Ethta 5 - JAM DE NHIALIC 2011

Ethta Acöl Melik kekë Ɣaman Dhuëëŋ de Këcam

¹ Ɣɔn në kööl ye thɛ̈k nïn diäk, ke Ethta ë jɔ lupɔɔkɛn ke bääny tääu, ku jɔ lɔ ë gɔ̈ɔ̈lic thïn ku kɛ̈ɛ̈c ɣön ë Melik thok. Aa kääc ke wël enɔm thöny de Melik tɔ̈u ɣööt thïn, ku rɛ̈ɛ̈r Melik ë thööc nɔm ɣööt ke wel e nɔm biic.

² Na wën ke Melik ë tïŋ tiiŋ Melik Ethta ke kääc biic, ago piɔ̈u kok ke yen ku nyooth ë wai de adhääp muk ë yecin, ago tik rɔt cuöt ku jiɛk wai nɔm.

³ Go Melik thiëëc an, “Eeŋö Ethta, tiiŋ Melik? Lɛ̈kë yɛn kë kɔɔr, ku abï gäm yïn, të ciɛk en bɛ aa biäk de piny ee yen macë.”

⁴ Go Ethta dɔ̈k nɔm en an, “Të piɛth en ë Melik piɔ̈u ke Melik kekë Ɣaman aduëërkï bɛ̈n baai ee köölë, në biäk de dhuëëŋ de këcam cä luöi Melik.”

⁵ Go Melik lueel an, Dapkï Ɣaman diëc, ke buk looi cït man kɔɔr ë Ethta yen. Go Melik kekë Ɣaman lɔ ë dhuëëŋ de këcam cïï Ethta kiëët.

⁶ Na wën aa cïk thök ë cäm ku jɔkï bɛ rëër ke ke dëk ë mɔ̈u, go Melik tiiŋdɛn Ethta thiëëc an, “lɛ̈kë yɛn kë kɔɔr ke bï gäm yïn, yïn bä gäm kë cï thiëc ɛn, na yï cak a thiëëc në biäk de piny macë, abï gäm yïn.”

⁷ Go Ethta dɔ̈k nɔm en an, “Në thiëcdï yic kë kaar kï:

⁸ Të nyuth ë Melik ɛn kok de piɔ̈u, ku piɛɛth ë Melik piɔ̈u bïï ya gäm kë kaar, ke yɛn kɔɔr Melik kekë Ɣaman, duëërkï bɛ bɛ̈n miäk ë dhuëëŋic, dhuëëŋ de këcam bä luöi keek, ku ëtɛ̈ɛ̈n, yɛn bï lop de Melik jɔ pɔ̈k nɔm en.”

Ɣaman Aloi Kiɛɛr Bï En Modekayo Nɔ̈k

⁹ Na wën jɔ Ɣaman jäl të de dhuëëŋ de këcam, yen aa mit piɔ̈u ku lee piɔ̈u wai. Na wën aa tïŋ Modekayo ë kal ë ɣön ë Melik thok, ku kën rɔt jɔt ku nyuth Ɣaman riëëu të wën tëëk en. Go piɔ̈u riääk arëët ke yen,

¹⁰ ku muk e piɔ̈u tei ke lɔ baaide. Ëtɛ̈ɛ̈n acï määthke bɛ̈n caal paande, ku lëk tiiŋdɛn Dherec bï rɔt mät keek.

¹¹ Ku jɔ rɔt lɛ̈c keek ë kakɛn juëc tɔ̈u ë yen, ku wɛ̈ɛ̈tkɛn juëc cï dhiëëth, ayïï ŋuëŋ cï Melik bäänyde ŋuak ku tɛ̈ɛ̈u tueŋ ë bäny nu ë Melik cök nïïm, ayïï kɔc ee Melik luööi.

¹² Ku ŋoot Ɣaman ke jam lueel an, “Eeŋö däŋ cï bɛ döŋ? Ayïï Ethta, tiiŋ Melik, acï dhuëëŋ de këcam looi, ku acïn raan däŋ cï cɔɔl, ee yɛn wokë Melik waarou, ku acï wo bɛ cɔɔl buk lɔ miäk,

¹³ ku ee kakë kedhie, acïnkï naamden tëde yɛn, të ŋuɔɔt ɛn ke ya ye Modekayo tïŋ, raan ë Judai ke tɔ̈u ë kal ë ɣöndïït ë Melik thok.”

¹⁴ Ëtɛ̈ɛ̈n acïï tiiŋdɛn Dherec ku lɔ määthkɛn nu abärɔ yic kedhie bɛ̈ɛ̈r an, “Tɔ tim dïït ye bɛ̈ɛ̈r de yen kɔ̈u mitïïr kathiërrou ku diäk ke lɔ nhial piëëtë. Ku miäk adurduur ke yïn duëër Melik yɔ̈ɔ̈k bï Modekayo tɔ näk ee timë kɔ̈u, ku ëtɛ̈ɛ̈n jɔ lɔ ë dhuëëŋic wekë Melik ke yï mit piɔ̈u.” Go Ɣaman gam an, kënë ee täŋ piɛth, ku tɔ tim dïït agök piëëtë.