Epethiei 5 - JAM DE NHIALIC 2011

Rëër në Ɣɛɛric

¹ Yen dam wek täu de Nhialicic, cït mïthkɛn nhiɛɛr.

² Ku rɛ̈ɛ̈rkï në nhiëëric, acït man cï Kërtho wook nhiaar, ago rɔt gaam në biäkda, tɔ rɔt ë kë cï gäm Nhialic, ku näk, ago awäu cï tumëtum bɛ̈ɛ̈i.

³ Ku bal, ayï luɔi col ëbɛ̈n, ayï wui de kalei, duökï ke tɔ luel rin ë weyiic, acï piɛth tëde kɔc ɣerpiɔ̈ɔ̈th.

⁴ Ayï jam ë rɔ̈ɔ̈th, ayï jam ɣɔ̈ric, ayï alɛɛŋ rac, acïkï piɛth kedhie: aŋuɛ̈ɛ̈në lɛc de Nhialic.

⁵ Kënë aŋiɛckï ëgɔk an, acïn raan ee diäär kɔɔr, ku cïn tiiŋ ee röör kɔɔr, ku cïn raan ee luɔi col looi, ku cïn raan ee kalei woi, yen aye raan ee yath lam, acïn raan ë keyiic, raan bï dɛ kë bï lɔ̈ɔ̈k lak ë Ciɛɛŋ de Kërtho yic kekë Nhialic.

⁶ Ë cïn raan ee we math ë wël ɣäär yiic: agönh ë Nhialic abɔ̈ ë kɔc reec gäm nïïm në biäk de ka cït ee kakë.

⁷ Yen duö wek ee rɔm ëtök në keek.

⁸ Wek aaye cuɔlëpiny ɣɔn, ku ënɔɔnë, wek ee ɣɛɛrëpiny ë Bɛ̈nydïtic: rɛ̈ɛ̈rkï ë rëër ë mïth ke ɣɛɛrëpiny,

⁹ kak ye ɣɛɛrëpiny ke luɔk ayek luɔi de këpiɛth ëbɛ̈n ku piathëpiɔ̈u ku yic.

¹⁰ Yak ka mit ë Nhialic piɔ̈u thɔ̈ɔ̈ŋ ë wepiɔ̈ɔ̈th.

¹¹ Ku duökï röt ee mat në luɔi de cuɔlëpiny, luɔi cïnic kë ye yök thïn, aŋuɛ̈ɛ̈n ë luɔi bä wek kɔc loi en aa jɔ̈ɔ̈ny.

¹² Ka yek looi ëcuëër ee ayäär të ciɛk an, lueel ke.

¹³ Ku käŋ kedhie, të cï ke jɔ̈ɔ̈ny, aye ke tɔ tiëc në ɣɛɛrëpiny: ku të de kë ye käŋ tɔ tiëc yen aye ɣɛɛrëpiny.

¹⁴ Yen a lueel en en an, “Jɔ pääc, yïn ë raan ninë, jɔt rɔt ë kɔc cï thou yiic, ke yï bïï Kërtho riaau.”

¹⁵ Yen tiɛɛt wek röt, ku yak cath aŋiɛckï, cït kɔc pelnïïm, duökï ee cath ë cäth ë dhän.

¹⁶ Yak ka ke ënɔɔnë wɛ̈ɛ̈r bei ë këracic, në rac rɛɛc akööl.

¹⁷ Yen duö wek röt tɔ ye kɔc mum nïïm, yak röt tɔ ye kɔc ŋic këde piɔ̈n ë Bɛ̈nydït.

¹⁸ Ku duökï röt ee tɔ wit mɔ̈u, ee mumënɔm bɛ̈ɛ̈i, yak röt tɔ thiäŋ ë Wëidït.

¹⁹ Yak jam wapäc në diɛt ku diɛt kɔ̈k ke Nhialic ku diɛt ke ka ke Wëi, yak diɛt ket ku yak Nhialic piɔɔny ë wepiɔ̈ɔ̈th.

²⁰ Yak cool ë luɛɛl wek en an, thieithieei Nhialic Wääda, në baŋ de këriëëc ëbɛ̈n, në rin ke Bɛ̈nydan Yecu Kërtho.

Diäär ku Röörken

²¹ Ë ŋɛk ë tɔ̈u ë ŋɛk cök në riëëu riëëu wek Kërtho.

²² Wek diäär, yak tɔ̈u ë röörkun cök, röörkun gup, acït man täu wek ë Bɛ̈nydït cök.

²³ Luɔi ee yen moc yen aye nɔm de tik, cït man ee Kërtho nɔm de ɣön ë Nhialic, ku yen aye kony de guöp.

²⁴ Ku acït man tɔ̈u ë ɣön ë Nhialic ë Kërtho cök, yen acït täu duëërë diäär tɔ̈u ë röörken cök röörken gup në këriëëc ëbɛ̈n.

²⁵ Ku wek röör, nhiaarkï diëërkun acït man cï Kërtho ɣön ë Nhialic nhiaar aya, ago rɔt gaam në biäkde.

²⁶ Luɔi bï en e tɔ ɣeric ëwic, të cï en e tɔ piɛth, në wɛ̈k cï e waak ë pïïu në jam,

²⁷ luɔi bï en e tääu ë yenɔm, abï aa ɣön ë Nhialic de yic dhuëëŋ, ke cïnic këthiin rac, ayï anyuin, ayï däŋ cït ee kënë aliu, ku abï yic ɣɛɛr ëwic ku cïnic kë bï e gɔ̈k.

²⁸ Yen acït nhiëër duëërë röör diëërken nhiaar aya, cït man nhiɛɛr kek kegup. Raan nhiaar tiiŋde ke nhiaar rɔt.

²⁹ Acïn raan ee rïïŋ de yenguöp maan anande, aye muk apiɛth ku ye tiit apiɛth, cït man ee Kërtho ɣön ë Nhialic muk ku ye tiit apiɛth,

³⁰ ë luɔi ee wok ka ke yenguöp, ka ke rïïŋde, ku ka ke yomke.

³¹ “Yen abï moc wun pɔ̈l ku pɛ̈l man, ago rɔt mat ke tiiŋde, agokï aa rïïŋ tök keek kaarou.”

³² Kënë ee këcïmoony ë kɔc dhal arëët: ku ye jam në këde Kërtho kekë ɣön ë Nhialic.

³³ Ku wek, raan ëbɛ̈n ë ye tiiŋ de yenguöp nhiaar cït man nhiɛɛr en rɔt, ku tik ë ye monyde riëëu.