Ɣeberuu 13 - JAM DE NHIALIC 2011

Luɔi ee Nhialic Miëtpiɔ̈u

¹ Yak kɔ̈ɔ̈c në nhiëërduön nhiaar wek röt cï mïth ke raan tök në Kërtho yic.

² Ku duökï nyuuc de kamaan päl, yen këpiɛth ë looi ë kɔc ɣɔn thɛɛr ka, ɣɔn loor kek tuucnhial nïïm ku nyuuckï ke, ke ke kuckï.

³ Yak diɛɛr anandun në kɔc mac cït man ë ka mac në keek ëtök.

⁴ Week mïthëkɔckuɔ, ë thiëëk ë ye riëëu në kɔc kedhie. Yak kë nhiany tɔ mec në biöŋ ë thiëëkic. Kɔc cïn gup athɛɛk kedhie ku kɔc ee diëër lei kɔɔr abï Nhialic ke löŋden guiir atuc.

⁵ Duökï piɔ̈ɔ̈th ee dït në nhiëër ë kajuëc kaarkï, yak piɔ̈ɔ̈th miɛt në ka tɔ̈u në week. Në luɔi cïï Nhialic e lueel an, “Yïn cä bï nyääŋ piny aya ku yïn cä bï kɔn pɔ̈l anandï.”

⁶ Ku ee kënë ee wo ŋuak në riɛl ë nyin ku aŋäth lueel wok en an, “Bɛ̈nydït ee konyda, wok cïï bï riɔ̈ɔ̈c. Eeŋö bï raan luöi wook?”

⁷ Yak wenïïm tak në kɔc ë we jääm, kɔc wään wëët week në jam ë Nhialic, yak wëët në pïïrdenic ayï thonden, yak gämden tääu në wekɔ̈ɔ̈th cït man ë lupɔɔ ciɛŋkï.

⁸ Yecu Kërtho acïï rɔt ee waar, atɔ̈u ë täude anande, aa nu ɣɔn thɛɛr, ku ee köölë, ku abï nu aɣet athɛɛr.

⁹ Yen duö wek röt ee tɔ thelë tɛ̈n ku tɛ̈n, yak röt pëën ke we cï bï nyaai në kueer ë Kërtho yic ku wëëtde, ku leerë we në wëët luethic. Ë we waar në riɛmde ku lööŋ cï tääu piny në biäk de thɛ̈k de kacaam akënkï we waar. Ayï kɔc ee lööŋkë riëëu acïn këpiɛth cïk luöi keek.

¹⁰ Ku wook, wo de nïïm yïïŋ de läm gɛ̈ɛ̈iyë ku bäny ke kake Nhialic ee luui ë paany de Judai yic acïnkï nïïm kë cït ee kënë.

¹¹ Yeka ye bɛ̈nydïït ë kake Nhialic de Judai lɔ Tëɣeric aläl ka, ke muk rim ke läi, ka gɛmë ka näk në biäk de karɛc ke kɔc, ku gupken aye ke nyop ë wut këc biic.

¹² Ye ka cïï Yecu gum abï thou aya, në wut këc biic, ago kɔc tɔ ɣer piɔ̈ɔ̈th në wɛ̈k wɛɛk en karɛc në riɛmdɛn cï kuëër.

¹³ Yen kë duëër wok lɔ ka në wut këc biic, lok ayäär rɔm në yen ëtök.

¹⁴ Në biäk cïn wok nïïm wun bï tɔ̈u anande ë piny nɔm eenë, ee wun bï bɛ̈n yen atitku.

¹⁵ Ka wook, wok kɔc nu ë kueer ë Bɛ̈nydan Yecu Kërtho yic, Bɛ̈nydan nu nhial, yok Nhialic lɛc nɔm në lɛc cïï kɔ̈u ee tɛɛm yen aye miɔ̈cda në rin ke Yecu Kërtho.

¹⁶ Ku duökï nïïm ee määr në luɔi de këpiɛth, thɛmkï bäk kakun aa rɔm në kɔc nuan, kënë ayadäŋ acït miɔ̈c cï gäm Nhialic, ku ee Yen tɔ mit piɔ̈u aläl.

¹⁷ Yak kɔc nu ë wenïïm piŋ thook, ku luöikï në kë cïk lɛ̈k week, acïkï ee bäp në luɔi ye kek cool ke ke kïït kake wëi në biäkdun, në kë yen luɔi cïï Nhialic tääu në keyiëth bïk dhil looi, yen ya wek ke tɔ lui në miɛtëpiɔ̈u ee yen aŋuän. Ku na lak ke tɔ jieth piɔ̈ɔ̈th në luɔidenic, eeŋö bïk bɛ kuöny week?

¹⁸ Läŋkï në biäkda, agoku ŋoot ke wo lɔ piɔ̈ɔ̈th gɔk, ku athemku duëërku këpiɛth aa looi në akööl thook ëbɛ̈n.

¹⁹ Yɛn yatök wek kaar bäk lɔ̈ŋ në luɔi bän bɛ̈n aguɔ week dap bɛ̈n neem.

Lɔ̈ŋ Ciëën

^20-21 Thieithieei Nhialiny de mät cï Bɛ̈nydan Yecu jat nhial në kɔc cï thouwiic. Ku Yecu acï ya tïndïït ë thök, ku riɛmde yen aa looiyë löŋ cï mac athɛɛr në biäk ë thökke. Yɛn läŋ Nhialic bï week miɔɔc në kapiɛth kaarkï, bï këde piɔ̈nde looi apiɛth ëbɛ̈n, ago Yecu wo kuɔny bï këmit ë Nhialic piɔ̈u tɔ loi në woyiic. Ëdhuëëŋ ëye tɔ̈u kekë Yecu Kërtho aɣet athɛɛr ya Amiin.

Wël Ciëën

²² Wek liɛm mïthëkɔckuɔ an, Ruɔmkï wepiɔ̈ɔ̈th në pïŋ de jam de riëtëpiɔ̈u cï lɛ̈k weekë bäk dɔmic aril. Kek ka lik ë gäär week ka.

²³ Ku jakï ŋic luɔi cïï mänhëdan Timotheo lony ɣön ë döm, ku të cïï yen dap bɛ̈n, abä luath kekë yɛn ëtök, agoku lɔ yök.

²⁴ Thiëckï kɔc nu ë wenïïm ku kɔc ɣerpiɔ̈ɔ̈th kedhie, an we ye kɔc nu Yitalia ke thiëëc.

²⁵ Ëdhuëëŋ de Nhialic piɔ̈u ë ye tɔ̈u ke week wedhie. Amiin.