Ɣeberuu 1 - JAM DE NHIALIC 2011

Jam de Nhialic ë Wënde

¹ Ɣɔn thɛɛr, tït ke Nhialic acïk jam de Nhialic lɛ̈k kuarkuɔ, në run juëc në kuɛɛr kithiic.

² Ku ee nɔn ciëënë, Nhialic acï jam ke wook në Wëndɛn cï lɔc bï käŋ lɔ̈ɔ̈k lak kedhie. Ku ee Yen ë ciɛk ë Nhialic piny.

³ Ku Wën ë Nhialic Yen aa nyooth dhuëëŋ de Nhialic. Ku Yen athöŋ guöp ke Nhialic. Ku ye këriëëc de piny nɔm döt ëbɛ̈n në jamdɛn ril ë tör. Të wään cï Yen karɛc ke mɛnh ë Raan ëbɛ̈n waak wei, ke jɔ nyuc paannhial në ciin cuëny de Nhialic Awärjäŋ.

Wën ë Nhialic Awär Tuucnhial

⁴ Ku Wën ë Nhialic acï tɔ wär tuucnhial aläl, cït man wɛ̈ɛ̈r ë rinke rinken aya.

⁵ Acïn tunynhial töŋ cïï Nhialic kɔn yɔ̈ɔ̈k an, “Yïn ee Wëndï, ee köölë Yɛn cï ya Wuur.” Ku akën kɔn lueel aya an, “Yɛn bï ya Wun, Ku Yen abï ya Wëndï.”

⁶ Ɣɔn tuuc ë Nhialic wën kɛ̈ide ë piny nɔm, ke jɔ lueel an, “Ë lɛm ë tuucnhial kedhie.”

⁷ Ku lueel në biäk de tuucnhial an, “Yɛn cï tuucnhialkï tɔ piɔl cït yom, ku ta ke piɔl cït liem de mac.”

⁸ Ku acï Nhialic lueel në biäk de Wënde an, “Yïn ee Nhialic, Yïn bï rëër ë thöönydu nɔm ke Yï ye melik aɣet athɛɛr! Yïn bï kɔcku cieŋ në löŋ yic.

⁹ Yïn nhiaar piathëpiɔ̈u, ku man kërac. Yen kë ë lɔc Nhialic Yïn ka, Yen Nhialinydu, ku tɔc Yïn në miök ë dhuëëŋ de miɛt ë piɔ̈u, ku tɛ̈ɛ̈u Yïn tueŋ awär kɔc tɔ̈u në Yïn.”

¹⁰ Ku lueel ayadäŋ an, “Ku Yïn Bɛ̈nydït, ɣɔn thɛɛr gɔl ë käŋ, Yïn cï piny tɔ kääc në mëënke nïïm, ku tënhial ee luɔi de Yïciin.

¹¹ Ku keek kedhie abïk dhiap cï lupɔ, ku mɛ̈ɛ̈rkï, ku Yïn bï tɔ̈u aɣet athɛɛr.

¹² Ku tënhial kekë piny abä ke doliic cït man ë biöök, ka bïk röt waar. Ku Yïn ŋoot ke Yï tɔ̈u ee täuduönë, ku runku acïkï kɔ̈ɔ̈th bï tɛɛm.”

¹³ Acïn tunynhial cïï Nhialic kɔn yɔ̈ɔ̈k an, “Nyuc ë ciin cuënydï, aɣet të bän kɔckuön ke ater tɔ ye ka Yïn ke Yïcök dhɔ̈ɔ̈r.”

¹⁴ Tuucnhial cïkï ee wëi cï tuööc, bïk kɔc bï kuny de wëi lɔ̈ɔ̈k lak aa luööi?