Ɣabakuk 1 - JAM DE NHIALIC 2011

¹ Kënë ee jam cïï Bɛ̈nydït tɔ tïŋ ë tiët Ɣabakuk në nyuuth.

Ɣabakuk Agööny ë Biäk de Yaaŋ

² Bɛ̈nydït, bä ya jɔ piŋ thok nɛn, ku Yïn aa cool ë liɛm në kuɔɔny ku cïï piŋ? Yɛn ee cööt në röldït, ku cïï ya luäk në akuöörkuöör.

³ Eeŋö tɔ yïn ɛn tïŋ ee kërɛɛcë? Ku eeŋö duëër Yïn karɛc loi guum ke ke woi? Riääk ku akuöörkuöör kek anu në yalɔ̈ɔ̈m, ku tɔɔŋ ku agööth acïk juëc.

⁴ Ka löŋ acï ciën naamde, ku acïn löŋ ye ŋiëc guiir ë gööny yic, kɔc ee karɛc looi ayek kɔc piɛthpiɔ̈ɔ̈th tiaam në juëc, ka yic acïï be lɔ kim piny.

Bëër de Bɛ̈nydït

⁵ Na wën, ke bëër ë Bɛ̈nydït an, “Wɔikï juöör apiɛth, ku wek bï gäi arëët. Kërɛɛc bä luöi keek në aköölkuönkë yiic, ee kë cäkï duëër gam na cak lɛ̈k week.

⁶ Yɛn bï kɔc ke Babilon tɔ bɔ̈ nhial, ee jur de guöp akuöörkuöör cie bäp. Kɔc ee piny baar ëbɛ̈n, ku peckï wuöt kɔ̈k.

⁷ Ee kɔc ye ke riɔ̈ɔ̈c në keek arëët. Ku ɣɛ̈ɛ̈cdɛn ye kek kenïïm ɣääc aye kek röt yök ke ke ye löŋ gupken.

⁸ “Jöŋgöörken aŋickï riŋ awärkï kuëc. Ku ayek ŋɛny wär aŋuööth nɛ̈k cɔk. Ku remdɛn de tɔŋ cath ë jöŋgöör kɔ̈ɔ̈th, ayek bɛ̈n tëmec. Abïk ciët cuɔɔr nyuc ë lɛ̈n ŋueet kɔ̈u.

⁹ “Ayek bɛ̈n thïn kedhie në akuöörkuöör. Ku dɔmkï piny, ku kɔc cïk peec ajuëckï cït liɛɛt.

¹⁰ Ayek meliik dɔl gup, ku buikï bäny. Ayek pänydït cï gël aril dɔl guöp, ayek abuui thɔɔc nɔm në kal ë wut thar, ku peckï wut.

¹¹ Ku barkï yic ëthiäu cït man ë yom. Kɔc de gup gääk, ye riɛlden yanhden.

Ɣabakuk abe Gööny Nyɔk ë Bɛ̈nydït Nɔm

¹² Bɛ̈nydït Yïn ee Nhialicda, tɔ̈u aɣet athɛɛr. Yïn ee Raan Ɣeric e wo gël, Yïn cï Babilon lɔc ku tɔ ke ril bïk wo luöi këtuc.

¹³ Yïn lɔgɔk, Yïn cïï kërac duëër woi, ku acïï duëër guum. Ka eeŋö miim Yïn ku jɔkï lɔ ke ke liek wook? Eeŋö jɔ Yïn kɔc rac ee karɛc looi tɔ riäk kɔc ŋuän në keek?

¹⁴ Eeŋö duëër Yïn kɔc tɔ cït rec ye dɔm ku näk ke, ku tɔ ke ee käm thii ee mol piny, cïn nïïm bɛ̈ny kony keek?

¹⁵ Kɔc ke Babilon ayek kɔc gɔn në alɔbithɔden ku thëlkï ke bei në boiken, ku jɔkï lɔ ke ke dɔl ku leckï kenïïm?

¹⁶ Na lë, ke ke jɔ boiken lam, ku nyupkï keek miɔ̈c ë wɛ̈ɛ̈l ŋïr, ku lueelkï an, “Kek ë boikë, ayek yiëth ee kek tɔ wo kueth.

¹⁷ Bïk abätɛ̈ɛ̈uken jɔ muk ananden, ku kurkï juöör të cïn kokdepiɔ̈u?