Ɣabakuk 3 - JAM DE NHIALIC 2011

Lɔ̈ŋ de Ɣabakuk

¹ Go tiët Ɣabakuk lɔ̈ŋ në ee lɔ̈ŋë an,

² “Bɛ̈nydït, yɛn cï ka ɣɔn cï kɔn looi piŋ, ka yɛn ee riɔ̈ɔ̈c dɔm. Ku ënɔɔnë nyɔk kadït ɣɔn cï kɔn looi në aköölkuɔnkë yiic. Ayï agönhdun yic we wook, ke Yï pɛ̈l Yï piɔ̈u piny ku nyuöthë wook kokdepiɔ̈ndu.

³ Nhialic aa nyɔk bɛ̈n në Teman, Nhialic ɣeric abɔ̈ në kur ke Paran nïïm. Ka dhuëëŋde ë dït, të nhial ku piny ë thiäŋ ke lɛc de.

⁴ Të cï Yen bɛ̈n ee riau cït man ë mac ayï ciinde ee lɔ bërët, yen të cï Yen riɛlde thiaan ka.

⁵ Ee jɔɔk tuɔɔc ë Yenɔm tueŋ, ku yöök thuɔɔu bïï Ye kuany cök.

⁶ Të jɔt En rɔt ciɛth, piny aye lath, të cï Yen E nyin cuat, kɔc juöör aye ke lath. Ee kur ɣɔn thɛɛr tɔ lɔ thorthor abïk wɛɛr, ku tɔ kur kor cur piny kur wään Yen cath thïn ɣɔn thɛɛr.

⁷ Yɛn aa tïŋ kɔc ke Kucan rɛ̈ɛ̈r në kɛ̈ɛ̈t yiic ke ke cï riɔ̈ɔ̈c, ku lɛthë kɔc ke piny de Midian në ɣööt yiic.

⁸ Ee kiɛɛr kek tɔ Yïn göth aläl Bɛ̈nydït? Ku ee wɛ̈ɛ̈r yen tɔ Yï diu piɔ̈u? Yïn ë kɛɛc në amaŋ de luäät kɔ̈ɔ̈th abïk ciët jöŋgöör ke tɔŋ ku tɔ kɔcku tiëm.

⁹ Yïn ë wiɛth ke dhaŋdu coc, ke kɔɔr bä kaku mɔc. Wildu abï piny ɣaar yic ku looi wɛ̈ɛ̈r

¹⁰ Të cïï kur Yïn tïŋ aye ke lath, Yïn ë pïïu wäl piny nhial. Piääu dït riŋ piny ayek roor, ku moc apiöŋ ë wɛ̈ɛ̈r rɔ nhial ya.

¹¹ Të moc ë winh ë dhaŋduön ŋic riŋ ku ariauriau de tɔŋduön ee lɔ bërët, akɔ̈l kekë pɛɛi ayek kɔ̈ɔ̈c ke ke cïï cath.

¹² Yïn ee piny käc aläl në agɔ̈th të ciɛth Yïn ë yenɔm, ku dum juöör yiic të cïï Yïn piɔ̈u diu.

¹³ Yïn ë lɔ biic lɔ kɔcku kony, lɔ melikduön cï lɔc kony. Yïn ë bäny ke kɔc ee karɛc looi dhiac nïïm ayï kɔckɛn ee keek kuany cök.

¹⁴ Wiɛthku acïk bɛ̈ny de remdɛn ë tɔŋ thɔ̈ɔ̈ric wën bïï tɔŋden ke riŋ cït man ë kɔɔr an, bïk wo bɛ̈n thiäi piny, amitkï piɔ̈ɔ̈th cï kɔc bï kɔc kuanynyïïn cam në cuëër.

¹⁵ Yïn aa ciɛɛth pïïu nïïm ë jöŋgöörku, ago wɛ̈ɛ̈r dït piëëuke thɔɔc nïïm.

¹⁶ Yɛn ëbɛ̈n lath yäc wën piɛŋ ɛn ee kënë ëbɛ̈n, yɛn cï bɛ̈n lath röl në riɔ̈ɔ̈c. Guɔ guöp lɔ bath, ku lɛthë yacök të wën kääc ɛn. Yɛn bï tïït ë lik në bɛ̈n bïï ë kööl bïï ë Nhialic kɔc ee wook mak bɛ̈n luöi këtuc.

¹⁷ Na cak ŋaap ku olip nïïm ciën mïth ku cïn duum yiic rap cam, ke yɛn bï ŋoot ke ya mit piɔ̈u në biäk de Bɛ̈nydït, ku na cak thök thou ëbɛ̈n ku cïn ɣɔ̈k nu ë luɛ̈k yiic,

¹⁸ ke yɛn bï ŋoot ke ya mit piɔ̈u në biäk konyë Nhialic ɛn.

¹⁹ Nhialic Bɛ̈nydït ee ya gäm riɛl. Abï ya gäm cök cie rieth cït man ë ŋɛɛr ku ɣeet ɛn ë kur nïïm ke cïn kërɛɛc nu.