Ethta 3 - JAM DE NHIALIC 2011

Ɣaman Aloi Kiɛɛr bïï Judai Nɔ̈k Kedhie

¹ Na ɣɔn acï nïn lɔ, ke Melik Athuwereth ë ŋuak Ɣaman në bääny, yen Ɣaman wën Ɣamedatha, raan de Agak, ke ye bɛ̈ny tɔ̈u në bäny nïïm, bäny nu në Melik cök.

² Go Melik kɔc lui baaide yɔ̈ɔ̈k, bïk riëëuden nyuöth Ɣaman, në tuŋ de miɔl kekë guŋ ë yenɔm. Go kɔc kedhie looi aya, ku ee Modekayo yen acï jaai, në luɔi bï yen e looi aya.

³ Go kɔc kɔ̈k lui baai de Melik yen aa thiëëc në kë yen jaai në jam cïï Melik lueel,

⁴ ayek them aköölnyïïn kedhie na de të bï yen e gam, ku akën ke bɛ̈n gam thook, acï lɛ̈k keek an, “Yɛn ee raan ë Judai, ka yɛn cïï yamiɔl duëër tuk, ku guöt yanɔm piny ee Ɣaman nɔm.” Gokï lɔ tëde Ɣaman ku lëkkï yen ke bï tïŋ da, na de të bï yen jam de Modekayo guum.

⁵ Ɣaman acï piɔ̈u bɛ̈n riääk arëët, ɣɔn cï yen e jɔ ŋic nɔn cïï Modekayo yemiɔl duëër kɔn tuk ku gut enɔm piny ë yenɔm.

⁶ Na ɣɔn ale ye ŋic nɔn ye Modekayo raan ë Judai, ke tak këtuc wär kë duëër luöi Modekayo yetök, go kiɛɛr rac luöi kɔc ke Judai tɔ̈u piny cieŋ ë Melik Athuwereth ëbɛ̈n, an bï keek nɔ̈k.

⁷ Na wën, aacï Melik Athuwereth run thiëër ku rou ë bäänyic, ë pɛɛi tueŋ cɔl Nithan (yen aye Bildït në thoŋda), ke Ɣaman ë yöök kɔc bïk gɛk dɛɛny ku ayek gɛk cɔɔl an Pur, ke ke bï kööl bï kek kiɛɛrdɛn cïk mat looi thïn ŋic. Go gɛk pɛɛi ë thiëër ku rou lɔc, pɛɛi cɔl Adar (yen aye Aköldït në thoŋda).

⁸ Ëtɛ̈ɛ̈n go Ɣaman lɔ tëde Melik Athuwereth ku lueel an, “Ade Jur cï thiëi ë wuötku yiic ëbɛ̈n, adekï ciɛɛŋ cïï thöŋ ke ciɛɛŋ ë juöör kɔ̈k, ku däŋ aya, keek, acïkï lööŋ ke Melik ee riëëu, ka yen, acïï piɛth tëde Melik në luɔi duëër en ke pɔ̈l.

⁹ Na duëër yï miëtpiɔ̈u, ke yïn duëër löŋ tääu piny, bï ë keek nɔ̈k kedhie. Ku na lɔ ee kënë looi, ke yïn bä gäm kë wär thëm de bot kadiäk ku thiërŋuan de agum 340,000 de kilɔɔ ke atek, bï ke gäm kɔc ee kake bäny muk, bïk ke tääu ë kakuön ke bääny yic.”

¹⁰ Go Melik këtimdɛn yen käŋ thaany ruɛ̈c bei në yecin ku gëm Ɣaman wën ee Ɣamedatha, raan de Agak, raan de ater ë kɔc ke Judai.

¹¹ Go Melik lɛ̈k en an, “Wëu ke kɔc në ke tɔ̈u ë yï, ku luöiyë kɔc këduön cï tak.”

¹² Ëtɛ̈ɛ̈n ɣɔn acïï nïn thiëër ku diäk de pɛɛi tueŋ guɔ ɣëët, ke Ɣaman ë cɔl kɔc ee kak ke Melik gɔ̈ɔ̈r, ku kuën keek löŋde, bïk pukic ë thook ke juöör ëbɛ̈n, ku gäär ke në kueer ye kɔc ke ee pinyë kaken gɔ̈ɔ̈r, ku bï ke tuöc bäny ke baai, ku bäny mac wuöt kedhie, bäny ke juöör, ku gäär keek ë rin ke Melik Athuwereth, ku jɔ keek thanyiic në këtim de Melik.

¹³ Ku jɔ ke gäm tuuc, bïk awereekë tɛk ë wuötiic kedhie. Ku awereekë ayöökkï bäny ë wuötiic an, kööl töŋ de nïn thiëër ku diäk de pɛɛi Adar, kɔc ke Judai kedhie, raandït, ku meth, ayïï diäär ëbɛ̈n ë ke näk keek kedhie. Ë ke tem ë ke röt, ke cïn raan kok piɔ̈u ke keek, ku kaken ë ke rum.

¹⁴ Awereekë acï ke looi ke ke juëc ë wuötiic kedhie ke ye löŋ, ku jɔ ke caal në kɔc nïïm kedhie, ke raan ëbɛ̈n bï rɔt coc, të le ee köölë bɛ̈n.

¹⁵ Kë cïï Melik lueel, ë löŋic ëbɛ̈n, acï kuɛ̈n kɔc nu tëde riɛl ë Thutha, ku dap kakë lɛɛr ë wuöt yiic. Melik ku Ɣaman aake cï nyuc piny, ku jɔkï dek, ku nu pänydïït Thutha ë anuɔɔn yic, në kë de ee löŋë.