Ɣeberuu 10 - JAM DE NHIALIC 2011

Kërtho acï Rɔt Gam Raantök Näk në këde Kɔc Kedhie

¹ Läm ye Judai lam në kueer ë löŋ thɛɛr, acie läm de yic yic, yen, aa tïm de kapiɛth bï Kërtho bɛ̈ɛ̈i, kɔc ee Nhialic lɔ̈ŋ në kueer ë ka ye nɔ̈k në ruöön thok ëbɛ̈n, acïï ke bï kɔn ɣɛɛt të bï kek piɔ̈ɔ̈th dikëdik.

² Ku na ye ka gɛmë awɛ̈ɛ̈c ke kɔc nyaai, kɔc ee Nhialic lam në ye kueerë, adï cïn awänydɛn ye kek bɛ diɛɛr, ku ka ye nɔ̈k ëbɛ̈n në biäk de karɛc ke kɔc aduëërkï kɔ̈ɔ̈c.

³ Yen täude ka, luɔi ye ka gɛmë, kanäk ë ruöön thok ëbɛ̈n ago keek aa täk nïïm në luɔi rëër ë kërac ë kɔc yiic.

⁴ Në biäk kënë rim ke miöör ku thök bɔɔth karɛc ke kɔc nyaai.

⁵ Yen aa lueel ë Kërtho en, ɣɔn bïï Yen ë piny nɔm, go lɛ̈k Nhialic an, “Ka gɛmë ka näk acie kek kɔɔr, ku yen, ee guöp yen aa gämë Yɛn bän aa raan bï ya miɔ̈c näk.

⁶ Yïn cïï piɔ̈u duëër kɔn miɛt në gɛm de miɔ̈c ye nyop ëbɛ̈n, ku gɛm de miɔ̈c de kërac.

⁷ Go Kërtho lueel, an, “Ku ënɔɔnë Yïn Nhialinydï, Yɛn aa bɔ̈ bä kë de piɔ̈ndu bɛ̈n looi, cït man cï Awerek ë Nhialic e lueel.”

⁸ Löŋ awëët luɔi bï ka gɛmë dhil aa nɔ̈k, në biäk de miɔ̈c näk, ku miɔ̈c ye nyop ëbɛ̈n, ku miɔ̈c de kërac, ku yen yak takic da, eeŋö ye Kërtho tɔ luel ë kakë an cïï Nhialic ke kɔɔr?

⁹ Apiɛth piɛŋkï, aa kɔɔr nyiɛɛi luɔi de ka gɛmë ka näk ku tɛ̈ɛ̈u rɔt ë nyindenic yen kë ë lëk Nhialic ka, an, “Yɛn aa bɔ̈ bä këde piɔ̈ndu bɛ̈n looi.”

¹⁰ Ënɔɔnë yen kë tɔ wo piɛthpiɔ̈ɔ̈th ka, në biäk cï Kërtho Nhialic riëëu ku gɛm rɔt raantök në këde kɔc kedhie.

¹¹ Bäny ke kake Nhialic luɔiden akööl nyïïn kedhie, ayek tɔ̈u ke ke näk ka gɛmë ka cïï karɛc duëër kɔn nyaai ananden.

¹² Ku Kërtho ë rɔt gam ke ye miɔ̈c lɔgɔk näk në biäk de karɛckuɔ. Ku ënɔɔnthiinë, arɛ̈ɛ̈r ë ciin cuëny ë Nhialic aɣet athɛɛr.

¹³ Ku abï tïït ëtɛ̈ɛ̈n agut të bï Yen kɔc ke aterde tɔ ye ka Yen ke yecök dhɔ̈ɔ̈r.

¹⁴ Näŋ töŋdɛn cï Yen rɔt tɔ näk, ë kɔc tɔ piɛthpiɔ̈ɔ̈th aɣet athɛɛr, kɔc cï päl karɛcken.

¹⁵ Kënë acïï Wëidït ɣer jam thïn ayadäŋ në Awerek de Nhialic yic lëk wook an,

¹⁶ “Të le thaar bɛ̈n yɛn bï löŋ mac wokë keek, ku lööŋkï abä ke tääu ë kenïïm ku gäär keek ë kepiɔ̈ɔ̈th.”

¹⁷ Ago nyɔk ë lueel en En an, “Yɛn bï piɔ̈u kok në awɛ̈ɛ̈ckɛn cïk looi, ku cä yanɔm bï bɛ tak në karɛcken.”

¹⁸ Të cï karɛc päl yïn, ke ka gɛmë ke ke ye miɔ̈c de kërac acïkï röt bï bɛ kɔɔr tëde yïn.

Cɔ̈t në këde guöm bï yïn yïpiɔ̈u muk

¹⁹ Ku ënɔɔnë mïthëkɔckuɔ, wok cï nïïm lääu në lɔ le wok në Nhialic lɔ̈ɔ̈m, ku kënë acït lɔ le wok Tëɣeric aläl në riɛm de Kërtho.

