Ɣeberuu 3 - JAM DE NHIALIC 2011

Yecu Awär Mothe

¹ Yeka, wek mïthëkɔckuɔn ɣeriic tɔ̈u në gämic, kɔc rɔm wok cɔ̈t ë paannhial, tääukï täŋdun në Yecu guöp, Raan cïï Nhialic tuööc ke ye Bɛ̈nydïït ë kake Nhialic de gämdan yok luɛɛl.

² Aa ye piɔ̈u adöt kekë Nhialic, Raan ë lɔc En, cït man wään ye Mothe piɔ̈u adöt në ka ye looi ë dhiën ë Nhialic nɔm.

³ Yecu guöpde acï yök arɔ̈ŋ ke riëëudït awär Mothe, cït man ye raan dïït ë dhiën dhuëëŋ guöp awär dhiënde.

⁴ Ku dhiën ëbɛ̈n ade raan ee yen looi, ku Nhialic yen aye këriëëc looi ëbɛ̈n.

⁵ Ku Mothe aaye raan adöt në luɔi de dhiën ë Nhialic nɔm tëde kɔcke kedhie. Ku ye keek guiëër ka bï lueel rial wadäŋ.

⁶ Ku Kërtho ee mɛnh adöt në dhiën de Nhialic nɔm ëbɛ̈n. Ku wok aye dhiënde, të muk wok wopiɔ̈ɔ̈th aril, ku dötku aŋäthdan ye wok röt leec athöökë käŋ.

Lɔ̈ŋ në Biäk de Kɔc ke Nhialic

⁷ Acït man cïï Wëidït ɣer ye lueel an, “Ëköölë, të piɛŋ wek rölde,

⁸ ke we duökï wenïïm tɔ ril cït man ë kɔc ɣɔn cï Bɛ̈nydït jäi ku nyiëëŋkï piny, ɣɔn themë keek në jɔ̈ɔ̈ric.

⁹ Ku ɣɔn cïï kuarkun Ɛn riɔ̈ɔ̈k piɔ̈u, acïk ka cä luöi keek bɛ̈n tïŋ në runiic kathiërŋuan.

¹⁰ Yen kë ë gɔ̈th Ɛn wok ee remë ka, ku luɛɛl an, ‘Ayek cool ë wäc käŋ ë kepiɔ̈ɔ̈th, ku kuckï kuɛɛrkï.’

¹¹ Aguɔ gɔ̈th ku kuɛ̈ɛ̈ŋ an: ‘Acïkï bï lɔ në lɔ̈ŋdï yic.”’

¹² Ka week mïthëkɔckuɔ, yak röt tiit apiɛth ke bï ciën raan töŋ ee kërac looi në weyiic. Raan cïn gäm në yepiɔ̈u, raan ee rɔt dak ciëën në gäm de Nhialiny pïïric.

¹³ Ku yak wepiɔ̈ɔ̈th riit wapäc aköölnyïïn kedhie. Ke bï ciën raan töŋ bï nɔm riɛl ë weyiic të cïï kërac e math. Në luɔi ŋoot En ke cöt “Ee köölë.”

¹⁴ Wok duëër rɔm në Kërtho ëtök, të muk wok gämdan cï wok kɔn gam aril agut cï thök de käŋ.

¹⁵ Cït man cïï ye lueel në këcïgɔ̈ɔ̈ric an: “Të piɛŋ wek rölde ee köölë, ke we duökï wenïïm tɔ ril cït man ë kuarkun, ɣɔn cä wek Bɛ̈nydït tɔ diu piɔ̈u.”

¹⁶ Ee yï ŋa ë piŋ röl ë Nhialic ku jiëikï? Cie kek kɔc ɣɔn bïï ë Mothe bei paan ë Rip?

¹⁷ Ku ee yï ŋa ë göth ë Nhialic në këden në run kathiërŋuan? Cie kɔc ɣɔn cï kërac looi në reec reec kek gäm, gokï thou ku dɔ̈ŋ gupken ë jɔ̈ɔ̈ric?

¹⁸ Ku ee këde yï ŋa ë cïï Nhialic kuëëŋ an cïkï bï lɔ ë lɔ̈ŋde yic? Cie këde kɔc ɣɔn reec gäm, wään cïï gupken döŋ ë jɔ̈ɔ̈ric?

¹⁹ Ku ënɔɔnë acuk jɔ tïŋ nɔn ë kën kek bɛ̈n thïn lëu, në biäk cïn kek gäm.