Ɣeberuu 12 - JAM DE NHIALIC 2011

Nhialic Wääda

¹ Cït man cï wok nïïm jɔ dɛ kutdïït ë kɔc cï Nhialic gam, ku acïk wo tuɔɔk cït man ë luäät ke ke woi wopiny. Yok këriëëc ëbɛ̈n kuɛ̈k bei, kak ee wo gɔ̈ɔ̈u ayï karɛc ee tɔ̈u ë nuatnuat ë wocök, ku tɔkï wo wiëëk, yokku ke kuɛ̈k bei. Ku jɔku riŋ ke wo cïï diɛɛr, tëde kë cïï Nhialic tääu ë wonïïm tueŋ.

² Ku yok wonyïïn tääu në Yecu guöp, Yen woiku Bɛ̈ny cï gämda gɔl ku thöl. Aa cï gam në Yepiɔ̈u ëbɛ̈n luɔi bï Yen thou në thon ayäär, në tim cï rïïu nɔm kɔ̈u në biäk de miɛtëpiɔ̈u ŋic bï yök në thökde. Ku Yen ënɔɔnë arɛ̈ɛ̈r në ciin cuëëny de thööny de Nhialic nu nhial.

³ Eeŋö cä wek aterdïït cïï Yecu guum ee tak, ku lɛ̈ɛ̈t wään ye kɔc kën gam ye läät! Agokï we muk piɔ̈ɔ̈th, ke we cïï röt bï pälwei ku cäkï piɔ̈ɔ̈th bï bäp.

⁴ Acïn raan cï we guɔ lɛ̈u riɛm, në wït wiët wek në kërac.

⁵ Ku wek ee nïïm guɔ määr në kë cï Nhialic lɛ̈k week ke we ye wɛ̈ɛ̈tke ku nyïïrke an, “Duökï ee gɔ̈th të cï Bɛ̈nydït we dui, ku duökï piɔ̈ɔ̈th ee bäp të cï Yen we jɔ̈ɔ̈ny në kë cäk wööc.

⁶ Bɛ̈nydït ee meth ëbɛ̈n rïc ku nyuth luɔi nhiɛɛr En en, ku ee meth ëbɛ̈n dui ku nyuth en luɔi yen mɛnhde ëyic.”

⁷ Yak duide guum Yen Nhialic, ee wo wɛ̈ɛ̈t cït mïthke, ee mɛnhou duëër tɔ̈u ke cïï wun ee dui ku bï wëët?

⁸ Na cïï week ee dui cït man ë kë ye luöi mïth ëbɛ̈n, ke we cie mïth dïïlke, wek duëër aa dhiëthlëër.

⁹ Wärkuɔn ke piny nɔm ayek wo dui në dui rac ku ŋootku ke ke riëëuku, ku cïï ŋuän duëërku Wäärdan ë wëikuɔ riëëu ku buk pïïr!

¹⁰ Wärkuɔn ke piny nɔm ayek wo duöi kakɛn cïk tïŋ ke ke piɛth ë kepiɔ̈ɔ̈th në ee kaam thiinë. Ku Nhialic ee wo duöi këde piathda, agoku piɔ̈ɔ̈th ɣɛɛr cït man ë Yen.

¹¹ Të cïï wo dui në ee kaam thiin manë guöp, wok ee piɔ̈ɔ̈th jiɛth në arɛɛm, ku na miäk ke kɔc ë cï piɔ̈ɔ̈th kɔn jiɛth në dui ë Bɛ̈nydït, ayek luɔk në mïth ke piathëpiɔ̈u ku mät në kë ë wëët ë keek.

Wëët ku Yöök

¹² Ka week riɛɛtkï wepiɔ̈ɔ̈th piny mïthëkɔckuɔ, yak cinkuön cï lɔ läuläu ku miɔɔlkuön cï nuëŋ rïc.

¹³ Ku yak kueer lɔ loulou cak në wecök ke ŋɔl cï rɔt bï yal wei kueer, aŋuɛ̈ɛ̈n luɔi bï ŋɔl waar ku deem.

¹⁴ Yïn wekë kɔc rɛ̈ɛ̈r wek ëtök, yak them në luɔi bä wek aa rëër në rëër ɣeric ku mät. Na kɛ̈nkï wepiɔ̈ɔ̈th tɔ ɣer ke we cïï Bɛ̈nydït bï tïŋ.

