Epethiei 1 - JAM DE NHIALIC 2011

¹ Yɛn Paulo, tuny ë Yecu Kërtho në këde piɔ̈n ë Nhialic. Awerek en gäär kɔc ɣerpiɔ̈ɔ̈th nu Epetho, kek kɔc adööt kɔc nu ë Kërtho Yecu yic:

² Ë dhuëëŋdepiɔ̈u ë tɔ̈u ke week, ku mät, në ke bɔ̈ tëde Nhialic Wääda kekë Bɛ̈nydït Yecu Kërtho.

Athiɛɛi de Wëi ë Kërtho Yic

³ Thieithieei ë Nhialic, Wun Bɛ̈nydan Yecu Kërtho, Raan cï wo thieei ë athiɛɛi de wëi ëbɛ̈n, athiɛɛi de ka ke paannhial, në Kërtho yic.

⁴ Acït man cï en wo lɔc në Kërthoyic ɣɔn thɛɛr aŋoot piny ke kënë cak, në nhiëër nhiɛɛr en wook. Në luɔi bï wok piɔ̈ɔ̈th ɣɛɛr ku cïn kë bï wo gɔ̈k ë yenɔm.

⁵ Acï wo kɔn meek ë yepiɔ̈u nɔn bï en wo muk tɔ wook ë wɛ̈ɛ̈t ke yenguöp në Yecu Kërtho, acït man ë miɛt ë yen piɔ̈u,

⁶ në lɛc bï dhuëëŋ de yenpiɔ̈u aa leec dhuëëŋ cï läkëläk, dhuëëŋ cï gäm wook ëdhuëëŋ në biäk de Raan Nhiɛɛr!

⁷ Raan cï wo wɛ̈ɛ̈r bei në riɛmde, ago wo tɔ pɛ̈lë karɛckuɔ, në dït de dhuëëŋ de yenpiɔ̈u,

⁸ dhuëëŋ cï ŋuak nyin tëde wook! Në pɛlënɔm ëbɛ̈n ku piathënɔm ëbɛ̈n!

⁹ Acï wo tɔ ŋic kë nu ë yepiɔ̈u këcïmoony ɣɔn në pɛlënɔmde ëbɛ̈n, në miɛt ë yenpiɔ̈u, yen aye löŋ cï lueel ë Kërtho piɔ̈u.

¹⁰ Në këde ciɛɛŋ bï en käŋ cieŋ kedhie, të cï piny guɔ thök an, abï käŋ tɔ kut nïïm ëbɛ̈n, tɛ̈ɛ̈u keek ë Kërtho cin, ayï ka nu paannhial, ayï ka nu ë piny nɔm.

¹¹ Abï ke tääu ë Kërtho cin, raan cï wo tɔ yök ka buk lɔ̈ɔ̈k lak, në mɛ̈k cï wo kɔn meek cït man cï Nhialic e lueel ë yepiɔ̈u, Raan ë këriëëc looi ëbɛ̈n, cït löŋ cï tak ë yepiɔ̈u.

¹² Luɔi bï wok aa kɔc ee dhuëëŋde tɔ lec, wok kɔc cï Kërtho kɔn ŋɔ̈ɔ̈th.

¹³ Ku ye raan cäk gam ayadäŋ week, të cä wek jam de yic piŋ, yen jam piɛth de kuny cï we kony wëi: ku week, të cä wek guɔ gam, ke we cï gäär piɔ̈ɔ̈th Wëidït ɣer, Wëi cï kɔn lueel an, bï gäm wook.

¹⁴ Yen aye biäk cï kɔn gäm wook tueŋ, biäk de kë buk lɔ̈ɔ̈k lak, aɣet wëër bï kë cï ɣɔɔc wɛ̈ɛ̈r bei ëtaitai, ke dhuëëŋde bï leec.

Lɔ̈ŋ de Paulo

¹⁵ Ku yɛn aya, të cän gämduön cä wek Bɛ̈nydït Yecu gam piŋ, ku piɛŋ nhiëër nhiaar wek kɔc ɣerpiɔ̈ɔ̈th kedhie,

¹⁶ ke yɛn cïï luɛl aa yɛn thieithieei lueel në biäkdun päl, wek aa lueel rin ë lɔ̈ŋdï yic,

¹⁷ ke Wun Bɛ̈nydan Yecu Kërtho, yen aye Wun de nɔm lɛc, ke bï we miɔɔc në wëi ke pɛlënɔm ku nyuuth bï we nyuöth käŋ, luɔi bä wek e ŋic apiɛth.

¹⁸ Ke we bï tɔ daai apiɛth në nyïïn ke wepiɔ̈ɔ̈th, bäk aŋäth ŋic aŋäth de cɔ̈tdɛn cï en we cɔɔl, ku ŋiɛckï dhuëëŋ bïï Nhialic lɔ̈ɔ̈k lak ë kɔckɛn ɣerpiɔ̈ɔ̈th yiic, dït dïït en,

¹⁹ ku lak riɛldɛn dït ŋic, dït dïït en aläl awär këriëëc, riɛldɛn dïït cï nyuöth wook wok kɔc cï gam, acït man ë luɔi de riɛldɛn dïït agök,

²⁰ riɛldɛn ɣɔn cï looi ë Kërtho yic, të cï en e jɔt ë kɔc cï thou yiic, go tääu ë ciin cuënyde paannhial.

²¹ Tënhial ya, acï miriic kɔ̈k wöör kedhie aläldït, ayï ciɛɛŋ, ayï riɛl, ayï bɛ̈ɛ̈ny, ayï rin cï cak kedhie, acie piny ënɔɔnë tei, ee piny bï bɛ̈n aya, acï ke wöör kedhie.

²² Go këriëëc tääu ë yecök ëbɛ̈n cieŋ ke, ku tɛ̈ɛ̈u ë käŋ nïïm kedhie, në këde ɣön ë Nhialic.

²³ Yen aye guöpde, ku ye kuɛthde, kuɛth de raan ee käŋ tɔ kueth kedhie, ka nu ë këriëëcic ëbɛ̈n.