Galatai 3 - JAM DE NHIALIC 2011

Löŋ ku nɔn ee Gäm

¹ Wek Galatai mum nïïm oou, eeŋa cï we thuëëth, bä wek yic cuö piŋ, wek kɔc cïï Yecu Kërtho tääu ë wenïïm ëdëi, ke ye piäät ë tim cï rïïu nɔm kɔ̈u?

² Ee cöökë yetök en akaar luɔi bän e piŋ tëde week, Cäk Wëidït yök në luɔi de löŋ, ku cäk ke yök në piŋ cä wek e piŋ, aguɔkï gam?

³ Mum mɔ̈ɔ̈m wenïïm ka? Nɔn cä wek gämdun gɔl ë Wëi yiic, kaarkï bäk thöl ë guöpic ënɔɔnë?

⁴ Ee ɣɔ̈ric en ë guööm wek kajuëc cït ee kakë? Ku cie ɣɔ̈ric en ë guöm wek?

⁵ Raan ee week yiɛ̈n Wëidït ënɔɔnë, ku ye luɔi ril looi ë weyiic, ee luɔi de löŋ en ë ye yen e looi, ku ye looi në gäm de kë cï piŋ?

⁶ Acït man cï Abraɣam Nhialic gam, ago tɔ ye piathëpiɔ̈u tëde yen.

⁷ Yen ŋiɛc wek cöökë an, Kɔc ke gäm kek aye mïth ke Abraɣam.

⁸ Ku këcïgɔ̈ɔ̈r, të cï en e kɔn tïŋ nɔn bï Nhialic Juöör tɔ piɛthpiɔ̈ɔ̈th në gäm, ke jɔ wëlpiɛth kɔn guiëër Abraɣam an, “Juöör ëbɛ̈n abï ke thieei në yïn.”

⁹ Ago kɔc ke gäm ago ke guɔ thieei në Abraɣam ëtök, raan ŋic gäm.

¹⁰ Ku kɔc ke luɔi de löŋ kek atɔ̈ukï ë aciɛɛnic kedhie: luɔi cï e gɔ̈ɔ̈r an, “Raan ëbɛ̈n raan cie cool ë döt ka cï gɔ̈ɔ̈r ë awerek de löŋic kedhie, bï keek aa looi, ka cï cieen!”

¹¹ Ku ciën cïn en raan cï tɔ piɛthpiɔ̈u në löŋ ë Nhialic nɔm, yen aye tïc ëgɔk: luɔi cï e gɔ̈ɔ̈r an, “Raan piɛthpiɔ̈u abï pïïr ë gäm.”

¹² Ku löŋ acie këde gäm: ku aye gɔ̈ɔ̈r an, “Raan ë keek looi, yen abï pïïr ë keyiic.”

¹³ Kërtho acï wo wɛ̈ɛ̈r bei ë aciɛɛn ë löŋic, luɔi cï e tɔ ye aciɛɛn në biäkda: luɔi cï e gɔ̈ɔ̈r an, “Raan ëbɛ̈n raan nɔ̈ɔ̈k ë tim nɔm, ka cï cieen.”

¹⁴ Ë luɔi bï athiɛɛi de Abraɣam bɛ̈n ë Juöör gup në Yecu Kërtho, ku luɔi bï wo käŋ yök ka cï kɔn lueel an, bï ke gäm wook, kek aye Wëidït, në gäm gɛ̈m wok.

Löŋ ku Gutguut

¹⁵ Wek mïthëkɔckuɔ, yɛn jam ë jam ë kɔc tei: Löŋ cï mac, acakaa yen ë ye löŋ ë raan tei, të cï e mac ëgɔk, ka cïn raan bï e tɔ cïn naamde, ku acïn raan bï wël kɔ̈k tääu thïn.

¹⁶ Ku ka cï kɔn lueel, an, bï ke gäm en, aye ke lɛ̈k Abraɣam kekë käude. Akën lueel an, Abä ke gäm “kɔ̈th,” cït nɔn juëc kek, ee tök en ë lueel an, abä ke gäm “käudu,” yen aye Kërtho.

¹⁷ Tharde kï yen aluɛɛl an, Löŋ cï mac ɣɔn, löŋ ŋootë Nhialic ke kääc thïn ëgɔk an, ee këde Kërtho, acïï duëërë tɔ cïn naamde në löŋ de Mothe, löŋ cï yiɛ̈n kɔc ë löŋë cök, wën cï en run bot kaŋuan ku thiërdiäk lɛɛr, ku kë cï kɔn lueel an, bï gäm en, acïï löŋ de Mothe duëër tɔ cïn naamde.

¹⁸ Ku kë bï lɔ̈ɔ̈k lak ë kɔc, të bï en në löŋ, ka cïï be aa kë cï kɔn lueel an, bï gam: ku acï Nhialic gäm Abraɣam në luɛɛl cï en e kɔn lueel an, bï gäm en.

¹⁹ Ku löŋ, eeŋödɛn bï looi? Acï tääu thïn në biäk de wäc cï kɔc käŋ wööc, aɣet të bï käu bɛ̈n, käu cï kɔn lueel an, bï gäm en, ku acï ŋiëc guik apiɛth ë tuucnhial, ku jɔ tääu ë raan ë kɔc luk cin.

²⁰ Ku raan ë kɔc luk, acie raan tök en ee luöök, ku Nhialic en aye tök.

Nɔm de Löŋ

²¹ Ku löŋ ënɔɔnë, dekï ater në ka cï Nhialic kɔn lueel an, bï gäm kɔc? Acie yen! Ku të ë de löŋ cï yiɛ̈n kɔc nu, löŋ duëër kɔc tɔ pïïr, ëyic, piathëpiɔ̈u adï cï bɛ̈n tëde löŋ.

²² Ku këcïgɔ̈ɔ̈r acï jäŋ ëbɛ̈n mac ë këracic, luɔi bï kë cï kɔn lueel an, bï yiɛ̈n kɔc, në gäm cï kek Yecu Kërtho gam, luɔi bï e yiɛ̈n kɔc cï gam.

²³ Ku të ŋootë gäm ke kën bɛ̈n, wok cï mac, ku tit wo ë löŋic, wo cï yök ë wo mac aɣet kööl bï gäm bɛ̈n, gäm bï nyuöth kɔc ëlëmiäk.

²⁴ Yen tëde ka, löŋ en aye raan ë wo wɛ̈ɛ̈t cït mïth, leer wook të nu Kërtho, luɔi bï wo tɔ piɛthpiɔ̈ɔ̈th në gäm.

²⁵ Ku ënɔn cï gäm guɔ bɛ̈n, ke wo cïï be aa mïth nu ë raan ë wo wɛ̈ɛ̈t cök.

²⁶ Wek ee wɛ̈ɛ̈t ke Nhialic wedhie në gäm cä wek Kërtho Yecu gam.

²⁷ We wedhie, we kɔc cï baptith ë Kërtho yic, we cï Kërtho tääu ë wekɔ̈ɔ̈th.

²⁸ Judai ayï Girikii aliu ee tënë, ayï lïm ayï raan ë cath ë këde yenhde aliukï ayï moc ayï tik aliukï aya: week wedhie wek ee tök në Kërtho Yecu yic.

²⁹ Ku të ya wek kɔc ke Kërtho, ke wek ee kɔ̈th de Abraɣam, ku yak kɔc bï käŋ lɔ̈ɔ̈k lak, acït man ë kë cï kɔn lueel.