Ɣeberuu 5 - JAM DE NHIALIC 2011

¹ Bɛ̈nydïït ë kake Nhialic ëbɛ̈n aye kuɛ̈ny bei në kɔcken yiic, ku dɔm ke bï Nhialic luööi në nyin ë kɔciic. Ke bï miɔ̈c aa gäm Nhialic ku miɔ̈c de kanäk në baŋ de awɛ̈ɛ̈c.

² Në biäk kɔ̈c en, yen aye yen piɔ̈u liɛɛr kekë kɔc kuc käŋ ku yek käŋ wööc.

³ Yen aye yen miɔ̈c gam në biäk de awɛ̈ɛ̈cke, ku në biäk de awɛ̈ɛ̈c ke kɔc ayadäŋ.

⁴ Acïn raan ee rɔt dhuëëŋ yetök, ee cɔ̈t ë Nhialic yen aye raan aa bɛ̈nydït tueŋ de kake Nhialic cït man ɣɔn cïï Nhialic Aron lɔc.

⁵ Yen luɔi tɔ̈u en ka kekë Kërtho, aa kën rɔt dhuëëŋ bï rɔt dɔm ke ye Bɛ̈nydïït ë kake Nhialic yetök, ee Nhialic yen aa yöök en an, “Yïn ee Wëndï, ee köölë Yɛn cï ya Wuur.”

⁶ Cït man cï Yen e lueel të däŋ an, “Yïn ee Bɛ̈ny ë kake Nhialic aɣet athɛɛr bɛ̈ny ë kake cït bɛ̈ɛ̈ny ë Melkidhedek.”

⁷ Ɣɔn nu Yecu ë piny nɔm, acï Nhialic lɔ̈ŋ ku dhiɛɛu në röldït, lɛ̈ŋ Nhialic Raan duëër en kuöny bei në thuɔɔuwic. Aye lɔ̈ŋ në riëëu ku kuur yen rɔt kuɔɔr piny në Nhialic nɔm, go Nhialic lɔ̈ŋde piŋ.

⁸ Cakaa nɔn Yen Wën ë Nhialic, acï wëët në riëëu në guöm cï Yen gum.

⁹ Ku të cï Yen dikëdik, acï ya kueer ë kuny de wëi aɣet athɛɛr, tëde kɔc ee jamde riëëu.

¹⁰ Ku ee yen ë lɔc ë Nhialic En ke ye Bɛ̈nydïït ë kake Nhialic cït bɛ̈ɛ̈ny de Melkidhedek.

Jäny në Biäk de Lööny Wei në Gämic

¹¹ Kajuëc aduëërku ke lueel në këde ë wëëtë, ku wër ëyicde arilic në luɔi cä wek käŋ ee dap yökiic. Në luɔi riɛl wek nïïm ë tör.

¹² Adï cäk aa bäny ee kɔc wɛ̈ɛ̈t, ku ënɔɔnë, wek ŋoot ke we kɔɔr raan be week gɔl në wëët ë ka tueŋ ye ke wëët ë yith ke Nhialic gɔl. Wek cït röördït cï röt dɔ̈k ca, ku pälkï kuïn ril kɔ̈u!

¹³ Kɔc ee ca kɔɔr acïtkï mïth kor wën kuc kërac kekë këpiɛth.

¹⁴ Kuïn ril kɔ̈u yen aye këde röördït cï gïu ë wëët në luɔi ye kek këpiɛth pɔ̈c bei në këracic.