Ɣeberuu 2 - JAM DE NHIALIC 2011

Kunydewëi Dït

¹ Kimku wonïïm piny apiɛth, ku dötku wël cï lɛ̈k wook, ke wo cï bï jäl në yicic ke kucku röt.

² Ku na cï jam ɣɔn lëk ë tuucnhial kuarkuɔ jɔ aa yic, ku le dɛ raan kën yen kuany cök, ku nɔn kën en en gam, abï luöi këtuc thok rɔ̈ŋ ke awänyde.

³ Ka buk poth adï, të kën wok wonïïm riët kuɔɔnydïït de wëiyë. Ku Bɛ̈nydït guöpde Yen aa kɔn ee jamë luɛɛl, ku jɔ kɔc ɣɔn cï ye piŋ nyuöth wook nɔn yen yic.

⁴ Ku kë cïk lueel acïï Nhialic nyɔk ë nyuöth nyooth Yen en ayadäŋ në göök ke gäi, ku në tëŋ tek En miɔ̈c de Wëidït ɣer cït kë kɔɔr ë piɔ̈nde.

Raan bï Wo Wat tëde Kunydewëi

⁵ Ku Nhialic akën tuucnhial tɔ ye bäny ke piny bï bɛ̈n, yen ee piny jiɛɛm wok në këde yë.

⁶ Cït man cï ye lueel tëdäŋ në Këcïgɔ̈ɔ̈ric an: “Raan eeŋa, Yïn Nhialic, kë Yïn Yïnɔm tak në yen? Cie mɛnh ë raan tei? Eeŋö nuɛɛn Yïn rɔt në yen?

⁷ Acï tɔ koor ë määth në tuucnhial në kaam thiinakäŋ, ku acï gäm nɔm göl ë dhuëëŋ ku riëëu.

⁸ Ku tɔ ye bɛ̈ny në käŋ nïïm kedhie.” Ku na wën, aa cï käŋ tääu në yeciin kedhie, ke acïn kë cï bɛ döŋ kë cïï tɔ̈u në yeciin. Ku ënɔɔnë, acïn kë cuk guɔ tïŋ ke tɔ̈u në yeciin.

⁹ Ku wok ë Yecu tïŋ acï tɔ koor ë määth në tuucnhial në kaam thiinakäŋ. Ku ënɔɔnë ë yiëk nɔm göl ë dhuëëŋ, në biäk cï Yen thuɔɔu guum në dhuëëŋ de Nhialic piɔ̈u, ke bï thuɔɔu thiëëp në këde raan ëbɛ̈n.

¹⁰ Acïï Nhialic tiiŋ nɔm, Raan ë cak këriëëc ëbɛ̈n ku dötke, abï Yecu tɔ dikëdik në guöm, ago kɔc juëc lɛɛr të bï kek dhuëëŋde rɔm. Në luɔi Yen Yecu yen ee kɔc wat tëde kunydewëi.

¹¹ Ku Yecu, Raan ee kɔc tɔ ɣeriic, kekë kɔckɛn cï tɔ piɛthpiɔ̈ɔ̈th Wunden ee tök, yen acïï Yen ee yäär bï keek ya cɔl mïthëkɔcken.

¹² Ago lueel an, “Rinku abä ke lɛ̈k mïthëkɔckï, në akutnɔmden yic. Ku lɛɛc Yïn në dit.”

¹³ Ku nyɔk në luɛl an, “Nhialic abä ŋɔ̈ɔ̈th.” Ku be lueel an, “Yakï wokë kɔc ë gëm ë Nhialic Ɛn.”

¹⁴ Wok ee kɔc de gup rïŋ ku riɛm. Ku Yen aya, ade guöp cï wook. Yen kë ë tɔ Yen ee raan töŋ ë woyiic ka, ku kën ë looi Yen ee kënë ee luɔɔi bï Yen jɔŋdït rac riɔ̈ɔ̈k në thonde, raan nu riɛl ë thuɔɔu ë yeciin.

¹⁵ Ku yen kueer ë tɔ yen kɔc lääu nïïm ka, kɔc ɣɔn cï riɔ̈ɔ̈c ë thuɔɔu, kek tɔ ye lïïm në pïïrdenic ëbɛ̈n.

¹⁶ Aŋicku ëgɔk nɔn cien ë tuucnhial kek ë bïï bɛ̈n kony, ee käu de Abraɣam.

¹⁷ Yen kë ë tɔ Yen tɔ cït mïthëkɔcken ka në këriëëcic ëbɛ̈n. Ke bï ya Bɛ̈nydïït ë kake Nhialic ee piɔ̈u adöt ku kook piɔ̈u në luɔi de Nhialic yic. Ke bï kɔc ke wɛ̈ɛ̈r bei në karɛckeniic.

¹⁸ Ku Yen guöpde acï gum ɣɔn themë yen, Yen aduëër en kɔc ye them lëu në kuny.