Epethiei 3 - JAM DE NHIALIC 2011

Luɔi de Paulo ke Juöör

¹ Yen aye yɛn raan ë Yecu Kërtho raan cï mac në biäkdun week wek Juöör, läŋkï Nhialic.

² Të cä wek këde luɔi ë dhuëëŋ de Nhialic piɔ̈u piŋ, luɔi cï gäm ɛn ë këdun:

³ Luɔi cï en a tɔ ŋic këcïmoony, në nyuöth cï en a nyuöth käŋ, acït man cän e gɔ̈ɔ̈r wään në wël liaakäŋ.

⁴ Ku të kuɛɛn wek wëlkï yiic, ke we duëër ŋïnydï yökic, ŋïny ŋiɛc ɛn jam de këcïmoony de Kërtho.

⁵ Jam kënë nyuöth kɔc ë rɛm kɔ̈k yiic, cït man cï ë ye nyuöth tuuckɛn ɣerpiɔ̈ɔ̈th ënɔɔnë ku tït në Wëidït ɣer,

⁶ jam de röm bï Juöör kë bï kɔc lɔ̈ɔ̈k lak rɔm ëtök, ku luɔi bï kek aa guöp tök, ku bïk kë cï kɔn lueel rɔm ëtök ë Kërtho yic në wëlpiɛth.

⁷ Ku yɛn cï tɔ ye raan ë wëlpiɛthkë looi, acït man cï a miɔɔc në dhuëëŋ ë Nhialic piɔ̈u në luɔi de riɛlde luɔi ë käŋ tiiŋ yiic.

⁸ Yɛn guöp, acakaa yɛn ë koor ë kɔc ɣerpiɔ̈ɔ̈th kedhie, yɛn ë miɔɔc në dhuëëŋë, luɔi bän Juöör guiëër ka ke Kërtho, kek aye wëu cïï duëërë gïth nïïm,

⁹ ku luɔi bän kɔc tɔ daai apiɛth kɔc kedhie, abïk thar ë këcïmoony ŋic, jam ɣɔn cï moony ë Nhialicic të ɣɔn ciɛkë piny, Nhialic Aciëŋ ë cak këriëëc ëbɛ̈n në këde Kërtho,

¹⁰ ke pɛlënɔm de Nhialic, pɛl kithic aläl, ke bï ŋic ë ciɛɛŋ ku riɛl nu paannhial në ɣön ë Nhialic ënɔɔnë.

¹¹ Yen löŋ cï lueel ë yenpiɔ̈u ɣɔn thɛɛr në këde Kërtho Yecu Bɛ̈nydandït.

¹² Raan ee wo tɔ ril nyïïn, bï wo röt cuöt tëthiɔ̈k ke wo cïï nyïïn riɔ̈c në gäm cï wok e gam.

¹³ Yen a läŋ ɛn week, ke we cïï piɔ̈ɔ̈th bï bäp në katuc ë ya dhal në biäkdun, yen aye dhuëëŋdun.

Nhiëër de Kërtho

¹⁴ Yen atuök ɛn a miɔl ë Wääda nɔm Wun Bɛ̈nydan Yecu Kërtho,

¹⁵ Raan ë ciëk dhiën rin kedhie, dhiën nu paannhial ku dhiën nu ë piny nɔm,

¹⁶ aguɔ lɔ̈ŋ, ke bï we gäm riɛl në dït ë dhuëëŋ de yenpiɔ̈u, abäk riɛl ë riɛldït në Wëike ë wepiɔ̈ɔ̈th thïn,

¹⁷ ke Kërtho bï rëër ë wepiɔ̈ɔ̈th në gäm gäm wek, ago meikun ku këërkëërdun ɣet piny ë nhiëëric,

¹⁸ ke we bï nhiëër ë Kërtho lëu në yöŋ bä wek e yökic, week wekë kɔc ɣerpiɔ̈ɔ̈th kedhie, dït dïït en kɔ̈u, ku bɛ̈ɛ̈r bɛ̈ɛ̈r en kɔ̈u, ku thuthde, ku bɛ̈ɛ̈rde.

¹⁹ Aguɔkï nhiëërde ŋic, nhiëër wär ŋïnydekäŋ, ke we bï kuɛth në kuɛth ë Nhialic ëbɛ̈n.

²⁰ Ku ënɔɔnë, Raan lëu käŋ ë luɔi aläldït awär ka yok lip ayï ka yok tak ëbɛ̈n, në riɛldït ee luui ë woyiic,

²¹ ë lɛc tɔ̈u ke Nhialic në ɣön ë Nhialic yic ku në Kërtho Yecu yic në rɛm yiic ëbɛ̈n aɣet thɛɛr wadäŋ. Amiin.