Ethta 4 - JAM DE NHIALIC 2011

Modekayo Athiëc Kuɔɔny Tëde Ethta

¹ Na wën aa lɔ Modekayo kë cï looi ŋic, ke ret lupɔɔ yiic ë yekɔ̈u, ku tɛ̈ɛ̈u lupɔɔ ke cuɔl, ku wɛ̈l ŋeth ë yenɔm në dhiën ë piɔ̈u ku lee wutic cil ke dhiau ë röldït, ke cï piɔ̈u kɛc në jiɛth ë piɔ̈u,

² agut të ɣëët en ë kueer lɔ paan ë Melik, ku akën bɛ̈n lɔ ɣöt, në biäk cïï kɔc ceŋ lupɔɔ ke cuɔl ee päl lɔ ɣön ë Melik.

³ Ëwuötiic kedhie, wuöt cïï löŋ de Melik piŋ thïn, ee yic dɛ dhiën dïït agök tëde kɔc ke Judai. Aake moc kiɛɛu, dhiaukï, ku reeckï cäm, të dït ë keek aake cieŋ lupɔɔ ke cuɔl ë ke kɔ̈ɔ̈th ku yek röt daal ë ŋethic.

⁴ Na wën ke duet lui ë Ethta ku roockɛn ee ye tiit lëk Ethta kë cïï Modekayo looi, ku kënë acï Ethta bɛ̈n gäm jam ë piɔ̈u arëët, ago tuöc lupɔɔ piɛth, ke bï lupɔɔ ke cuɔl lɔ wɛ̈ɛ̈r bei, ku akën ke bɛ̈n gam.

⁵ Go Ethta Ɣathac cɔɔl, raan töŋ de rooc, cïï melik kuɛ̈ny Ethta ke ye lïmde, ago tooc bï lɔ tëde Modekayo, ku bï luɔp eeŋö cï rɔt looi? Ku ee biäk de ŋö?

⁶ Go Ɣathac lɔ tëde Modekayo wutic cil ë pëëric, në kueer lɔ të nu ɣöndïït ë Melik.

⁷ Go Modekayo lɛ̈k këriëëc cï tuöl tëde yen ëbɛ̈n, ayïï kuën ë wëu cïï Ɣaman ke than piny an bï ke tääu në kakuön ë bääny ë melikic, të bïï kɔc ke Judai nɔ̈k kedhie.

⁸ Ku gëm Ɣathac awerek de löŋ cï bɛ̈n biic ë Thutha, yöök kɔc bï kɔc ke Judai lɔ riɔ̈ɔ̈r nyïïn, ku yöök Modekayo Ɣathac bïï awerekë nyuöth Ethta, ku lɛ̈k kë cï rɔt looi thïn, ku bïï lɔ jam kekë Melik, na de të bï yen piɔ̈u kok kekë kɔc ke Judai.

⁹ Ago Ɣathac ee kënë looi,

¹⁰ go Ethta bɛ gäm ee thoŋë, bïï pɔ̈k nɔm Modekayo an,

¹¹ “Kɔc lui baai de Melik, ayïï raan ëbɛ̈n ë wuötiic, aŋickï, ee löŋ cïn raan pɛ̈l, nɔn yen moc ku nɔn yen tik, të cïï yen lɔ ɣöt thok ke kënë cɔɔl, raanë aye nɔ̈k. Ee të yen raan cïï Melik ɣɔ̈k wai de adhääp nyooth luɔi cï ye gam, yen aye pïïr. Ku ee nɔɔnë, acïï aa pɛɛi tök ë kööl ɣɔn cïï Melik a tɔ cɔl.”

¹² Na ɣɔn aa lɔ Modekayo thön ë Ethta yök,

¹³ go tuöc thoŋ bï ye jɔ̈ɔ̈ny an, “Ye lueel an bï yï kony wëi awär kɔc ke Judai kɔ̈kë, në biäk cïï yïn aa tiiŋ ë Melik, ku rɛ̈ɛ̈rë paandïït de Melik!”

¹⁴ Na jɔ mim ke cïn kë luel, në akööl cït aa köölkë, ke kuɔɔny de Judai abï bɛ̈n tëdäŋ, ku abï keek kony wëi, ku yïn abï thou, ku baai de wuur abï nyin riäär ëbɛ̈n. Ku eeŋa ŋic en, nɔn ë bïï yïn, abä ya tiiŋ ë Melik në biäk de kë cït ee kënë!”

¹⁵ Go Ethta lɛ̈k en bï pɔ̈k nɔm Modekayo an,

¹⁶ “Lɔ määtë kɔc ke Judai kedhie, kɔc nu ë Thutha, bïk thek në biäkdï, ë ke cïï cäm ku cïkkï dëk ë nïn kadiäk aköl ku wakɔ̈u, ku yɛn wokë duet lui ë yɛn, wok bï thek aya cït man ë kek, ku ëtɛ̈ɛ̈n yɛn bï jɔ lɔ tëde Melik na cakaa nɔn yen dhäŋ de löŋicë, na cï ya nɔ̈k ë ya thou.”

¹⁷ Go Modekayo jäl ku looi ka cïï Ethta lɛ̈k en kedhie.