Edhr 5 - JAM DE NHIALIC 2011

¹ Ku yen aa cïï tït ke Nhialic yï Ɣagai kekë Dhekaria wën de Yido, kë cïï Nhialic nyuöth keek lɛ̈k Judai tɔ̈u ë Jeruthalem ku Juda yic ëbɛ̈n në rin ke Nhialic de Yithriɛl.

² Na wën ke Dherubabel wën de Caltiɛl kekë Jecua wën ë Jeɣodhadak gokï röt jɔt ku gɔlkï yïŋ de ɣön ë Nhialic Ye lɔ̈ŋ ë Jeruthalem. Ku tɔ̈u tït ke Nhialic në keek, ke ke kony keek.

³ Ku aköölkë yiic Tatenai bɛ̈ny de piny tɔ̈u ë wɛ̈ɛ̈r ë Yuparat lɔŋ lɔ aköl athɛ̈i ku Cethar Bodhenai ku kɔc lui ë keek, gokï bɛ̈n ku lëkkï keek an: “Eeŋa ë yöök week bäk ɣönë yïk, ku thɔ̈lkï?”

⁴ Ku acïk ke thiëëc aya luɔi bïï ë keek nyuöth rin ke kɔc yïk Luaŋdït.

⁵ Ku nyïïn ke Nhialicden aake nu në röördït ke Judai gup, ku akënë ke bɛ̈n tɔ kääc, agut të bïï jam ɣet tëde Dariouth ku bï këdɛn cïk gɔ̈ɔ̈r kɔn lɔ puk nɔm.

⁶ Kënë ë awerek ee gɛ̈ɛ̈r Tatenai, bɛ̈ny de piny tɔ̈u ë wɛ̈ɛ̈r ë Yuparat lɔŋ lɔ aköl athɛ̈i, ku Cethar Bodhenai ku kɔc lui ë keek, ku bäny nu në kecök tɔ̈u në wɛ̈ɛ̈r ë Yuparat lɔŋ të lɔ aköl athɛ̈i, acïk bɛ̈n tuöc Melik Dariouth:

⁷ Ku kë cï gɔ̈ɔ̈r thïn kï: “Kënë alɔ tëde Melik Dariouth yïn cuk thiëëc, cäk nin apiɛth?

⁸ “Yïn Melik, ade kë kɔɔrku bä ŋic, wok aa cï lɔ wun ë Juda, ɣön de Nhialicdït ayïk në kurdït ku pɛɛm acï ke tääu në päny kɔ̈u. Yen ee luɔɔiyë acath apiɛth, ku aloikï në piɔ̈nden ëbɛ̈n.

⁹ “Agoku röördïtkë thiëëc, ku lopku keek në raan ë yöök keek bïk ee Luaŋdïïtë yïk, ku thɔ̈lkï.

¹⁰ Ku acuk keek luɔp rin aya në baŋ bï yïn ke ŋic. Ku gäärku rin ke bänyken.

¹¹ “Ku kën ë pukkï nɔm wook kï an, ‘Wok ee lïïm ke Nhialic de paannhial ku piny, ku wok be ɣöt yïk, Luaŋdït cï kɔn yïk thɛɛr në Melik dïït de Yithriɛl ku thöl.

¹² Ku kë cïï kuarkuɔ Nhialic de paannhial tɔ göth, yen acïï keek bɛ̈n than ë Nebukadnedhar cin, raan ë jur cɔl Kaladayo, Melik de Babilonia, raan ee yen ë riäk luaŋdït ku peec kɔc leer ke Babilonia.

¹³ Cakaa ɣɔn cïï kënë rɔt looi, ke Thairuth në ruöön tueŋ yen Melik de Babilon acï löŋ bɛ̈n tääu piny bïï ɣön ë Nhialic nyɔk ë yïk.

¹⁴ Acï aduuk cï ke looi në adhääp ku ateek ke ɣön ë Nhialic tɔ jɔt luaŋ de Babilon yic ayadäŋ, ka wään cïï Nebukadnedhar ke jɔt Luaŋdït ë Jeruthalem ku leer ke luaŋ de yiëthke ë Babilon. Go Melik Thairuth aduukë tääu në raan cɔl Cethabadhar cin, raan cï kuany ke ye bɛ̈ny de wut.

¹⁵ Ago ë Melik ye yɔ̈ɔ̈k bïï aduuk nööm ku leer ke Jeruthalem ku bïï ɣön ë Nhialic yïk tëdɛn thɛɛr, ku tɛ̈ɛ̈ukï ke thïn.

¹⁶ Go raan cɔl Cethabadhar lɔ ku keer ɣön ë Nhialic ee Yen ë ye lɔ̈ŋ në Jeruthalem. Ku në aa köölkë agut cï ënɔɔnë aŋoot ke yïk ku akën thök.’

¹⁷ “Ku ënɔɔnë, na bïï Melik nhiaar, ke bï awereek tɔ̈u ɣön ë bääny de Melik nu në Babilon kɔɔriic, ku bï tïŋ nɔn de të cïï Melik Thairuth löŋ tääu piny an, bïï ɣön ë Nhialic tɔ̈u në Jeruthalem nyɔk në yïk. Ku në jɔ wo lɛ̈k, në kë kɔɔr piɔ̈nde në biäk de ee kënë.”