Epethiei 4 - JAM DE NHIALIC 2011

Mät në Guöpic

¹ Ya kï, yɛn ee raan cï mac në këde Bɛ̈nydït, wek läŋ nɔn bä wek rëër ë rëër piɛth rëër röŋ ke cɔ̈t ë cɔɔlë week.

² Në kuur aa wek röt kuɔɔr piny, ku në rëër aa wek rëër ëmääth, ku në liɛɛr ë wepiɔ̈ɔ̈th, bäk aa rëër apiɛth ëtök në nhiëër.

³ Yak cök ë thɛm wek e apiɛth ke we bï piɔ̈n töŋ de Wëidït aa muk në duöt cï we duut ë mätic.

⁴ Ee guöp tök yen nu, ku Wëidït tök, acït man cï we cɔɔl në aŋäth tök, aŋäth ë cɔ̈t ë cɔɔlë week.

⁵ Bɛ̈nydïït tök, gäm tök, baptith tök,

⁶ Nhialic tök, Wun kɔc kedhie, nu ë kɔc nïïm kedhie, ku ye luui ë kɔc yiic kedhie, ku nu ë weyiic wedhie.

⁷ Ku wo cï yiɛ̈n dhuëëŋdepiɔ̈u wo wodhie, acït man ë thëm cï miɔ̈c de Kërtho thɛ̈m wook.

⁸ Yen a lueel en en an, “Ɣɔn le yen nhial, ke thel kë ye kɔc mac ke mac, Ku jɔ kɔc miɔɔc në käŋ.”

⁹ Ku lɔ ë le yen nhial, ee käŋö? Cie ɣet cï en kɔn ɣet piny tëthuth ya ayadäŋ?

¹⁰ Raan cï ɣet piny yenguöp yen aye raan cï lɔ nhial ya aya, acï tënhial wöör ëbɛ̈n arëët, luɔi bï en këriëëc thiɔ̈ɔ̈ŋ ëbɛ̈n.

¹¹ Go kɔ̈k gaam aye tuuc, ku gɛm kɔ̈k aye tït, ku bï kɔ̈k aa kɔc ë wëlpiɛth guiir, ku bï kɔ̈k aa kɔc ee kɔc tïït ku kɔc ee wëët.

¹² Aa looi në luɔi bï kɔc ɣerpiɔ̈ɔ̈th a dikëdik, ku në luɔi de kuny ee kɔc röt kony, ku në kuɛ̈t bï guöp de Kërtho kueet.

¹³ Aɣet të bï wok ɣet wodhie në gäm töŋ cï wok gam ëtök, ku në ŋïny ŋic wok Wën ë Nhialic, agoku aa röördït, ku buk ɣet ë pëk ë dït de kuɛth cïï Kërtho kuɛth.

¹⁴ Ke wo cïï bï bɛ aa mïth thiiakäŋ, mïth ee yom miaŋ ëbɛ̈n, leer ke tɛ̈ɛ̈n ku leer ke tɛ̈ɛ̈n, yom de wëët ë kɔc, në math mɛthë kɔc kɔc ë ruëëny, ku cäp kithic ee kek kɔc math.

¹⁵ Wok bï yic dhil aa muk në nhiëër, ku yok dït ë këriëëcic ëbɛ̈n të nu yen, yen aye naamde, yen Kërtho guöp.

¹⁶ Ago guöp dït ëbɛ̈n në yen në duöt cï e duut apiɛth abï lɔ kuendek, në yomnyïïn ëbɛ̈n yomnyïïn cath në yen, acït luɔi ee ka ke raan guöp looi ëbɛ̈n, kënë ke luɔide ku kënë ke luɔide, ago guöp dït abï rɔt yïk ë nhiëëric.

Pïïr ë Piɛc Bɛ̈n ë Kërtho Yic

¹⁷ Yen aluɛɛl ɛn cöökë, ke ya ye cäätɔ ë Bɛ̈nydïtic an, duökï ë bɛ rëër ë rëër ë Juöör, kɔc ë rëër ke ke ye ɣɔ̈ric tak ë kenïïm,

¹⁸ kɔc col piɔ̈ɔ̈th ku liukï ë pïïr ë Nhialicic në biäk de kuny kuc kek käŋ, ku në riɛl ril kek nïïm,

¹⁹ kɔc cïn piɔ̈ɔ̈th, agokï röt gäm luɔi de dhööm, bïk luɔi col kithic aa looi në ŋɔ̈ɔ̈ŋ ë ke dɔm.

²⁰ Ku week, we kënë wɛ̈ɛ̈t ë Kërtho wäkya,

²¹ të cä wek jamde piŋ, ku të cï we wɛ̈ɛ̈t në yen, në wëët yic nu ë Yecu yic:

²² an, Bäk raan thɛɛr pɔ̈l në rëërduön ee ya wek rëër wään, raan cï dhiap në biäk de ŋɔ̈ɔ̈ŋ de lueth ŋɔ̈ɔ̈ŋ ë ye dɔm.

²³ Ku bɛkï röt tɔ cak në wëi nu ë wepiɔ̈ɔ̈th,

²⁴ ku jakï raan cï piac cak dɔm, raan cïï Nhialic caal piɔ̈u, në cäŋ ë ciɛkë ye në piathëpiɔ̈u ku ɣɛɛrëpiɔ̈u, në yic.

²⁵ Yen päl wek lueth, ku yak yic lueel, ŋɛk ke raan rɛ̈ɛ̈r ke yen, në luɔi raan wok.

²⁶ Gɔ̈thkï, ku duökï kërac looi: duökï akɔ̈l tɔ lɔ piny ke we ŋoot ë wek göth:

²⁷ Duökï jɔŋdït rac pɛ̈l të bï en rëër ë wepiɔ̈ɔ̈th.

²⁸ Raan ë ye kual, në cie bɛ kual: aŋuän luɔi bï en aa luui ë luɔi piɛth në cinke, ke bï dɛ kë bï en raan däŋ miɔɔc, raan dɛk ë käŋ.

²⁹ Ë cïn jam nhiɛɛny ee bɛ̈n bei ë wethook, ë ye jam piɛth etök, jam duëër kɔc kueet ë kë dak keek, ke kɔc piŋ en ke ke bï dhuëëŋdepiɔ̈u yök.

³⁰ Duökï Wëidït ɣer ke Nhialic tɔ dhiau piɔ̈ɔ̈th, Wëi cï we gɔ̈ɔ̈r piɔ̈ɔ̈th ë keek aɣet kööl ë wɛ̈ɛ̈r wëërë kɔc bei ëliŋliŋ.

³¹ Wël tuc ëbɛ̈n, ayï dïtëpiɔ̈u, ayï agɔ̈th, ayï jam arölröl, ayï jam rac ëbɛ̈n, ë ke nyiɛɛiyë ë weyiic, kekë luɔi de anyääk ëbɛ̈n:

³² ku yak röt theek wapäc, yak piɔ̈ɔ̈th kok ë röt, abäk röt aa pɔ̈l, ë ŋɛk ë ye ŋɛk päl kë cï wööc, cït man cï Nhialic we pɔ̈l në biäk de Kërtho.