Edhr 8 - JAM DE NHIALIC 2011

Rin ke Kɔc ë bɔ̈ Ciëën në Pɛ̈cic

¹ Kakë ayek rin ke kɔcdïtkɛn ke dhiëën nïïm ku lɔ kuatdɛn wään bɔ̈ ciëën në yɛn ëtök në Babilonia ruöön ɣɔn tɔ̈u ë Melik Ateradath në thööc nɔm:

^2-14 Gercom, raan ë dhiën ë Pineɣath, Danyel ë raan dhiën ë Yithamar, Ɣatuc, wën ë Cekania, raan dhiën ë Debid Dhekaria, raan dhiën ë Paroc, ku aa cath ke bɔt ku thiërdhïc 150, Eliɣonai wën ë Dheraɣia raan dhiën ë Paɣath Mowap aa cath ke bot kaarou 200 ke kɔc, Cekania wën ë Jaɣadhiel, raan dhiën de Dhatu, aa cath ke bot kadiäk 300 ke kɔc. Ebed wën ë Jɔnathan raan ë dhiën ë Adin, aa cath ke kɔc kathiërdhïc. Jecaya wën ë Athalia raan ë dhiën ë Eelam aa cath ke kɔc kathiërdhorou 20, Dhebadia wën ë Maikɔl raan ë dhiën ë Cepatia aa cath ke kɔc kathiërbɛ̈t 80, Obadaya wën ë Jeɣel raan ë dhiën ë Jowap aa cath ke raan bot kaarou ku thiëër ku bɛ̈t 218, Celomith wën ë Jothipia aa cath ke raan bɔt ku thiërdhetem 160, Dhekaria wën ë Bebai, raan ë dhiën ë Bebai aa cath ke kɔc kathiërrou ku bɛ̈t 28, Joɣanan wën ë Yakatan raan ë dhiën ë Adhagat aa cath ke raan bɔt ku thiëër 110, Elipelet ku Jowɛl ku Cemaya, kɔc dhiën ë Adonikam wään löök bɛ̈n ciëën, aake cath ke kɔc kathiërdhetem 60, Yuthai kekë Dhakur kɔc dhiën ë Bikbai ku aake cath ke kɔc kathiërdhorou 70.

Edhera Akɔɔr Lebai bï Lui Luaŋdït

¹⁵ Aguɔ ke määt nïïm ë lil lɔ wun cɔl Aɣaba nɔm, ku jɔku piɔ̈ɔ̈t ëtɛ̈ɛ̈n ë nïn kadiäk. Na wën aa la kɔc caathiic në yanyin ayï bäny ke kake Nhialic, acïn raan töŋ de dhiëën ke Lebai cä yök.

¹⁶ Guɔ kɔc cɔɔl yï Eliedher, ku Ariɛl, ku Cemaya, ku Elnathan, ku Jarip, ku Elnathan, ku Nathan, ku Dhekaria ku Meculam, röördït ke dhiëën nïïm, ku Joyarip kekë Elnathan kek aye kɔc ee nïïm tiëër,

¹⁷ bïk lɔ tëde Yido, raan tɔ̈u ë kɔc nïïm në Kathipia. Ku acä ke yɔ̈ɔ̈k bïk lɔ guiëër Yido ke wɛ̈ɛ̈takɛ̈cken, wutic ë Kathipia, kɔc ɣɔn lui në Luaŋdïtic, an bïk kɔc yiɛ̈n wook, kɔc bï bɛ̈n luui ë Luaŋdïtic.

¹⁸ Në biäk ë tɔ̈u athiɛɛi de Nhialic ke wook, acïk wook bɛ̈n tuöc raan ee nɔm tiëër cɔl Cerebia, ku yen ee raan ë Lebai dhiën ë Maɣali de mïth ke Yithriɛl ke mïthke ku wɛ̈ɛ̈takɛ̈cken, keek kedhie ayek thiëër ku bɛ̈t,

¹⁹ ku acïk Ɣacabia kekë Jecaya de dhiën ë Merari, kekë mïthëkɔcken ku mïthken ayek thiërrou,

²⁰ ku lɔ bot kaarou ku thiërrou kɔ̈k ke kɔc ee luui në Luaŋdïtic, ɣɔn cïï Debid kekë bäny nu në yecök tääu bïk Lebai aa kuɔny në luɔi ku rinken kedhie acï ke gäär piny.

Edhera Awat Kɔc ë Lɔ̈ŋ ku Thëk

²¹ Ku ëtɛ̈ɛ̈n, në kiir de Aɣaba nɔm, yɛn cï kɔc bɛ̈n yɔ̈ɔ̈k buk thek koorku röt piny në Nhialic nɔm, buk thiëëc bïï wok tɛ̈ɛ̈k apiɛth në cäthda yic, ku kony wook në mïthkuɔ ku kakuɔ.

