Ɣabakuk 2 - JAM DE NHIALIC 2011

Bɛ̈nydït Abëër Wël ke Ɣabakuk

¹ Yɛn bï jɔ kɛɛc nhial ku daai, ku kääc ë aloocdïït bäär, ku tiɛɛt kë bï Bɛ̈nydït lɛ̈k ɛn, ku kë bïï lueel, ku bëër bï yen këdiën tɔ ya gööny bɛ̈ɛ̈r.

² Go Bɛ̈nydït jamdï bɛ̈ɛ̈r lëk ɛn an, “Gäär ee nyuuthdiënë në pam kɔ̈u në gäär dït nyin ke bïï raan riŋ lëu në kuɛ̈n, ku bïï ke lɔ lɛ̈k raan däŋ.

³ Yïn bï nyuuthë dhil gɔ̈ɔ̈r ku abï aköölkë tiit. Ku kë cä nyuöth yïn abï rɔt looi. Na cït kë gääu, ke tit abï dhil bɛ̈n, acï bï gääu.

⁴ Ku jamkï an: ‘Kɔc ee karɛc looi acïkï bï pïïr, ku kɔc piɛthpiɔ̈ɔ̈th abïk pïïr në gäm gɛm kek Nhialic.’

Thon de Kɔc cïn Piathëpiɔ̈u

⁵ Kuɛth ë mɔ̈u ee mɛth, ku röördït piɔ̈ɔ̈th ayek kenïïm ɣääc ku acïkï ee lɔ̈ŋ cït man ë paan ë thuɔɔu guöpde, acïkï ee kuɛth. Yeka ye kek juöör ke pinynɔm määt yiic ku pëckï ke röt.

⁶ Ku ade kööl bɔ̈ kööl bïï kɔc cïk peec keek bɛ dɔl gup, ku lëkkï keek an, “Wek ee kajuëc cie kakun nööm, Amawoou në week, Nhialic abï we luöi këtuc. Agut cï nɛn bä wek kuɛth cuuth në wëu yak dhɛ̈n kɔc ku bɛkï ke kɔ̈ɔ̈ny në riɛl?

⁷ Kɔc ë yak dhɛ̈ɛ̈n abïk röt jɔt në agɔ̈th ëthiäu, ku pukkï röt week rumkï këriëëc cath ke week, ku jɔ we lath ke we kääc ku ciɛ̈nkï nïïm riɛl ka wek bï lööny në kecin.

⁸ Wek cï kɔc juëc ke juöör peec, kɔc cï döŋ apïr abïk week bɛ peec ayadäŋ. Në biäk cä wek kɔc nɔ̈k, ku kuörkï juöör ke pɛ̈ɛ̈nydït ke pinynɔm ëbɛ̈n.

⁹ Amawoou në week, wek ë bɛ̈ikun thiɔ̈ɔ̈ŋ në ka ya keek yak tëde kɔc në riɛl. Wek cï kuɛth ku yiɛ̈kï bɛ̈i ril bïk we gël në buɔ̈t!

¹⁰ Ku kiɛɛr rɛɛcdun ë bɛ̈ikun yiɛ̈n yiic ayäär. Ku në biäk de juöör juëc cäk keek riɔ̈ɔ̈k, ee riääk yen acäk yiɛ̈n röt.

¹¹ Acakaa kur ke pɛ̈ɛ̈ny ke ɣöötkun, ku kɔɔu adhiaukï piɔ̈ɔ̈th në week në kë cäk looi.

¹² Amawoou në week, wek kɔc cï pänydït yïk në lëu de riɛm, ku luɔi de karɛc.

¹³ Juöör cäk peec acïk luɔi looi luɔi cïn kë cïk yök thïn, acïk tiam ku këriëëc cïk looi abï nyop ëbɛ̈n. Ee Yen Bɛ̈nydït de rɛm Yen aloi ee kënë.

¹⁴ Ku piny abï thiäŋ kekë ŋïnydekäŋ de dhuëëŋ de Bɛ̈nydït, cït wɛ̈ɛ̈r thiäŋ kekë pïïu.

¹⁵ Amawoou në week, wek kɔc cï wuöt thiääk në week kuɔɔr piny ku takï keek yäär, ku jakï keek tɔ cath ë käŋkäŋ cï ka cï wiɛɛt.

¹⁶ Agönh ë Bɛ̈nydït abɔ̈ të nu wek gupkun ka bäk yök aya, ka we bï ciët ka cï wiɛɛt ku kɔc abïk we bɛ aa dɔl gup. Ku luɔi duëër kek we dhuëëŋ gup ke abïk we bɛ biɔɔn gup ka we bï yäär.

¹⁷ Në kë cä wek roor ë piny de Lebanɔn yiɛp piny, ënɔɔnë wek bï tɔ̈k piny. Wek cï läi näk piny, ku näŋ de läi abï we riääc. Kënë abï rɔt looi, në biäk cä wek kɔc nɔ̈k, ku kuörkï juöör ku wuöt ke pinynɔm ëbɛ̈n.

¹⁸ Eeŋö duɛ̈ɛ̈rkï yök në läm de yiëth ë guaŋkï në we cin? Duëër aa ŋö, kë ye kɔc kak ë guaŋkï në ke cïn ŋɔ̈ɔ̈th, ku gamkï tör de lueth cït ee kënë, yiëth cie jam!

¹⁹ Amawoou në week, wek kɔc ee tiim ku kur cäk guaŋ yɔ̈ɔ̈k an, “Pääckï jatkï röt. Duëër yanh ë guaŋ jam ke week? Na cak kɔc ke deer kɔ̈ɔ̈th në ateek ku adhääp, ka cïn kë duëërkï lueel ku cïkï pïïr.

²⁰ Bɛ̈nydït ee nu në luaŋdɛn ɣeric yic, ka kɔc ceŋ piny ë ke lɔ lïk në Yenɔm.