Epethiei 6 - JAM DE NHIALIC 2011

Mïth ku Kɔc ë Dhiëthke

¹ Wek mïth, yak ka ke kɔc ë dhiëth week piŋ ë Bɛ̈nydïtic: kënë dï, yen apiɛth.

² Ye wuur riëëu kekë moor (kënë ee cöök tueŋ ë löŋic cöök de yic jam de kë bï gäm raan),

³ “ke yï bï tɔ̈u apiɛth, ku yïn bï pïïr ë run juëc ë piny nɔm.”

⁴ Ku week, wek wärken ë mïth, duökï mïthkun ë cool ë juöt wek ke gup, abïk gɔ̈th, ku yak ke muk ë muŋ de Bɛ̈nydït ayï wëëtde.

Lïïm ku Bäny

⁵ Wek lïïm, yak ka ke bänykuön ë week cieŋ gup piŋ, në riëëu ku lɛ̈thë guöp, në piɔ̈n cïnic anäinäi, cït man ee yen Kërtho en luööikï.

⁶ Duökï ee luui ë kë woi kɔc, cït man ë kɔc ee kɔc math nyïïn, yak luui cït man ë lïïm ke Kërtho, abäk këde piɔ̈n ë Nhialic aa looi ë wepiɔ̈ɔ̈th thïn.

⁷ Yak käŋ looi në piɔ̈n mit, acït man ë këde Bɛ̈nydït, acie këde kɔc.

⁸ Në ŋïny ŋiɛc wek cöökë an, të de en këpiɛth ee raan looi, ke yen abï yök tëde Bɛ̈nydït, nɔn ee yen lïm, ku nɔn ee yen raan lääu nɔm.

⁹ Ku wek bäny de nïïm lïïm, yak luui wäklë ayadäŋ tëde lïïmkun, yak wɛ̈i pɔ̈l wɛ̈i aa wek ke waai: në ŋïny ŋiɛc wek cöökë an, Bɛ̈nydun week ayadäŋ anu paannhial, ku acïn kuëny ee yen kɔc kuany yiic.

Wëu ke Tɔŋ ë Nhialic

¹⁰ Cöök ciëën, mïthëkɔckuɔ, yak riɛl ë Bɛ̈nydïtic, në riɛl dïït ril en.

¹¹ Yak ka ke tɔŋ tääu ë wegup kedhie, wëu ke Nhialic, luɔi bä wek kɔ̈ɔ̈c lëu apiɛth në ŋeeny aa wek cäp de jɔŋdït rac ŋɛ̈ny.

¹² Wo cie wït në rïŋ ku riɛm, wok ee wït në ciɛɛŋ, ayï riɛl, ayï bänydït ke cuɔlëpinyë ënɔɔnë, ayï rɛm ke jɔɔk rac, rɛm nu tënhial, kek a wït wok ë ke.

¹³ Yen nääm wek ka ke tɔŋ ëbɛ̈n wëu ke Nhialic, luɔi bä wek biök aa lëu apiɛth ëkööl rac, ku të cä wek käŋ thöl kedhie, ke we bï tɔ̈u ë we kääc.

¹⁴ Yen aa wek kɔ̈ɔ̈c, ke we cï weyiic duut në thiönh cɔl yic, ku tääukï ke bä wek weyöth kum, yen aye piathëpiɔ̈u,

¹⁵ ku ciɛŋkï war ë wecök, wɛɛr ke guiɛɛr de wëlpiɛth ke mät,

¹⁶ ku awär käŋ nïïm kedhie, nämkï kön ë gäm, kön bä wek tɔɔŋ aciɛɛr ke raan rac aa nɔ̈k kedhie, tɔɔŋ de thook mac.

¹⁷ Ku nämkï akup de kunydewëi aya, kekë abätäu de Wëidït, yen aye jam de Nhialic.

¹⁸ Ku yak cool ë lɔ̈ŋ ë aköölnyïïn kedhie në lɔ̈ŋ ëbɛ̈n ku pal ë Wëi yiic, ku yak cök ë tiɛɛt wek röt ë keyiic, në ŋäŋ aa wek wenïïm ŋak arëët ku pal aa wek pal në biäk de kɔc ɣerpiɔ̈ɔ̈th kedhie.

¹⁹ Ku në biäkdï aya, luɔi bï a miɔɔc ë jam bän athok liep ke ya cïï riɔ̈c, aguɔ këcïmoony ɣɔn tɔ ŋic, kek aye wëlpiɛth.

²⁰ Ku luɔi aa yɛn tuny guiir keek, en a mac ɛn ë joth: yak jɔ lɔ̈ŋ, ke ya bï jam ë jam bän dhil jam, ke ya cïï riɔ̈c.

Thiëc Ciëën

²¹ Ku ënɔɔnë, luɔi bä wek kakï ŋic, ku ŋiɛckï täu täu ɛn, we bï Tukiko tɔ ŋic käŋ kedhie, yen aye mɛnhkënëdan nhiaar, ku ye raan ë käŋ ŋiëc döt në luɔi de Bɛ̈nydït.

²² Ee ŋïny bä wek ɣön ë Nhialic ŋic, ku muŋ bï en week muk piɔ̈ɔ̈th, yen kë ë tuöc ɛn en week ka.

²³ Ë mät tɔ̈u ke mïthëkɔckuɔ, ayï nhiëër kekë gäm, në ke bɔ̈ tëde Nhialic Wääda kekë Bɛ̈nydït Yecu Kërtho.

²⁴ Ë dhuëëŋdepiɔ̈u tɔ̈u ke kɔc kedhie kɔc nhiaar Bɛ̈nydan Yecu Kërtho në piɔ̈n agɔk. Amiin.