Galatai 2 - JAM DE NHIALIC 2011

Paulo ku Tuuc Kɔ̈k

¹ Na wën, aacï run wan kathiëër ku ŋuan, ke ya be lɔ Jeruthalem wokë Baranaba ëtök, ku wo cath wokë Tito ayadäŋ.

² Ku yɛn ë lɔ në këde nyuuth cï a nyuööth, aguɔ wëlpiɛth lueel ë kenïïm wëlpiɛth aa cool ë guiɛɛr ɛn keek ë Juöör yiic, luɛɛl ë kɔc de naamden nïïm kapäc të cïn kɔc, nɔn bï en yiɛ̈n aa ɣɔ̈ric, yen kë luɔɔi, ayï ka cä looi ɣɔn nɔn ee kek ɣäär yiic ayadäŋ.

³ Ku acakaa Tito akënë dhil tɔ cuel ayadäŋ, ku ye Girikii:

⁴ ee jam de mïthëkɔckuɔn kɔ̈k aluɛth, kɔc cï bɛ̈n thïn ëcuëër, en aa jiɛi wok ë cuɛ̈lde, ayek cäthda bɛ̈n neem, cäth ciɛth wok ë këde yenhda ë Kërtho Yecu yic, luɔi bï kek wo tɔ ye lïïm.

⁵ Ku akënku ke tɔ tiam wook, buk aa rëër ë löŋdenic, acïn thaar tök: luɔi bï yic de wëlpiɛth aa tɔ̈u ke week.

⁶ Ku kɔckë kɔc cï tɔ ye kɔc de naamden, acakaa kek ë ye ŋö, acakaa kek ë dït ku acakaa kek ë kor, akïtkï tëde yɛn: Nhialic acïn raan ee riëëu guöp, kɔckë kɔc cï tɔ ye röördït acïn löŋ däŋ cïk lɛ̈k ɛn.

⁷ Acie yen, ku të cï kek e tïŋ, nɔn cï guiëër tääu ë yaciin guiëër bän wëlpiɛth guiëër kɔc kënë cueel, acït man cï guiëër bï en aŋueel guiëër tääu ë Petero ciin.

⁸ Ku Raan wään ee luui kekë Petero në këde tuöc cï e tuöc aŋueel, yen aaye luui kekë yɛn ayadäŋ në këde Juöör.

⁹ Na wën, të cï kek dhuëëŋ ŋic dhuëëŋ cï gäm ɛn, ke yï Jakop, ku Kepath, ku Jɔn, kɔc cï tɔ ye mëën ke ɣön ë Nhialic, ke ke gɛ̈m wook cin cuëëc ke määth, yɛn wokë Baranaba an, buk lɔ tëde Juöör, ku lekï tëde aŋueel.

¹⁰ Ee cöökë etök tei an, täŋ bï wok kɔc kuanynyïïn aa tak, ku yen ee cöök manë guöp aa ya yɛn cool ë lëthic ë ye.

Paulo Ajäny Petero në Antiokia

¹¹ Na wën, aacï Petero bɛ̈n Antiokia, ke ja jɔ̈ɔ̈ny ë yenɔm, luɔi de yen yeth gääk.

¹² Ɣɔn ŋootë kɔc kɔ̈k ë ke kën bɛ̈n tëde Jakop, aaye cam kekë juöör ëtök: na wën, aacï kɔckë bɛ̈n, ke jɔ enɔm dak ciëën, go rɔt tɔ̈ɔ̈u pei, në riɔ̈ɔ̈c ee yen riɔ̈ɔ̈c ë aŋueel.

¹³ Ago Judai kɔ̈k ayadäŋ luui, ë ruëëny në yen ëtök, arëk abïk Baranaba thɛl wei në ruëënyden aya.

¹⁴ Na wën, aa cä rëërden tïŋ, nɔn cïï en ee rëër piɛth röŋ ke yic de wëlpiɛth, ke ya jɔ Petero yɔ̈ɔ̈k ë kɔc nïïm kedhie an, “Yïn, yïn ee Judai nɔm, ku yïn ee rɛ̈ɛ̈r ë rëër ë Juöör ku cïï rɛ̈ɛ̈r ë rëër ë Judai, eeŋö ee yïn ye kɔɔr bä Juöör dhil tɔ rɛ̈ɛ̈r ë rëër ë Judai?”

Judai ku Juöör Aye ke Kony Wëi në Gäm

¹⁵ Wok kɔc cï dhiëëth ke wo ye Judai, ku wo cie Juöör ë karɛc looi,

¹⁶ aŋicku nɔn kënë raan tɔ piɛthpiɔ̈u në luɔi de löŋ, ee gäm de Yecu Kërtho etök, en ee raan tɔ piɛthpiɔ̈u, ayï wook ayadäŋ, wo ë Yecu Kërtho gam, luɔi bï wo tɔ piɛthpiɔ̈ɔ̈th në gäm cï wo Kërtho gam, ku acie në luɔi de löŋ, në ciën cïn en raan töŋ bï tɔ piɛthpiɔ̈u në luɔi de löŋ.

¹⁷ Ku ënɔɔnë, të kɔɔr wok luɔi bï wo tɔ piɛthpiɔ̈ɔ̈th ë Kërtho yic, ku wook gup, wo cï yök aye kɔc ee kërac looi ayadäŋ, ke Kërtho ee raan ë këde kërac looi? Acie yen!

¹⁸ Ku të cän kake bɛ yïk, ka wään cä ŋaany, ke yɛn ë rɔt tɔ ye raan ë käŋ wööc.

¹⁹ Ku në löŋ yɛn cï guɔ thou në këde löŋ, luɔi bän pïïr në këde Nhialic.

²⁰ Yɛn cï piäät ë tim cï rïïu nɔm kɔ̈u wokë Kërtho ëtök, ku yɛn ŋoot ke ya pïïr, ku acïï be aa yɛn, ee Kërtho en apïïr ë yaguöp. Ku pïïr piëër ɛn ë guöpic ënɔɔnë, ee gäm en a piëër ɛn, gäm aa yɛn Wën ë Nhialic gam, raan ë nhiaar ɛn, ago rɔt gaam në biäkdï.

²¹ Yɛn cïï dhuëëŋ de Nhialic piɔ̈u ee tɔ cïn naamde: ku të bï piathëpiɔ̈u tëde löŋ, ke thon ë thouwë Kërtho ee ɣɔ̈ric!