Epethiei 2 - JAM DE NHIALIC 2011

Gɔl ë Thuɔɔu Lee Pïïric

¹ Ku we cïï Nhialic tɔ ɣɔ̈ɔ̈r, wek kɔc ɣɔn cï thou në kakuön ë yak looi.

² Karac yak cool ë luɔɔi wek ke, ɣɔn rɛ̈ɛ̈r wek ë rëër ë kɔc ke piny nɔm ënɔɔnë, rëër ë bɛ̈nydït cath ke riɛl ë yomic yen aye jɔŋ rɛɛc ee luui ë kɔc reec gäm yiic ënɔɔnë.

³ Ku wook ayadäŋ wodhie, wok aaye mat në keek ɣɔn, në ŋɔ̈ɔ̈ŋ de ka ke guöp, ku wok aaye kak ë yok kɔɔr ë yäc looi, ayï kak ë yok tak ë wopiɔ̈ɔ̈th, agoku aa mïth ke agɔ̈th në ciɛɛŋ ë ciɛkë wo, cït man ë kɔc kɔ̈k.

⁴ Ku Nhialic Raan kok piɔ̈u aläl, në dït ë nhiëër ë nhiɛɛr en wook,

⁵ acakaa wok ë cï thou ë kakuɔn ee yok wööc yiic, ka cï wo tɔ ɣɔ̈ɔ̈r në Kërtho ëtök, (ee dhuëëŋdepiɔ̈u en acï we kony wëi).

⁶ Ku acï wo jat nhial ëtök, ago wo tɔ rɛ̈ɛ̈r ëtök paannhial në Kërtho Yecu yic:

⁷ luɔi bï en dït ë dhuëëŋ de yenpiɔ̈u nyuɔɔth wadäŋ thɛɛr në piny bï bɛ̈n, dhuëëŋ dïït wär këriëëc, në miɛt mit en piɔ̈u ke wook ë Kërtho Yecu yic.

⁸ Ee dhuëëŋdepiɔ̈u en acï week kony wëi, në gäm, ku acïï bɔ̈ tëde week: ee miɔ̈c de Nhialic:

⁹ acï bɔ̈ në luɔi ee raan looi, ka cïn raan duëër rɔt leec.

¹⁰ Wok ee cuɛ̈cde, në cäŋ cï wo cak ë Kërtho Yecu yic në këde luɔi piɛth cïï Nhialic kɔn lueel, an, buk aa cool ë looi wo keek.

Tök në Kërtho Yic

¹¹ Yen tak we wenïïm ëcöökë an, ɣɔn wek ë ye Juöör në dhiënh ë dhiëëthë week, we cï tɔ ye Jur kënë cueel në jur cï tɔ ye aŋuɛl, ë guöpic, ee kë cï looi ë kɔc cin.

¹² Wek ë cïï thiääk ë Kërtho ɣɔn, wek ë nu pei, ku cäkï ë dïïl ke Yithriɛl, ku wek ë ye kɔc lei, aa cïn këdun thïn ë löŋ cï macic, löŋ de kë cï kɔc lueel an, bï gäm kɔc, wek aa cïn kë ŋäthkï, ku liu Nhialic tëde week ë piny nɔm.

¹³ Ku ënɔɔnë në Kërtho Yecu yic, wek kɔc wään nu tëmec, we cï bɛ̈ɛ̈i tëthiɔ̈k në riɛm de Kërtho.

¹⁴ Yen aye män mɛ̈të wook, raan ë wo mat yiic waarou, tɔ wook ee tök, ago päny nu kaamda thuöör piny.

¹⁵ Në nyiɛɛi cï ater nyaai në rïŋ de yenguöp, ater ë lööŋ de yiic cök bï kɔc aa piŋ, ku ka bï kɔc aa looi, bï raan töŋ cï piac looi cak në guöpde yic, cak në keek kaarou, ago ke määt aya:

¹⁶ bï en keek määt ë Nhialic keek kaarou, në guöp tök në tim cï rïïu nɔm, në nyiɛɛi cï en ater nyaai aya.

¹⁷ Na wën, ke bɔ̈, bï jam de mät bɛ̈n guiëër week, wek kɔc ë nu tëmec, ku guïïr kɔc ë nu tëthiɔ̈k aya:

¹⁸ ku në yen, wook waarou wo duëër röt cuöt Wääda në Wëi tök.

¹⁹ Yen ënɔɔnë, we cïï be aa kɔc lei ku cäkï ë juöör lei, wek ee kɔc ke wun tök wekë kɔc ɣerpiɔ̈ɔ̈th ku yak kɔc ke dhiën ë Nhialic.

²⁰ Wek cï yïk ë këërkëëric këërkëër ë tuuc ku tït, ku Yecu Kërtho guöp yen aye kuur nu ë agukic kuur de naamde.

²¹ Alooc ëbɛ̈n acï kiëët nɔm ë yen, abï dikëdik, go ŋuak abï aa luaŋdïït ɣeric ë Bɛ̈nydïtic.

²² Ku week aya, we cï yiëk thïn ëtök bäk aa ɣön bï Nhialic cieŋ në Wëidïtke.