²⁰ Ee kueer ë pïïr cï piac gɔl yen aa liëpë thok wook, ku ɣeet wook në Nhialic lɔ̈ɔ̈m në thon cï Yen thou guöpde.

²¹ Ku ënɔn cïï wo jɔ dɛ Bɛ̈nydïït ë kake Nhialic nu ë ɣön ë Nhialic nɔm.

²² Jɔku lɔ në Nhialic lɔ̈ɔ̈m në piɔ̈n cïnic ruëëny, ku lokku në gäm adöt cï we waak piɔ̈ɔ̈th abuk piɔ̈ɔ̈th lɔ wai ke cïn kërɛɛc ŋïcku röt në täŋda yic ëbɛ̈n ku cï wook juɔɔl në pïïu lɔ top.

²³ Yak kɔ̈ɔ̈c aril mïthëkɔckuɔ ke wo cïï lɔ ciëën në aŋäth cï wok Yecu gam, në luɔi ye Nhialic, Raan ë lëk wook aŋäthë, ee Raan adöt.

²⁴ Thɛmkï ŋɛk ëye ŋɛk riit piɔ̈u, yak rɔm ëtök yok nhiëërda nyuɔɔth ku luɔi piɛth.

²⁵ Duökï ee mɔ̈l ëbɛ̈n tëde läm, cït man ye kɔc kɔ̈k e looi, ë ŋɛk ë ye ŋɛk riit piɔ̈u në luɔi cïï akööl ke bɛ̈n ë Bɛ̈nydït Kërtho ɣëët tëthiɔ̈k.

²⁶ Të looi wok kërac në reec reec wok En adɛɛi wok, ke wo cï ŋïny de yic kɔn yök, ka cïn kë cï bɛ döŋ, kë näk bïï ë karɛckuɔ nyaai.

²⁷ Kë cï döŋ bïk tiit ee riɔ̈ɔ̈c bï bɛ̈n ë kööl ë guiëër ë löŋ ku tuöc ë manydïït bï kɔc ee teer ë Nhialic nyop!

²⁸ Raan cï löŋ de Mothe dhoŋ kɔ̈u ke ŋic kɔc kaarou ku nɔn ye kek diäk nu thïn, aye nɔ̈k të cïn kok de piɔ̈u.

²⁹ Në täŋdunic, duëër aa këtuc dïït cït ŋö, yen kuöm bï röŋ ke raan bï Wën ë Nhialic dhɔɔt guöp? Në reec reec yen En, ku kɛ̈c në yecök, ku ee riɛm de löŋ cï piɛc mac bï yen tɔ piɛthpiɔ̈u tɔ cïn naamde, ku ye Wëidït ɣer ke dhuëëŋdepiɔ̈u läät ë lɛ̈ɛ̈t rac.

³⁰ Cït man ŋic wok Bɛ̈nydït raan ë luel en an, “Guur ee këdï, abä cool nɔm,” ku ŋicku Bɛ̈nydït raan ë luel en ayadäŋ an, “Bɛ̈nydït abï löŋ de kɔcke guiir.”

³¹ Amawoou në raan bï lööny ë Nhialic pïïr cin.

³² Duökï nïïm mär anandun në akööl cï tëëk, akööl wään bïï ë ɣɛɛr de gäm cä wek Kërtho gam, wek aa cï kajuëc guum, ku ateer tuc thook akënkï we tiaam.

³³ Ku wään ye we läät ku minë we në kɔc nïïm kedhie në biäkë ku biäkë, kɔc cï luöi katuc thook, wek e gum në keek ëtök.

³⁴ Wek aye kɔc cï mac kuɔny ku wek cïï piɔ̈ɔ̈th ee jiɛth të cïï kakun jɔt, në ŋïny ŋiɛc wek en të le wek lɔ paannhial, wek de nïïm kajuëc cïn kë bï ke jɔt ëtɛ̈ɛ̈n.

³⁵ Duökï riët ya wek wepiɔ̈ɔ̈th riit në aŋäthdunic päl, këriëëc ëbɛ̈n abï cuöl week.

³⁶ Yak wepiɔ̈ɔ̈th muk, aguɔkï këde piɔ̈n ë Nhialic aa looi ku bäk ka cï kɔn lɛ̈k week yök.

³⁷ Cït man ye Këcïgɔ̈ɔ̈r ye lueel an, “Në ee thaar thiin bɔ̈yë abï Kërtho bɛ̈n, acï bï gääu.

³⁸ Kɔckiën cï tɔ ye kɔc piɛthpiɔ̈ɔ̈th në gäm, abïk pïïr në gäm. Ku kɔc lɔ dɔk ciëën Yɛn cïï piɔ̈u bï miɛt wo keek.”

³⁹ Wook ënɔɔnë, wok cie kɔc ee röt dak ciëën wën ee röt lɔ ɣääl ë riääkic, wok ee kɔc ke gäm wën ee röt lɛɛr ë kuɔɔnyic.