Ethta 8 - JAM DE NHIALIC 2011

Judai acï ke Yöök bïk Thɔ̈ɔ̈r

¹ Na ɣɔn ee kööl manë guöp, ke Melik Athuwereth ë gëm tiiŋ Melik Ethta kake Ɣaman kedhie, raan ater de kɔc ke Judai. Ku Modekayo acï bɛ̈n ɣëët ë Melik lɔ̈ɔ̈m, në biäk cïï Ethta ye lɛ̈k luɔi rɛɛn kek.

² Go Melik këtim de cin ee yen käŋ thaany wään cï pɔ̈k nɔm ciëën tëde Ɣaman ruɛ̈c bei ku gëm Modekayo. Ku ëtɛ̈ɛ̈n Ethta acï kajuëc ke Ɣaman bɛ̈n tääu ë Modekayo ciin.

³ Go Ethta bɛ jam ke Melik le ku cuɛt rɔt piny ë yenɔm, ke dhiau në pïïu ke yenyin, ke lim kok de piɔ̈u në luɔi duëërë kiɛɛr rɛɛcë tɔ nyɛɛiyë, kiɛɛr rɛɛc wään cïï Ɣaman raan de Agak luöi kɔc ke Judai.

⁴ Go Melik Ethta nyooth ë wai de adhääp, ago rɔt jɔt ku kɛ̈ɛ̈c ë Melik nɔm ku lueel an,

⁵ “Të mit en në Melik piɔ̈u, ku yɔ̈k kok de piɔ̈u tëde yen, ku ye tïŋ ke ye yic, ku mit në yepiɔ̈u, ke tɛ̈ɛ̈u löŋ piny, löŋ bï löŋ nyaai, löŋ wään cï Ɣaman wën de Ɣamedatha kuat de Agak gɔ̈ɔ̈r an, bï kɔc ke Judai tɔ̈u ë wuöt ke Melik yiic kedhie riɔ̈ɔ̈r nyïïn.

⁶ Duɛ̈ɛ̈r jɔ lëu ë guöm adï ënɔɔnë, të bïï riäŋdïït cït ee kënë tëde kɔckï, ku nɛ̈k kɔc raan ë yɛn?”

⁷ Go Melik Athuwereth lɛ̈k tiiŋ Melik Ethta kekë Modekayo, raan ë Judai an, “Tiëŋkï, yɛn ë Ɣaman nöök në biäk kɔɔr en bï kɔc ke Judai nyaai nyïïn, ku yɛn ë Ethta gäm kajuëc ke Ɣaman.

⁸ Ka week, gäärkï në gäärduön nhiaarkï në biäk de kɔc ke Judai në rin ke Melik, ku thanykï yic në katim de Melik, në luɔi cïï kë cï gɔ̈ɔ̈r tueŋ në rin ke melik ku thanyic në këtimde duëër nyaai.”

⁹ Në kööl ɣɔn ye pɛɛi cɔl Thiban (yen acɔl Lal në thoŋda) thok thiërrou ku diäk, ke kɔc awereek ke Melik gɔ̈ɔ̈r acï ke bɛ̈n määtiic, ku gäärkï awereek cït man cï Modekayo e lɛ̈k keek, agokï gäär kɔc ke Judai ku bäny ke baai, ku bäny mac wuöt kabɔt ku thiërrou ku dhorou, jɔt ë Yindia agut cï piny de Kuc, aaye gäär wut në kueerdɛn ye kek gär, ku në thoŋdɛn yek piŋ ku gɛ̈ɛ̈rë Judai në kueerden ku thoŋden.

¹⁰ Acï ke gɔ̈ɔ̈r në rin ke Melik Athuwereth, ku thɛɛny ke yiic në katim de Melik, ku awereekë, aake ye tuɔɔc në kɔc ee cath ë jöŋgöör kɔ̈ɔ̈th, jöŋgöör ke baai de Melik ŋic riŋ aläldïïtë.

¹¹ Në awereekë yiic acïï melik päl kɔc ke Judai nu ë wuötiic ëbɛ̈n bïk ke yiic aa määt, ku bïk röt kony në pïïr bï kek pïïr. Bïk kɔc tɛm röt, ku bïk ke riɔ̈ɔ̈k, ku riäärkï kɔc nyïïn, kɔc lɔ keek yiɛ̈n tɔŋ, ku nɔn yen wun bï tɔŋ yiɛ̈n keek, ayï mïthken ku diëërken, ku yakï kaken,

¹² në wuöt ke Melik Athuwereth yiic kedhie, në kööl tökic kööl ye pɛɛi ë thiëër ku rou de Adar thok thiëër ku diäk.

¹³ Kë cï gɔ̈ɔ̈r acïï bɛ̈n tääu awereek juëc yiic, ku yïnë wuöt juëc, ke ye löŋ lëk ë kɔc ë wuötiic kedhie, ku bï kɔc ke Judai röt coc në ee köölë, bïk röt kuön kɔc ke aterden.

¹⁴ Kɔc cï tooc ee riŋ ë jöŋgöör piɔl ke Melik kɔ̈ɔ̈th, acïk lööŋ bɛ̈n dap lɛɛr ë wuötiic, në yöök cïï Melik ke yɔ̈ɔ̈k, ku kuënë raan ëbɛ̈n aya, tëde riɛl de Thutha.

¹⁵ Go Modekayo jäl ë melik lɔ̈ɔ̈m ke ceŋ lupɔɔ dït ke bääny de yiic kïn aräu cït luäät ku ɣeer ë biäk, ku lupɔ piɛth lɔ mot, ku lupɔ thiith amujuŋ, ku jɔ ya göldïït de bääny lɔ riauriau kekë adhɛ̈p, go raan ëbɛ̈n pänydït ë Thutha, bɛ̈n biic ke ke moc kiɛɛu de miɛtëpiɔ̈u.

¹⁶ Kɔc ke Judai acïk piɔ̈ɔ̈th bɛ̈n miɛt ku dɔlkï në nɔm lääu ku riëëu cïk yök.

¹⁷ Në pɛ̈ɛ̈nydït ë wuötiic kedhie, wuöt cïï ke lööŋ ke melik piŋ thïn, aaye miɛtëpiɔ̈u tëde kɔc ke Judai, agokï lɔ̈ŋ ku loikï dhuëëŋ. Ku kɔc juëc ke ee paanë, acïk röt bɛ̈n aa cɔɔl an yek kɔc ke Judai, në riɔ̈ɔ̈c riɔ̈ɔ̈c kek në keek.