Galatai 1 - JAM DE NHIALIC 2011

¹ Yɛn Paulo, tuc, ku cä ye tuny ë kɔc, ku acie raan en ee toc ɛn, ee Yecu Kërtho, kekë Nhialic Wääda, Raan ë jɔt en ë kɔc cï thou yiic.

² Yɛn wokë mïthëkɔckuɔn tɔ̈u në yɛn ë tök, awerek en gɛ̈ɛ̈rku ɣööt ke Nhialic ke Galatai.

³ Ë dhuëëŋdepiɔ̈u kekë mät ë ke tɔ̈u në week, në ke bɔ̈ tëde Nhialic Wääda, ku Bɛ̈nydan Yecu Kërtho.

⁴ Raan cï rɔt gaam në biäk de karɛc cuk looi, luɔi bï en wo luök në pinyë nɔm ënɔɔnë, piny rɛɛcë, në këde piɔ̈n ë Nhialic Wäärda.

⁵ Ë dhuëëŋ ë ye tɔ̈u kekë yen aɣet athɛɛr ya. Amiin.

Wëlpiɛth Tök

⁶ Yɛn gäi! Ë kë cä wek röt guɔ rat wei wäkya ë Raan lɔ̈ɔ̈m Raan cï we caal ë dhuëëŋic dhuëëŋ de Kërtho piɔ̈u, lak wëlpiɛth kɔ̈k gam.

⁷ Ku acïn wëlpiɛth kɔ̈k nu, wël yith, ku ade kɔc ë week tɔ diɛɛr ë wël, akɔɔrkï luɔi bï kek wëlpiɛth ke Kërtho puk kɔ̈ɔ̈th.

⁸ Ku na cakaa wook, ku na cakaa tuny bɔ̈ nhial, të de en raan guïïr week wëlpiɛth mɛɛn pei, wël cïï thööŋ ke wël wään guïïrku week, në bï guöp dɛ aciɛɛn!

⁹ Acït man ë kë cuk kɔn lueel wään, abä bɛ nyɔkic, alëyɔ̈ɔ̈, Të de en raan guïïr week wëlpiɛth mɛɛn pei wël cïï thöŋ ke wël wään cäk nööm, në bï guöp dɛ aciɛɛn!

¹⁰ Kaar luɔi bï kɔc piɔ̈ɔ̈th miɛt në yɛn ënɔɔnë, ku ye Nhialic? Kaar luɔi bän kɔc kɔ̈c nyïïn? Tëë ya ŋoot ke ya ye kɔc kɔ̈c nyïïn, adï cä ye lïm de Kërtho.

Kueer ë Ye Paulo Tuc

¹¹ Ku ënɔɔnë, we ta ŋic ee kënë, wek mïthëkɔckuɔ an, Wëlpiɛth cä guiir wään, acïkï ë ka ke raan.

¹² Ku aake cä yök tëde raan, ku kënë ya wɛ̈ɛ̈t aya, ee nyuuth cï Yecu Kërtho a nyuööth tei.

¹³ Wek ë täudï piŋ täudiën aa yɛn tɔ̈u ɣɔn ë Judai yic, läm ee kek Nhialic lam, luɔi aa yɛn ɣön ë Nhialic yɔŋ ë yöŋ rac ëtaiwei, ku riääk:

¹⁴ ku yɛn ë kɔc juëc rïïc wok wöör në läm de Judai, luɔi aa yɛn yic lɛ̈th aläl ka wäär keek në ciɛɛŋ thɛɛr ë kuarkuɔ.

¹⁵ Ku Nhialic, Raan cï a tɔ̈ɔ̈u pei në maar yäc, go ya cɔɔl në dhuëëŋ de yenpiɔ̈u, të cï en piɔ̈u miɛt,

¹⁶ luɔi bï en a nyuöth Wënde ë yapiɔ̈u, ke yɛn bï wëlpiɛth aa guiir ë Juöör yiic, ku ënɔnthiinë yɛn kën löŋ guiir wokë kɔckuɔ:

¹⁷ ku kɛ̈n lɔ Jeruthalem të nu kɔc ë ye tuuc ɣɔn ŋuɔɔt ɛn, ku yɛn ë jäl ke ya lɔ paan de Arab, na wën, ke ya be yanɔm pɔ̈k Damathko.

¹⁸ Na wën, aa cä run lɛɛr kadiäk, ke ya lɔ Jeruthalem kɛ̈ny Petero, aguɔ rëër wo yen ë akööl kathiëër ku dhïc.

¹⁹ Ku acïn tuny däŋ cä tïŋ, ee Jakop etök, mänhë ë Bɛ̈nydït.

²⁰ Ku ka gäär week ënɔɔnë, dï, yɛn cïï lueth tör, aŋic Nhialic.

²¹ Na wën, ke ya lɔ piny de Thiriya ku Kilikia.

²² Ku yɛn ŋoot ke ya kuc guöp ë ɣööt ke Nhialic ke Juda, ɣööt ke Nhialic nu ë Kërtho yic:

²³ acïk këdï piŋ tei an, “Raan wään ee wo yɔŋ, yen aye kɔc guiëër gäm ënɔɔnë, gäm wään ee riɔ̈ɔ̈k!”

²⁴ Agokï Nhialic leec në këdï.