Ethta 7 - JAM DE NHIALIC 2011

¹ Ku jɔ Melik kekë Ɣaman cam ëtök në tiiŋ Melik Ethta.

² Të wën jɔ kek dek ë mɔ̈u wën cï kek thök në cäm në kööl ee kek rou, go Melik Ethta nyɔk në lop an, “Yïn Ethta, tiiŋ Melik, lɛ̈kë yɛn kë kɔɔr ke bï gäm yïn, yïn bä gäm kë cï thiëc ɛn, na yï cak a thiëëc në biäk de piny macë, abï gäm yïn.”

³ Go Ethta, tiiŋ Melik, pɔ̈k nɔm Melik an, “Na cä dhuëëŋ de piɔ̈u yök tëde yïn, ku piɛth ë yïpiɔ̈u yïn Melik, në thiëcdï yic kë kaar kï: ee luɔi bï yïn a kony wëi, ku luɔi bï yïn kɔckï luök aya.

⁴ Wok cï thök në ɣɔɔc ɣöcë wo thuɔɔu, yɛn wokë kɔckï, bï wo tɛm röt, riäk wo, ku riäär wonyïïn. Na jɔ wo ɣaac tei në luɔi bï wok aa lïïm, diäär ku röör, ke yɛn duëër mim ku cïn kë luɛɛl, acie yen duëër ë raan Melik jut guöp!”

⁵ Go Melik Athuwereth lɛ̈k tiiŋ Melik Ethta an, “Eeŋa ku tɔ̈u ë nou, yen ë raan kɔɔr bïï kërɛɛc cït ee kënë looi?”

⁶ Go Ethta pɔ̈k nɔm en an, “Raan aterda yɔŋ wook ee yen ë raan rɛɛc cɔl Ɣamanë!” Go Ɣaman lath në riɔ̈ɔ̈c riɔ̈ɔ̈c en në melik kekë tiiŋde.

⁷ Go Melik rɔt jɔt ke cï ŋeeny, ku nyiëëŋ mɔ̈nde piny ku le domic baaide. Jɔ Ɣaman guɔ ŋic nɔn cïï Melik e kiëët në yepiɔ̈u në këtuc bïï luöi yen, go döŋ ciëën ke lim Ethta tiiŋ Melik, bïï yen kony wëi.

⁸ Na wën, ke Melik ë puk yenɔm ɣöt të wën dëk kek thïn ë mɔ̈u, ke yök Ɣaman ë rɔt cuat piny në Ethta cök, ke rɛ̈ɛ̈r në kë de rëër nɔm. Go melik lueel an, “Tiëŋkï! Kɔɔr bïï tiiŋ Melik wiëët ɣöndï ë yalɔ̈ɔ̈m?” Të thiin ŋoot ë jamde ke kën kɔn lööny piny ë yethok, ke kɔc cï roc ë jɔ Ɣaman guɔ kum nyin.

⁹ Go Ɣarbona, raan töŋ de rooc nu baai de melik lueel an, “Ɣaman ë ɣet tëmec aläl, arëk abïï tim piäät baaide, tim ye bɛ̈ɛ̈r de ke lɔ nhial mitïïr kathiërrou ku diäk, an bïï yen Modekayo tɔ nök ë yekɔ̈u. Yen Modekayo wään cï melik tɔ kony wëi!” Go Melik ke yɔ̈ɔ̈k an, “Nɔ̈kkï Ɣaman ee timë kɔ̈u!”

¹⁰ Gokï Ɣaman nöök ee timë kɔ̈u, timdɛn wään cï looi an bïï yen Modekayo tɔ nök. Go Melik piɔ̈u jɔ lɔ piny në agɔ̈th.