²² Yɛn aaye guöp riɔ̈ɔ̈c në luɔi bän Melik thiëëc në rem de tɔŋ ku kɔc ke jöŋgöör bï wok tiit kueer në cäthda yic në biäk de kɔc ke ater duëër wook gëk, aa cuk lëk Melik an, Nhialic atɔ̈u ke kɔc ee Ye kɔɔr, ku agönhde ee tɔ̈u kekë kɔc cïï Yen ee piŋ thok.

²³ Goku thek ku läŋku Nhialicda, ago lɔ̈ŋda piŋ.

Miɔ̈c Gëmë Luaŋdït

²⁴ Na wën ke ya kuëny në bäny tueŋ ke kake Nhialic yiic, kɔc kathiëër ku rou, yï Cerebia, ku Ɣacabia, ku mïthëkɔcken kathiëër kɔ̈k,

²⁵ aguɔ ke thɛ̈m atek ku adhɛ̈p ku aduuk wään gɛm ë Melik kekë kɔckɛn ee käŋ kiëët ku bäny ke luɔi, ku raan ë Yithriɛl ë tɔ̈u ëtɛ̈ɛ̈n ëbɛ̈n, bïï ke kake Luaŋdït aa looi.

^26-27 Thëmden ë gäm ke kï: Aguum kathiërrou ku rou ku bot kadiäk ku thiërdhïc ku rou 22,352 de kilɔɔ ke ateek, ku aduök bɔt de ateek, ayek kilɔɔ kathiërdhorou, ku aguum kadiäk ku bot kaŋuan de kilɔɔ ke adhääp, ku guöl ke adhääp kathiërrou, thëmden ee kilɔɔ kabɛ̈t ku biäk, ku aduuk ke maläŋ kaarou cï läkëläk ku apiɛth cït man adhääp.

²⁸ Aguɔ lɛ̈k keek an, “Wek ɣeriic tëde Bɛ̈nydït ayï aduuk aɣeerkï yiic, ku ka cït atek ku adhɛ̈p ayek miɔ̈c de miɛtëpiɔ̈u de Bɛ̈nydït, Nhialic de kuarkun.

²⁹ Dɔ̈tkï keek apiɛth agut të bï wek ɣet në Luaŋdïtic ë Jeruthalem, ku ëtɛ̈ɛ̈n abäk ke them ku tääukï ke ë bäny tueŋ ke kake Nhialic cin kekë Lebai ku jɔ ya röördït ke baai de Yithriɛl.

³⁰ Go bäny ke kake Nhialic ku Lebai atek ku adhɛ̈p cï them ku aduuk lɛɛr në Luaŋdïtic ë Jeruthalem.

Bɛ̈n Ciëën Jeruthalem

³¹ Na ɣɔn ke wo lööny kueer në kööl ye pɛɛi tueŋ thok thiëër ku rou në kiir de Aɣaba nɔm ke wo lɔ Jeruthalem. Ku Nhialic aa tɔ̈u ke wook, ku gël wook në kɔc ke ater ee kɔc kaaŋ ku kɔc ee buuth ë kuɛɛriic.

³² Goku ɣet Jeruthalem, ku jɔku lɔ̈ŋ në nïn kadiäk.

³³ Na ɣɔn aacï nïn aa ŋuan, ke wo lɔ Luaŋdït, ku themku atek ku adhɛ̈p ayï aduuk, ku Meremoth wën ë Yuria bɛ̈ny de kake Nhialic, yen aa tɔ̈u ë thëm de käŋ në yeciin, ku tɔ̈u Eleyadhar wën ë Pineɣath ke yen, ku lɔ kɔc kaarou ke Lebai yï Jodhabad wën ë Jecua ku Nowadia wën ë Binui.

³⁴ Këriëëc ëbɛ̈n aa kuen ë nyin ku them, ku keek kedhie acï ke bɛ̈n gäär piny në ee köölë.

³⁵ Ku ëtɛ̈ɛ̈n kɔc ë lɔ döök ciëën kedhie ë pɛ̈cic acïk miɔ̈c ye nyop ëbɛ̈n bɛ̈n näk Nhialic de Yithriɛl, näkkï miöör kathiëër ku rou tëde dhiëën ke Yithriɛl kedhie, ku nyök amɛ̈l kathiërdhoŋuan ku dhetem, ku nyök amɛ̈l kor kathiërdhorou ku dhorou. Ku näkkï nyök bɔɔth aya kathiëër ku rou ke ke ye miɔ̈c de kërac, kek läikë kedhie acïk ke nyop ke ke ye miɔ̈c de Bɛ̈nydït.

³⁶ Keek ayadäŋ acïk lööŋ cïï Melik tääu piny bɛ̈n gäm bäny mac wuöt ku bäny lɔ në kecök tɔ̈u ë wɛ̈ɛ̈r ë Yuparat lɔŋ tui, yen acïï kek kɔc bɛ̈n gäm kuɔny ku lɔ kake yïŋ ë ɣön ë Nhialic.