Ɣeberuu 11 - JAM DE NHIALIC 2011

Gäm

¹ Gäm de yic aŋäth ë tiët ë kë bï rɔt dhil looi, ku nɔ̈m de kë kën ë kɔn tïŋ aye yic.

² Yen gäm yen aa tɔ kɔc ɣɔn thɛɛr yök rin piɛth ë Nhialic nɔm.

³ Në biäk de gämdan de yic aŋäth, ayok ŋic luɔi ë ciɛk ë piny në jam ë ye Nhialic lueel ë Yethok, ku ŋicku ayadäŋ nɔn ë ciɛk ë ka woi në ka liu.

⁴ Në biäk de Abel nɔm gäm de yic aŋäth, go Nhialic miɔɔc në miɔ̈c ŋuän awär miɔ̈c ë Kain. Abel acï Nhialic bɛ̈n gam kekë miɔ̈cde, ku gämde aŋoot ke cɔɔl rinke, na cakaa nɔn cïï yen thouwë.

⁵ Eenok ade nɔm gäm de yic aŋäth, ye ka kën en thuɔɔu thiëëpë. Aa leerë Nhialic të nu Yen thïn, aa lɔ cut piny acïn raan cï ye yök, në luɔi cï Nhialic ye jat nhial. Acï Awerek de Nhialic lueel, an ɣɔn kën ë yen kɔn lɛɛr nhial, aa cï Nhialic tɔ mit piɔ̈u.

⁶ Të cïn en gäm, acïn kë duëër ë raan Nhialic tɔ mit piɔ̈u, ku raan ëbɛ̈n raan ee bɛ̈n tëde Nhialic bï bɛ̈n lam, abï kɔn gam luɔi nu Yen, ku bïï ke gäm athiɛɛi kek kɔc kɔɔr En.

⁷ Aye gäm de yic aŋäth yen aa tɔ Nowa piŋ yöök de Nhialic, ɣɔn yöök En keek në biäk de ka bï tïc wadäŋ ka cïï woi. Ago löŋ cï Nhialic lueel riëëu, ku cuëëc abël kony en rɔt kekë dhiënde. Në biäk kën kɔc ke piny nɔm jam ë Nowa piŋ, piny acï bɛ̈n cieen nɔm, ku Nowa acï piathëpiɔ̈u bɛ̈n yök tëde Nhialic në gäm.

⁸ Aye gäm de yic aŋäth yen aa tɔ Abraɣam riëëu cɔ̈t cï Nhialic ye cɔ̈ɔ̈l bei wunden, ku leer wun cïï Nhialic lɛ̈k en an bï gäm en. Ago bɛ̈n jäl ku nyiëëŋ wunden piny ke kuc të le yen thïn.

⁹ Në gäm de yic aŋäth yen aa tɔ ye rɛ̈ɛ̈r wun cïï Nhialic gäm en ke cït kaman. Aake ye rëër ë pɛɛnyiic ayï Yithaak ku Jakop kɔc wään cïï Nhialic ke bɛ̈n ŋoot ë ke gëm ee thönë.

¹⁰ Abraɣam aa tit jäl le yen wun nu paannhial kɛ̈ɛ̈c ë këërkëërde aril aɣet athɛɛr. Wun ë keer Nhialic yic ku yïk.

¹¹ Gäm de yic aŋäth acï Thara, tiiŋ Abraɣam, yiëk riɛl bï yen meth yök, ago wënde bɛ̈n dhiëëth. Cakaa ɣɔn cï runke, run ke dhiëth lïïr nïïm, ke luɔi cï yen Nhialic gam ɣɔn cï Yen e lɛ̈k en biäk bï yen rɔt dhil looi.

¹² Ku ëtɛ̈ɛ̈n në mony tökic, Abraɣam, ke cït kë cï thou në biäk ë cïn en riɛl bï yen mïth yök, acïï mïth juëc bɛ̈n bei në yeguöp, mïth cït ë kuënden kuɛl nhial ku cïtkï liɛɛt ë wɛ̈ɛ̈r yɔu cïï lëu në kuɛ̈n.

