Galatai 5 - JAM DE NHIALIC 2011

Muk Nɔmlääudu

¹ Cäth bï wok aa cath ë nɔm lääu, en aa lony Kërtho wook! Yen kääc wek thïn aril, ku duökï weyiëth be tɔ rek, abäk aa lïïm.

² Wɔikï da! Wek lɛ̈k, yɛn Paulo an, të bï we cueel, ke Kërtho acïn piathdɛn bï nu tëde week.

³ Yeka, yɛn ee cäätɔ lɛ̈k raan ë rɔt tɔ cuel ëbɛ̈n an, luɔi bï en löŋ aa looi ëbɛ̈n anu ë yeyeth.

⁴ Kërtho acï tɔ cïn naamde tëde week, wek kɔc kɔɔr luɔi bï we tɔ piɛthpiɔ̈ɔ̈th në löŋ, week wedhie, wek cï lööny wei ë dhuëëŋdepiɔ̈u yic.

⁵ Ku wook, aŋäth ë piathëpiɔ̈u wën bɔ̈ në gäm en ayok tiit në Wëidït.

⁶ Ku në Kërtho Yecu yic cuɛ̈l acïn naamde ayï luɔi kënë raan cueel, ee gäm lui në nhiëër en ade nɔm.

⁷ Wek aake ye riŋ apiɛth, eeŋa ë we pɛ̈n pïŋ piɛŋ wek yic?

⁸ Wëŋ cï we wëŋ acïï bɔ̈ tëde raan ë cɔl week.

⁹ Luɔu thiinakäŋ ee amiɛɛn dït tɔ piɔ̈ɔ̈r ëbɛ̈n.

¹⁰ Yɛn ŋäth Bɛ̈nydït në këdun ke cïn löŋ däŋ bäk dɔm: ku raan ë we tɔ diɛɛr ë wël abï këde yök ë yenhde, acakaa yen ë ye raan yïndï.

¹¹ Ku yɛn, mïthëkɔckuɔ, të ŋuɔɔt ɛn ke ya guiir jam de cuɛ̈l, ke yeŋö ŋuɔɔt ɛn ke ya yɔŋ kɔc? Yen adï cï nyaai, yen kɔ̈th ee kɔc kɔ̈th ë tim cï rïïu nɔm.

¹² Yɛn duëër piɔ̈u miɛt të cï kɔc ë we tɔ diɛɛr ë wël röt tɛɛm wei.

¹³ Ee cäth bä wek aa cath ë nɔm lääu yen aa cɔɔl ë week, wek mïthëkɔckuɔ, ku cäth aa wek cath ë nɔm lääu duökï ye kuöc dɔm, takï ye kë de luɔi de guöp, ku yak röt luööi cït man ë lïïm, në nhiëër aa wek röt nhiaar.

¹⁴ Löŋ ëbɛ̈n aye tiiŋic ë jam tök, jam ee lueel alëyɔ̈ɔ̈ an, “Yïn bï raan rëër ke yïn aa nhiaar cït man nhiɛɛr yïn rɔt.”

¹⁵ Ku të ya wek röt kääc, ku yak röt cam, tiɛɛtkï röt ke we cïï röt bï thöl wapäc.

Wëidït ku Täu de Raan

¹⁶ Ku aluɛɛl alëyɔ̈ɔ̈ an, cathkï në Wëidït yiic, ke we cïï ka kɔɔr guöp bï aa looi.

¹⁷ Guöp ee tɔŋ cam kekë Wëi, ku ye Wëi tɔŋ cam në guöp, ku kake ayek gɔ̈m kapäc, ku wek cïï ka kaarkï ë wepiɔ̈ɔ̈th duëër aa looi.

¹⁸ Ku të ye we thel ë Wëi, ke we cie tɔ̈u ë löŋic.

¹⁹ Ku luɔi de guöp aye tïc ëgɔk, kek kï, kɔ̈ɔ̈r ë diäär, luɔi col, dhööm,

²⁰ läm de yiëth, athuɛ̈ɛ̈th, män mɛɛnë kɔc röt, ateer, tiɛɛl, agööth, ateer ke dït, tëŋ ee kɔc keyiic tek, döm de wëët rac,

²¹ wui de kalei, näŋ de kɔc, wïn ee kɔc wit ë mɔ̈u, thuëëc de yic kërac, ku ka kɔ̈k cït ee kakë, ka ke guöp ka: ku akɛ̈n lɛ̈k week ënɔɔnë në këde kakë, acït man cän e kɔn lɛ̈k week ɣɔn në këden an, kɔc ee ka cït ee kake looi, acïkï Ciɛɛŋ de Nhialic bï lɔ̈ɔ̈k lak.

²² Ku ka cï luɔk ë Wëidït, kek aye nhiëër, miɛtëpiɔ̈u, mät, guöm de kajuëc, ŋiëc rëër ëmääth, dhuëëŋ, dön ë käŋ,

²³ kuur ë raan rɔt tɔ koor, döm de röt: acïn löŋ de ater në ka cït ee kakë.

²⁴ Ku kɔc wën ë ya kɔc ke Kërtho acïk guöp piäät ë tim cï rïïu nɔm kɔ̈u kekë kak ee guöp kɔɔr ëtök, ayï ŋɔ̈ɔ̈ŋ ë ye dɔm.

²⁵ Të pïïr wok ë Wëi yiic, ke wo ye cath ë Wëi yiic ayadäŋ.

²⁶ Duku lɛc ɣɔ̈ric ë kɔɔr, duku röt ë jut, duku yiic ë dɛ tiɛɛl ë röt.