¹⁵ Yak yïn ke cïn raan töŋdun bï löny ku cïï dhuëëŋ de Nhialic piɔ̈u bï yök, tiir tök ee tiir riɔ̈ɔ̈k, yen ya wek cök ë wɔi wek röt apiɛth ke cïn mei de kɛcëpiɔ̈u bï cil në weyiic ku tɔ kɔc juëc lɔ në këracic

¹⁶ Ku yak röt tiit në kɔc cïn gup athɛɛk ku dhööm ku kɔc cïn piɔ̈ɔ̈th gäm cït man ë Ethau. Ku tiëŋkï! Duëër raan dïtdɛn yen kɛ̈i gam kekë athiɛɛidɛn bï bɛ̈n, cït man ë lupɔ, në aduŋ töŋ de këcam?

¹⁷ Ku week aŋiɛckï ëgɔk, wään ciëën jɔ yen e kɔɔr luɔi puk en athiɛɛide nɔm tëde wun, ke yök ke cï thök ë jöt acïn kueer be yen kë cï looi lëu, na cak bɛ dhiau në dhiën de yic puŋëpiɔ̈u ka cï guɔ jäl.

¹⁸ Wek kën bɛ̈n cït man ë kɔc ke Yithriɛl, ɣɔn bïï keek jääm ë kuur ë Thinai lɔ̈ɔ̈m, kuur woi ku aduëër ë jak, aa dɛ̈p në mac ku bïï mɔ̈ɔ̈th ku tɔ piny col

¹⁹ Ku röl ë kaaŋ dhiau aläl, ku röl ë jam piŋic acï riɔ̈ɔ̈c bɛ̈n bɛ̈ɛ̈i, go kɔc ë piŋ en lueel an, “Ë jɔ loi ë cïï be jam.”

²⁰ Akënkï yöök guum, ɣɔn yöök ë keek an, “Acakaa keek ku läiken ku lek kuur jak, abï ke biɔ̈ɔ̈k abïk thou.”

²¹ Ku kë woi loi rɔt në kuur nɔmë, aye këdïït ë gäi riɔ̈ɔ̈cë, man abï Mothe jɔ lueel ë yethok an, “Yɛn aa cï riɔ̈ɔ̈c ku lɛthë yɛn!”

²² Ënɔɔnë we cï bɛ̈n paannhial në kuur ë Dhiɔn nɔm, Jeruthalem pänydït de Nhialic pïïr, kekë aguum ke tuucnhial loi miɛtëpiɔ̈u.

²³ Ku ëtɛ̈ɛ̈n we bï ɣön ë Nhialic pïïr yök të ye amatnɔm de Nhialic yenɔm mat thïn, ke ke nöm athiɛɛi de Nhialic cït mïth kɛ̈i, kɔc cï gɔ̈ɔ̈r rin paannhial ku yek Nhialic töŋë lam, Bɛ̈nydït ee löŋ ë kɔc kën gam guïïr kedhie. Ku nu wëi ke kɔc ɣer piɔ̈ɔ̈th ë cï thou acï ke bɛ tɔ dikëdik.

²⁴ Ku yïn bï Yecu yök raan ee kɔc määt në löŋ cï piac mac, ku lëu cï Ye lɛ̈u riɛm, aluel kë ŋuän wär riɛm de Abel.

²⁵ Ënɔɔnë yak röt jɔ tiit ke we cïï bï jäi të jiëëm ë Nhialic week. Na kën kɔc wään piŋ rölde, ɣɔn jiëëm En keek ë Mothe thok ë piny nɔm eenë poth taitai! Yak tak duɛ̈ɛ̈rkï poth të rɛɛc wek Yecu raan jiëëm week paannhial!

²⁶ Të ɣɔn kɔn ë Nhialic jam në jamdɛn tueŋ, rölde yetök ë piny bɛ̈n nieeŋ. Ku ënɔɔnë acï lueel luɔi bï Yen piny nyɔk ë niëŋ nieeŋ En en, ayï ka nu nhial ayadäŋ.

²⁷ Ku kë lueel e jamde niëŋ bï rɔt nyɔk anyooth luɔi bï ka cï cak nieeŋ ku nyiɛɛi yë ke, ago ka cïï duëër ë nieeŋ döŋ.

²⁸ Jɔku Bɛ̈nydït leec në luɔi cï Yen wo gäm ciɛɛŋ cïï duëër ë nieeŋ. Yok Nhialic tiiŋ piɔ̈u në läm ye wok e lam ku luuiku, ku lecku, yok riɔ̈ɔ̈c ku rïïuku.

²⁹ Ku Yen, Nhialinyda acït many ee käŋ thöl, tëde kɔc reec gäm