet të bï yen kë cï thɔ̈n en bɛ̈n ŋoot ke yök.

¹⁶ Të kɔɔr raan bï kuëëŋ, ee kuëëŋ në rin ke raan dïït wär en në dït, ku gutguut yen aye teer jɔ kɔ̈ɔ̈c.

¹⁷ Ku në biäk de kɔc cïï Nhialic ke thɔ̈n miɔ̈c, aye Nhialic kɔɔr bï nyuöth kɔc ëgɔk, luɔi cï Yen kë cï thɔ̈n keek bï waar në gutguut.

¹⁸ Käŋ kaarou ka cïï röt duëër waar ku cïï Nhialic ke lueth duëër töör në biäkden, ee ka cï than ku lɔ kuëŋ cï Yen kuëŋ, acïk wook gäm aŋäth ku riëtëpiɔu, agoku kɔ̈ɔ̈c aril në aŋäth cï tääu ë wonïïm tueŋ.

¹⁹ Wok de nïïm aŋäth dït cï mac piny cïn kë lëu en në wuök tëde, në biäk de këde pïïrda, aŋäth ŋicku ëgɔk bï wo tɛ̈ɛ̈k në gëlgël ë luaŋdït ë paannhial, ku ɣeet wook tëɣeric ëwic wär këriëëc.

²⁰ Ku yen ee të cï Yecu kɔn lɔ thïn në wonïïm tueŋ në nyinda yic, ke ye Bɛ̈nydïït ë kake Nhialic cït bɛ̈ɛ̈ny ë Melkidhedek.