Ethta 1 - JAM DE NHIALIC 2011

Melik Athuwereth acïï Tiiŋdɛn Bacti Rɛɛc Thok

^1-2 Na ɣɔn ke melik Athuwereth nyuc ë thönyde nɔm piny de Perthia, në pänydït de Thutha. Melik Athuwereth aa mac piny dït, jɔt ë Yindia agut cï piny de Kuc, wuötdït ë mɛc keek ayek bɔt ku thiërrou ku dhorou.

³ Na ɣɔn aacï runke aa diäk ë bäänyic, go dhuëëŋdït agök looi, cɔɔl en bäny tɔ̈u ë yecök, ku kɔc luui baaide, ku rem de tɔŋ de Perthia ku Media, ku röördït ke baai, ku bäny mac wuöt,

⁴ ku jɔ dhuëëŋ ŋoot ke loi në nïn kabɔt ku thiërbɛ̈t. Anyooth luɔi kueth kek në bäänyde yic ku kajuëc nyooth läk de dhuëëŋde.

⁵ Ɣɔn aacï ee nïnkë thök, ke Melik ë lui kɔc wut kedhie dhuëëŋ, kek kɔc kueth ayïï kɔc kuanynyïïn rɛ̈ɛ̈r tëde riɛl nu ë Thutha. Aa thöl nïn kadhorou kedhie, ku aa loi në kal de baai de Melik yic.

⁶ Domdïït nu ëtɛ̈ɛ̈n acï geeu ë lupɔɔ de yiic kïn aräu cït luäät, ku ka ɣer cït alath, ke ke cï rek thook ë awiɛɛth cï wi, ku tɔc ke kɔ̈ɔ̈th ë kïn thith, ayïï kɔ̈k lɔ bilbil, cït adhɛ̈p, ayïï atek, ku lupɔ piɛth lɔ mot, ku lupɔɔ amujuŋ, ku kakë rëër cï looi në adhɛ̈p ku atek, kaɣer lɔ jämjäm, ku gomgooi, ku kuur läk cï ke tääu ëtɛ̈ɛ̈n.

⁷ Kɔc acï ke miɔɔc ë mɔ̈u ë cuöp cï ke thɔ̈ɔ̈th adhɛ̈p, kek koth ke dëkë kedhie acïkï thöŋ. Mɔ̈n paan ë Melik acï looi ke ee mɔ̈ndïït cï gaam në dhuëëŋde.

⁸ Mɔ̈n baai de Melik aa dek në löŋ cïï Melik tääu piny an, lëkë bäny ke luɔi de baaide, bïk kɔc cï guëër domic ëtɛ̈ɛ̈n dhil riëëu, të cïï raan töŋden cööt në kë kɔɔr ke bï dhil luöi yen.

⁹ Ku ëtɛ̈ɛ̈n, go Bacti tiiŋ Melik dhuëëŋdïït agök bɛ looi, cɔɔl en diäär ɣöndɛn dïït de melik Athuwereth.

¹⁰ Na ɣɔn ë kööl ee nïn ke dhuëëŋ dhorou, go melik Athuwereth rɔt yök ke cïï mɔ̈u lɔ ë yenɔm, go roockɛn ee ye luööi kadhorou cɔɔl yï: Meɣuman kekë Bidha ku Ɣarbona ku Bigtha ku Abagatha ku Dhethar ku lɔ Karkath.

¹¹ Go Melik ke yɔ̈ɔ̈k bïk Bacti tiiŋ Melik lɔ bɛ̈ɛ̈i, ke ceŋ göldɛn ë bääny de Melik. Bacti ee tiiŋ läk aläl, ku akɔɔr ë Melik bïï läkdɛnë nyuöth röördït ke luɔide, ku kamaanke kedhie.

¹² Na wën aa lɔ rooc ee thoŋë lɛ̈k Bacti tiiŋ Melik, go ke rɛɛc thook, ku kënë ë Melik bɛ̈n riɔ̈ɔ̈k piɔ̈u.

¹³ Kënë anu në ciɛɛŋ de Melikic, ee kɔcke luɔp piɔ̈ɔ̈th, të de yen kë duëërë looi. Na wën ke melik ë yöök röör pelnïïm ee nïïm tiëër në ka bï röt luɔɔi, ku ŋickï lööŋ, ku wël ye kɔc ke röt mac, ago ke yɔ̈ɔ̈k në kë duëërë looi.

¹⁴ Kek kɔcdïtkɛn ye ke dap cɔɔl, ee yïï Karcena ku Dhethar ku Adamatha ku Tarcic ku Mereth ku Matherna ku lɔ Memukan, kɔc kadhorou ke Perthia ku Media nu në kɔc nïïm kedhie, kɔc tɔ̈u në Melik cök.

¹⁵ Go lɛ̈k keek an, “Yɛn, melik Athuwereth, yɛn aacï rooc tuöc Bacti tiiŋ melik, ku yen acï bɛ̈n jaai ke cïï bɔ̈, ku eeŋö ye löŋ lueel në kë duëërë luöi yen?”

¹⁶ Go Memukan lɛ̈k Melik ku bäny lɔ yecök an, “Bacti, tiiŋ Melik, acie Melik Athuwereth yen ë lɛ̈ɛ̈t yetök, yen ayadäŋ ëbäny nu ë Melik cök lat, ku mɛt kɔc nu piny mɛcë yic ëbɛ̈n.

¹⁷ Tik ëbɛ̈n ee piny macë yic, abï kë cï tiiŋ ë Melik looi piŋ, ku abïk röörken aa biɔɔn gup. Abïk lueel an, ‘Melik Athuwereth acï Bacti, tiiŋ Melik tɔ cölë ye, ago jai.’

¹⁸ Të le diäär ke bäny ke Perthia ku Media nu ë Melik cök e piŋ, yen tän tɔ̈u ë tiiŋ melik, abïk lät röörken aŋoot akɔ̈l ke kën thok bɛ̈n. Diäär kedhie ë ɣäänkɛn rëër kek thïn, acïkï röörken bï bɛ riëëu, ku röör abïk aa gɔ̈th ë diäärken.

¹⁹ “Të mit en në Melik piɔ̈u, ke tɛ̈ɛ̈u löŋ piny në luɔi cïï Bacti duëër bɛ bɛ̈n në Melik Athuwereth nɔm. Luel kë bï gɔ̈ɔ̈r ë lööŋ ke Perthia ku Media yic, ke cïï bï waar taitai, ku gɛ̈më bäänydɛn ee yen tiiŋ ë Melikë tiiŋ däŋ ŋuän në yen.

²⁰ Të le löŋduönë ŋic ciɛɛŋduön dïït macë, ke diäär abïk röörken ŋiëc aa riëëu, të ciɛk röörken kuɛth ku nɔn kuɛnykï nyïïn.”

²¹ Go Melik kekë bänykɛn lɔ në yecök piɔ̈ɔ̈th miɛt ë täŋë, ago looi cït man cïï Memukan e lueel.

²² Ago awereek tuɔɔc ë wuötiic, wuöt mɛc ë Melik keek ëbɛ̈n, ku gäär awereekë në thookken ku kuɛɛr ye kek ke gär an, moc ëbɛ̈n yen abï aa nɔm de baaide, ku yen abïï aa wun löŋ.