Ethta 2 - JAM DE NHIALIC 2011

Ethta acï aa Tiiŋ Melik

¹ Na ɣɔn aacï ee kakë wan, ku cï agönh ë Melik Athuwereth jɔ lɔ piny, go Bacti tiiŋde tak, ku kë cï looi, ku kë ye löŋ lueel në biäkde.

² Go kɔc ee Melik luööi lɛ̈k en an, “Eeŋö cïï dhueec läk löc Melik në wuötiic, dhueec kën kɔn yök ë röör?

³ Yïn duëër bäny kuany ë wuöt ke ciɛɛŋdu yiic ëbɛ̈n, ku lɛ̈kë keek bïk duet läk kuany ku tuuckï ke kedhie ɣönduön ë duet ee tënë, tëduön ë riɛl nu ë Thutha wën tɔ̈u yïn thïn. Ku bï keek bɛ̈n tääu ë Ɣegai ciin, raanduön cï roc wën ee diäärku tïŋ, ku bï keek aa tɔ tɔc ë wɛ̈ɛ̈l piɛth ee läk ŋuak.

⁴ Ku ëtɛ̈ɛ̈n, yïn bï rɔt jɔ lɔ̈c nyan dhueny cï nhiaar ke bï ya tiiŋ melik, abï jɔ lööny ë nyin de Bacti yic.” Go Melik yök ke ye jam piɛth go looi aya.

⁵ Wutic, tëde riɛl ë Thutha ëtɛ̈ɛ̈n, aa de raan ë Judai nu cɔl Modekayo, wën ë Jayir, ku Jayir ee wën ë Cimei, ku Cimei ee wën ë Kic, dhiën ë Benjamin.

⁶ Ku yen Modekayo aa tɔ̈u ɣɔn peecë Jekonia, Meliŋ de Juda ë Jeruthalem kekë kɔcke në Nebukadnedhar, Meliŋ de Babilon.

⁷ Modekayo ade nɔm nyan ë wulënë cɔl Ethta, nu rinkɛn kɔ̈k në thoŋ de Ɣeberuu acɔl Ɣadatha, yen aaye nyan läk arëët. Ɣɔn cïï wun ke man thou, acï bɛ̈n döŋ ë Modekayo cin ku löök muk apiɛth ke cït nyan ë nɔmde.

⁸ Na ɣɔn aa lɔ Melik löŋdɛn kɔɔr en duet läk caal, ke duet juëc acï ke bɛ̈n bɛ̈ɛ̈i tëde riɛl nu ë Thutha, ku nu Ethta ke keek, ku jɔ ke tääu ɣöndïït ë Melik në Ɣegai ciin, raan ee duet tiit.

⁹ Go Ɣegai Ethta nhiaar, yen acïï piathde lɔ ë yepiɔ̈u. Aaye Ethta dap gäm wɛ̈ɛ̈l ë läk, ku kacaam piɛɛth ee guöp muk, go lɔ̈c tëdäŋ piɛth nu ɣön ë duet, ku kuëny duet kadhorou baai de Melik bïk en aa luööi.

¹⁰ Ku yen Ethta, aa muk löŋ wään cïï Modekayo kɔn lɛ̈k en an, cïï rɔt bï luɛɛl nɔn ee yen nyan ë Judai.

¹¹ Akööl nyïïn kedhie Modekayo ee cool ke tëk ë ɣön ë duet thok ke bï nïn niin ë Ethta ŋic ku kë rɔt bï luöi yen.

¹² Töny ye duet tɔc në wɛ̈ɛ̈l ë läk ee ruöön thöl, pɛ̈i ye ke miök de mer tac ayek dhetem ku miök de wɛ̈ɛ̈l cɔl baltham në pɛ̈i kɔ̈k kadhetem. Ku ëtɛ̈ɛ̈n duet abï ke jɔ aa lɔ jɔt ë tök ë tök yïnë ke Melik Athuwereth.

¹³ Të jɔtë ye ɣön ë duet, leerë ɣöndïït ë Melik, aye gäm këdɛn kɔɔr ë yepiɔ̈u bï cieŋ.

¹⁴ Yen ee lɔ thëën, na miäk të cï piny ruu, ke jɔt leerë ɣön ë diäär däŋë, ku gëmë Caagath, mony cï roc ee diëër määth ë melik tiit. Ku yen ë nyanë acie bɛ lɔ tëde melik, ee të cïï melik ye nhiaar në nhiëërdït, ago bɛ tɔ cölë ye në rinke.

¹⁵ Na ɣɔn acï kööldɛn bï yen lɔ tëde Melik bɛ̈n yen Ethta, nyan ë Abiɣail, ku ye nyan ë wulënë ee Modekayo ɣɔn muk cït nyande, acïn ke cï bɛ̈n thiëëc, ee kë cïï Ɣegai mony cï roc lɛ̈k en. Ku läk de Ethta ee raan ëbɛ̈n raan cï ye tïŋ diir.

¹⁶ Ëtɛ̈ɛ̈n Melik Athuwereth aaye run dhorou ë bäänyic, ë pɛɛi ë thiëëric pɛɛi cɔl Tebeth, Ethta acï bɛ̈n lɛɛr tëde Melik Athuwereth ɣöndït ë Melik.

¹⁷ Go Melik Ethta nhiaar awär duet kedhie, go tiam në duetiic, në luɔi cïï Ethta lɔ në yepiɔ̈u, go piɔ̈u kok ke yen, ago yiëk nɔm göl ë bääny, ku jɔ looi ke ee yen ee tiiŋ melik, ku bï lööny ë nyin ë tiiŋdɛn cɔl Bacti yic.

¹⁸ Ëtɛ̈ɛ̈n go Melik dhuëëŋdït agök looi, dhuëëŋ en Ethta guöp, ku jɔ bäny tɔ̈u ë yecök cɔɔl ku kɔc lui baaide, ku jɔ luɔi tɔ kääc wut ëbɛ̈n, ku tëk kɔc miɔ̈c ke miɛt ë piɔ̈u cï gam në dhuëëŋde.

Modekayo Akony Melik Wëi

¹⁹ Ɣɔn mɛ̈ɛ̈të duet dhueec yiic në këde rou, Modekayo aa lui në kake bääny de Melik yiic.

²⁰ Ku Ethta aya, akën rɔt tɔ ŋic nɔn ee yen nyan ë Judai, aa cï Modekayo thɔ̈n en, ku aaye Modekayo riëëu në ye kënë cït man ɣɔn rëër en në yeciin.

²¹ Na köölkë ɣɔn luui ë Modekayo baai de melik, go kɔc ren ke rooc wën ee ɣön de melik tiit thok, cɔlke Bigathana ku Terec acïk piɔ̈ɔ̈th bɛ̈n riääk në Melik Athuwereth, gokï luöi kiɛɛr bïï kek en nɔ̈k.

²² Na wën aacï Modekayo ë kënë jɔ ŋic go lɔ ku lëk tiiŋ Melik Ethta kë cï yök, go lɔ ku lɛ̈k Melik Athuwereth yen kë cïï Modekayo lɛ̈k en.

²³ Ëtɛ̈ɛ̈n go jɔ lɔ luɔpic. Na ɣɔn aacï kë cï lueel aa yic, go kɔc renkë dɔm ku nök keek, ku yöök Melik kɔc an kënë, abï gäär piny në Melik nɔm në awerek de gäär de kake luɔi de akööl ke melik yiic.