¹³ Ku kek ë kɔckë aake ŋoot ë gämic, gäm de yic aŋäth ɣɔn thou kek. Cakaa nɔn kën kek kë cï kɔn lɛ̈k keek yök, ke keek amitkï piɔ̈ɔ̈th në luɔi ëye kek ee kakë tïŋ tëmec në nyin ë gäm. Ku gamkï luɔi ë ye kek kamaan lɛɛn ë këny ee pinyë nɔm.

¹⁴ Na cïï kɔc jɔ lueel aya, ka cï jɔ ya yic, luɔi kɔɔr kek wun bïï cɔ̈l keek.

¹⁵ Na ë ke jam në kë de wundɛn ɣɔn cïk kɔn nyääŋ piny, adï cïk röt guɔ dak thïn.

¹⁶ Aake tit të tueŋ, wun ŋuän cï kiëët paannhial, yen kë cïï Nhialic ë yäär ka, të cɔɔl kek En ke Ye Nhialinyden.

¹⁷ Aa ye gäm de yic aŋäth, yen aa gɛm Abraɣam wëndɛn Yithaak ke ye miɔ̈c nɛ̈k Nhialic në thëm ë them En en.

¹⁸ Ku Abraɣam yen aa cïï Nhialic löŋ mac në biäk ë wënde an, “Ee Yithaak yen abän yïn thieei në mïth juëc, ku ee yen duëër En Yithaak bɛ gam ke ye miɔ̈c.”

¹⁹ Aŋɛ̈ɛ̈th Abraɣam luɔi bï Nhialic Yithaak dhil jat nhial të ciɛk en e nɔ̈k, cït man cïï Awerek de Nhialic e lueel an, acï bɛ̈n pɔ̈k nɔm wënde ke pïïr

²⁰ Ee gäm de yic aŋäth yen athiɛɛi Yithaak Jakop kekë Ethau në ka bï bɛ̈n.

²¹ Të wään ciëën cï Jakop thiɔ̈k ke thuɔɔu, ee gäm de yic aŋäth yen atɔ yen jɔt rɔt ë biöökic ku gut piny në thienyde, lɛm Nhialic ku thieei mïth ke Jothep ëtök ëtök.

²² Wään cï Jothep thiɔ̈k ke thuɔɔu, ee gäm de yic aŋäth yen atɔ yen ŋic luɔi bï Nhialic kɔc ke Yithriɛl wɛ̈t bei paan ë Rip. Ago thɔ̈n ke an bïk yomke luath në keek ëtök

²³ Ee gäm de yic aŋäth yen aa tɔ baaide yï Mothe thian en në pɛ̈i kadiäk ɣɔn piɛc ëye dhiëëth, në biäk cï kek e tïŋ ke ye mɛnh läk, ku cïkï riɔ̈c në löŋ cï melik de paan ë Rip tääu piny në këde nääk ë mïthwät kor.

²⁴ Aye gäm de yic aŋäth yen aa jiɛi ë Mothe wään cï yen dït an cï bï bɛ ya cɔɔl ke ye wën ë nyan ë melik.

²⁵ Aa lɔc luɔi bï yen yaaŋ guum ëtök kekë kɔc ke Nhialic, ku pɛ̈l miɛtëpiɔ̈u de luɔi de kërac cï bï tɔ̈u aɣet athɛɛr.

²⁶ Aa ŋic ë Mothe an wëu juëc kuöt nïïm paan ë Rip, acïkï piath de ka buk yök në guöm gum wok në kɔc ke Nhialic ëtök bï wöör, në biäk de Kërtho, aa ŋäth ariöp ŋuän nu tëde Nhialic.

²⁷ Në biäk de gäm de yic aŋäth, Mothe paan ë Rip bɛ̈n nyääŋ piny, ku cï riɔ̈c në agönh ë melik, aaye Nhialic ŋɔ̈ɔ̈th Raan kën tïŋ guöp.

²⁸ Gäm de yic aŋäth yen atɔ Mothe loi Dhuëëŋ de winythok, ago lɛ̈k keek an bïk rim wiɛ̈ɛ̈th në ɣöötken thook ke riäŋ bï tunynhial bɛ̈ɛ̈i cïï mïth kɛ̈i ke Yithriɛl bï nɔ̈k piny de Rip.

