Ethta 6 - JAM DE NHIALIC 2011

Melik Alui Modekayo Dhuëëŋ

¹ Ɣɔn në ye wɛ̈ɛ̈rë yic, go Melik ruu ke cïï nin, go awerek de gäär de kake luɔi aköölnyïïn cɔɔl, bï bɛ̈n kuɛ̈n ka cï gɔ̈ɔ̈r. Go ke kuɛ̈n en,

² go yök ke cï gɔ̈ɔ̈r luɔi cïï Modekayo kiɛɛr rɛɛc cï luöi Melik nyuɔɔth. Kiɛɛr kɔɔr bï ë Athuwereth nɔ̈k në rooc yï: Bigathana kekë Terec, kɔc ee ɣöndïït ë Melik tiit thok.

³ Go Melik kɔckɛn ee ye luööi thiëëc an, “Ee dhuëëŋ ŋö cïï wok ye dhuëëŋ guöp në biäk de ee kënë?” Gokï puk nɔm an, “Acïn kë cï luöi yen.”

⁴ Go Melik ke thiëëc an, “Eeŋa tɔ̈u ë gɔ̈ɔ̈lic?” Ku tëthïïnë, ke Ɣaman ë bɔ̈ kɛl, akɔɔr bï lëk Melik nɔn duëërë en Modekayo tɔ nök në tim bɛ̈ɛ̈rdïït cï piäät në biäkde.

⁵ Go kɔc ee Melik luöi dɔ̈k nɔm en an, “Ɣaman yen akääc ëtɛ̈ɛ̈n, akɔɔr bï yïn tïŋ.” Go Melik puk nɔm an, “Takï bɔ̈ ɣöt.”

⁶ Ëtɛ̈ɛ̈n Ɣaman acï lɔ ɣöt, ku lëkë Melik en an, “Eeŋö duëërë luöi raan cïï Melik piɔ̈u miɛt ke yen an bïï dhuëëŋ guöp?” Go Ɣaman lueel ë yepiɔ̈u an, “Eeŋa däŋ duëërë Melik dhuëëŋ guöp pei, cie yɛn?”

^7-8 Go Ɣaman lɛ̈k Melik an, “Raan cïï Melik piɔ̈u miɛt ke yen, abï dhuëëŋ guöp ë lupɔɔ ke bääny de Melik cï kɔn cieŋ, ku jöŋgör cïï Melik kɔn cath, ku yïkï jöŋgör nɔm göl de Melik,

⁹ ku gɛ̈mkï lupɔɔ ke bääny de Melik kekë jöŋgör raandïït töŋ de kɔc nu në Melik cök, bïï lupɔɔ tääu në ee raanë kɔ̈u, ku tɔ kɛɛc ë jöŋgör kɔ̈u, ku jɔ jöŋgör thel ke lɔ ë pëërdïït tɔ̈u wutic cil, ke ye cööt ë röldït an, ‘Tiëŋkï, yen kë ye luöi raan kɔɔr ë Melik an bï dhuëëŋ guöp!”’

¹⁰ Go Melik Ɣaman yɔ̈ɔ̈k an, “Dap lɔ, nöm lupɔɔkë kekë jöŋgör ku lɔ luöiyë dhuëëŋë Modekayo, raan ë Judai. Luöiyë këriëëc ëbɛ̈n cït man cïï yïn e nyooth. Abä yök arɛ̈ɛ̈r biic ë kal thok thïn baaidï.”

¹¹ Go Ɣaman lupɔɔ nööm ku jöŋgör, ku tɛ̈ɛ̈u lupɔɔ ë Modekayo kɔ̈u, ku tɔ Modekayo lɔ ë jöŋgör kɔ̈u, ku jɔ jöŋgör thel ke lɔ ë pëërdïït tɔ̈u wutic cil, ku jɔ cööt ë röldït an, “Tiëŋkï, yen kë ye luöi raan kɔɔr ë melik an bï dhuëëŋ guöp!”

¹² Na wën ke Modekayo ë puk rɔt ë kal ë ɣöndïït ë Melik thok, të wën yen rëërë. Ku dap Ɣaman jäl ke gut e nɔm piny, pën e nyin kɔc, ke lɔ paande ke cï piɔ̈u dhiau arëët.

¹³ Go Ɣaman lɔ ku lëk Dherec, tiiŋde, ku määthke, kë cï rɔt luöi yen ëbɛ̈n. Go tik ku röörkɛn pelnïïm lɛ̈k en an, “Yïn bï riɛldu thɔ̈l ë Modekayo guöp, ku yen acïï duëërë kɔn tiaam ë yïn, ee raan ë Judai, ee yen abï yïn tiaam!”

Ɣaman Anäk

¹⁴ Ee tëthiin ŋoot kek ke ke jam, go rooc nu ɣöndïït de melik Ɣaman diëc, lekï ë dhuëëŋ de këcam yic, dhuëëŋ cïï Ethta kiëët.