Ɣagai 2 - JAM DE NHIALIC 2011

Läk de Luaŋdït cï Piɛc Yïk

¹ Na ɣɔn, ë ruöön ë rou de melik Dariouth, në kööl ye pɛɛi de dhorou thok thiërrou ku tök, ke Bɛ̈nydït ë be jam nyɔk në röl ë tiët Ɣagai.

² Lëk Ɣagai an, “lɛ̈kë Dherubabel wën de Caltiɛl, bɛ̈ny ë Juda, kekë Jocua bɛ̈nydïït ë kake Nhialic, ku lɛ̈kë kɔc lik cï döŋ kedhie,

³ an, ‘Eeŋa në weyiic, raan ŋoot ke ŋic läk wään kɔn ë Luaŋdït läk wään tueŋ? Ku ënɔɔnë, tɔ̈u adï? Cäkï ee tïŋ cït ke cïn këdäŋ?

⁴ Aye Bɛ̈nydït de rɛm lueel an, Ku ënɔɔnë, riɛɛtkï röt piny yïn Dherubabel wekë Jocua, bɛ̈nydïït ë kake Nhialic, ku kɔc ke piny kedhie, ku luɔikï luɔi. Yɛn tɔ̈u wokë week,

⁵ cït man cän week lɛ̈k gutguut ɣɔn bä wek bei Rip an, “Yɛn bï tɔ̈u wo week anandï, Yɛn ŋoot ke Ya tɔ̈u we week, ka duökï riɔ̈c.

⁶ Aye Bɛ̈nydït de rɛm lueel an, “Në ee nïn likë, Yɛn bï tënhial kekë piny niɛŋ, ku niɛŋ wɛ̈ɛ̈r, ayï tëril.

⁷ Aye Bɛ̈nydït de rɛm lueel an, Yɛn bï juöör pɔ̈k piny kedhie, ka wëuken abïk guëër eenë, ka Luaŋdït abï thiäŋ ke athiɛɛi.

⁸ Ku lueel Bɛ̈nydït de rɛm an, Atek ke pinynɔm kedhie, ayï adhɛ̈p ayek kakï.

⁹ Luaŋdït cï piɛc yïk, abï läk arëët awär ɣön wään tueŋ. Ku yɛn bï kɔckï tɔ kueth, ku gäm keek mät, Bɛ̈nydït de rɛm Yen aa jam.

Tiët Alop Bäny ke kake Nhialic

¹⁰ Na ɣɔn, ye pɛ̈i de dhoŋuan thok thiërrou ku ŋuan, në ruöön ye Dariouth run rou në bääny yic, ke Bɛ̈nydït Awärjäŋ ë be jam nyɔk ke tiët Ɣagai.

¹¹ Bɛ̈nydït de rɛm lueel an, “Thiëc bäny ke kake Nhialic në ee loopkë në biäk de löŋ

¹² an, ‘Na muk raan rïïŋ ɣeric, rïïŋ de lɛ̈n cï näk Nhialic në lupɔ thok. Ku jiɛk en kuïn cï pam, ku nɔn yen kuïn ë thal, ku nɔn yen mɔ̈u, ku nɔn yen miök, agut cï këcam cï jak, duëër ee këcamë tɔ ɣeric ayadäŋ? Wën, cïï Ɣagai bäny ke kake Nhialic luɔp, ke pukkï nɔm an, “Ei.

¹³ Go Ɣagai ke bɛ nyɔk ë lop an, “Ku na cï raan ye guöp tɔ rac në baŋ cï yen kë cï thou jak. Ku na jɔ kuïn tök në ee kuïïnkë yiic jak, duëër ee kuïïnkë tɔ rac ayadäŋ? Go bäny ke kake Nhialic puk nɔm an, “Ɣɛɛ.

¹⁴ Go Ɣagai lɛ̈k keek an, “Aye Bɛ̈nydït lueel an, yen täudɛn bï yen tɔ̈u ka kekë kɔc ke juöör ayadäŋ, ku tɔ̈u kekë kakɛn yek looi. Ka këriëëc ëbɛ̈n yek gam në yïk nɔm acï tɔ rac.

Bɛ̈nydït Athɛn Athiɛɛide

¹⁵ Aye Bɛ̈nydït lueel an, “Kuöckï kë wään loi rɔt tëde week, të ɣɔn ŋuɔɔt wek ke we kën Luaŋdït gɔl ë yïk?

¹⁶ Wek aaye lɔ në akut ë rap lɔ̈ɔ̈m ke ŋäthkï nɔn bï yen cual kathiërrou bɛ̈ɛ̈i, ke lɔ pëk në cual kathiëër. Ku wek aaye lɔ në thaaŋ ë mɔ̈u lɔ̈ɔ̈m, ke ŋäthkï nɔn bä wek töny kathiërdhïc lɔ thiɔ̈ɔ̈ŋ, ke lɔ pëk në thiërrou.

¹⁷ Wek aa tuöc käm riäkkï kakuön cäk com ëbɛ̈n, ku tuöc week wiir tuc thok, ku wek kën we piɔ̈ɔ̈th puk.

¹⁸ Ku ee köölë, ee kööl ye pɛ̈i de dhoŋuan thok thiërrou ku ŋuan, kööl ë thök ë këërkëër de Luaŋdït në kiir piny. Ënɔɔnë, jakï tïŋ kë bï rɔt looi, gɔl ënɔɔnë le tueŋ.

¹⁹ Ŋoot kɔ̈th ë ɣööt yiic? Ŋoot tiim ke ke kën luɔk? Tiim ke enap, ku tiim ke ŋaap, ku tiim ke pomegraneet, ku tiim ke olip. Wek bä thieei gɔl ee köölë le tueŋ.

Bɛ̈nydït Alëk Gutguut Dherubabel

²⁰ Na ɣɔn, ke jam ë Bɛ̈nydït ye kek rou bɔ̈ tëde Ɣagai në ee pɛɛi manë yic, kööl yen thok thiërrou ku ŋuan.

²¹ Lëk en an, “lɛ̈kë Dherubabel, bɛ̈ny de Juda an, ‘Akaar luɔi bän tënhial kekë piny niɛŋ,

²² ku puɔ̈k thööny de ciɛɛŋ piny, ku riääk riɛl de ciɛɛŋ ë juöör ëbɛ̈n. Ku puɔ̈k abëël ke tɔŋ piny, ayï kɔc ee cath thïn. Ku jöŋgöör ke tɔŋ abïk thou, ku kɔc ee cath në kekɔ̈ɔ̈th abïk röt lɔ̈ɔ̈k nɔ̈k kapäc.

²³ Ku në ee köölë yïn bä jɔt yïn awundiën Dherubabel wën de Caltiɛl, ku tääu yïn në bääny yic në Rinkï. Ee yïn ee raan cä lɔc. Ee Bɛ̈nydït de rɛm Yen aa jam.