²⁹ Aa ye gäm de yic aŋäth yen aa tɔ kɔc ke Yithriɛl tem Wɛ̈ɛ̈r Thith kɔ̈u ke ye tëril ciɛth kek, na wën aa them kɔc ke Rip en, ke ke jɔ pïïu guɔ mät nïïm ku moukï kedhie.

³⁰ Aa ye gäm de yic aŋäth yen aa kën ë Raɣap akɔɔrröör nɔ̈k kekë kɔc ke Jeriko ɣɔn reec Nhialic gam, ɣɔn tɔ yen nëëm ke Yithriɛl ee kamaan ɣönde, aɣet të bï kek röt puk apiɛth ke cïn tɔŋ cï ke yök.

³¹ Aa ye gäm de yic aŋäth yen aa tɔ pɛ̈ɛ̈ny ke Jeriko wiëëk të ɣɔn wil ë kɔc ke Yithriɛl ke kɔ̈ɔ̈th në nïn kadhorou.

³² Duɛ̈ɛ̈r ŋoot ke ya lɔ tueŋ? Acïn kaam dïït nu bän jam në këde Gidiɔn, Barak, Thamthon, Japetha, Debid, Thamwɛl, ku tït ke Nhialic.

³³ Gämdɛn de yic aŋäth yen aa tɔ kɔc kɔ̈k në keyiic thäär ë wuöt, abïk tɔɔŋ ke meliik tiaam, ku loikï löŋ lɔ wai ee löŋ ŋiëc tiiŋic. Gokï ka cï Nhialic kɔn lɛ̈k keek yök, në biäk de gäm de yic aŋäth acïk kɔ̈ɔ̈r bɛ̈n dɔm thook.

³⁴ Keek acïk bɛ̈n poth në manydïït ajaŋjaŋic, ku acïk poth abätɛ̈ɛ̈u ë kɔc ke ater thook. Aake kɔ̈c, ku acïk bɛ̈n riɛl në tɔŋic, ku yen aa tiɛɛm kek kɔc lei.

³⁵ Ee kueer ë gäm de yic aŋäth yen aa tɔ diëër kɔ̈k tɔ pukë nïïm kɔc nhiaarkï, ɣɔn cï kɔn thou ku be ë ke tɔ pïïr. Kɔc kɔ̈k ë keek aake jiëi nɔmlääu agokï thou, kɔ̈k aake luc në ɣööt ke dömiic, në luɔi bï kek këpiɛth yök në kööl ë jön ë rɔt bï kɔc bɛ pïïr në pïïr piɛth cïï kɔ̈u bï tɛɛm.

³⁶ Kɔc kɔ̈k aake ye dɔl gup ku duike në wɛt, ku ye kɔ̈k duöt në ɣööt ke dömiic.

³⁷ Ku ye ke biɔ̈ɔ̈k në kur ku temë kakë kɔ̈ɔ̈th në rou, aake ye nɔ̈k në abätɛ̈ɛ̈u, aake rɛ̈ɛ̈r ke ke kuanynyïïn ku acïn kë ceŋkï ë kekɔ̈ɔ̈th, ee biɔŋ ke thök bɔɔth ku amɛ̈l kek aa ceŋkï, aake ye yɔŋ ku kucë ke luööi.

³⁸ Piny aacïï rɔ̈ŋ kekë ee kɔc piɛthkë! Aake ye tai në jɔ̈ɔ̈riic ku kur nïïm ku yek rëër në kɔ̈kiic ku puɔ̈liic piny, aake cït kamaan.

³⁹ Kɔckë kedhie acïn kë cïk yök në ka cï Nhialic kɔn lɛ̈k keek, kë ëyökï ee rin piɛth në biäk de gämdɛn de yic aŋäth.

⁴⁰ Kënë ayadäŋ ee luɔi cïï Nhialic täŋdɛn piɛth tak në këda, acïï kɔɔr Yen Nhialic luɔi bï kek ariöp de gämden guɔ yök ke wo liu thïn, ee luɔi bï yen wo tɔ dikëdik në kony de wëi Yecu Kërtho.