Edhr 4 - JAM DE NHIALIC 2011

Kɔc Reec Luɔi Be ë Luaŋdït Yïk

¹ Na wën aacï kɔc de ater në Juda kekë Benjamin ye piŋ nɔn yïk ë kɔc ɣɔn bɔ̈ ciëën në pɛ̈cic Luaŋdït, Nhialic de Yithriɛl.

² Gokï lɔ tëde Dherubabel ku röördït ke dhiëën nïïm ku lëkkï keek an, “Tɔ wok yïk në week, në baŋ ee wok Nhialicdun lam cït man ë wek, ku aa yok näk, gɔl ɣɔn tɔ̈u Etharɣadon Melik de Athiriya, wään bïï wook ee tënë.”

³ Go Dherubabel kekë Jecua ku röördït tɔ̈u ë dhiëën ke Yithriɛl nïïm pɔ̈k nɔm keek an, “Wek cïn nïïm kë luɔikï në wook në yïŋ yïk wok ɣön de Nhialicda, abuk yiɛ̈k Bɛ̈nydït, Nhialic de Yithriɛl wapäc, cït man cïï Thairuth Melik de Perthia wook yɔ̈ɔ̈k.”

⁴ Go kɔc ceŋ piny kɔc ke Judai tɔ diɛɛr ku tɔkï keek riɔ̈c në yïk.

⁵ Agokï kɔc nu ë bɛ̈ny cök kumthook, në baŋ bï kek luɔɔi de yïk riɔ̈ɔ̈k, aake ye kënë looi në akööl ke Thairuth kedhie, agut cï akööl ke bääny de Dariouth Melik de Perthia.

Kɔc Reec Luɔi Be ë Jeruthalem Yïk

⁶ Na ɣɔn në göl ë bääny de melik Athuwereth, acïk awerek bɛ̈n gɔ̈ɔ̈r, awerek gɔɔny kek kɔc ke Jeruthalem kekë Juda.

⁷ Ku në akööl ke Ateradath, go Bicalam, Mitheredath, ku Tabeel, ku kɔc luui kek acïk awerek gäär Ateradath Melik de Perthia. Ku awerek aa gäär në thoŋ de Aramaik ku pukic wën kueenë yen.

⁸ Reɣum bɛ̈ny de wuöt kekë Cimcai raan ee käŋ gɔ̈ɔ̈r acïk awerek bɛ̈n gäär Ateradath, awerek gɔɔny kek kɔc ke Jeruthalem. Kë cïk lueel kï:

⁹ “Ee yɛn, Reɣum bɛ̈ny de wuöt wokë Cimcai raan ë käŋ gɔ̈ɔ̈r, ku kɔc lui ë wook: bäny ee lööŋ guiir ku bäny mac wuöt, ku bäny nu në kecök, kɔc ke Perthia, ku kɔc ke Eerek ku kɔc ke Babilonia, ku kɔc ke Eelam rɛ̈ɛ̈r ë Thutha,

¹⁰ ku juöör kɔ̈kë kedhie cïï melikdïït adhuɛ̈ŋ cɔl Acurbanipal jɔt ku leer ke ë wuöt ke Thamaria yiic agut cï wuöt kɔ̈k tɔ̈u piny ë wɛ̈ɛ̈r ë Yuparat lɔŋ tui, të lɔ aköl athɛ̈i.

¹¹ Ku awerek ë toocë kï: “Awerekë alɔ tëde melik Ateradath, ku ajël tëde lïïmkuön tɔ̈u piny nu ë wɛ̈ɛ̈r ë Yuparat lɔŋ tui.

¹² “Ku takï ŋic ë melik nɔn cïï Judai wään bɔ̈ tëde yïn ɣëët tëde wook, acïk lɔ Jeruthalem. Ku keek abekï pänydït rɛɛcë ee kɔc yiɛ̈n tɔŋ yïk, agɔlkï këërkëërde ku athölkï kal në yïk.

¹³ Ku lɛ̈kkï Melik an kë bï rɔt looi kï: Të le kek pänydït thöl në yïk, ku thök kɛ̈l, acïkï athölbö bï bɛ kut ëbɛ̈n, ka athänduŋ de bääny de Melik abï yic dak.

¹⁴ Ku ënɔɔnë në baŋ cïï wok röt gäm Melik, acïï piɛth buk Melik bɛ tïŋ ke dhäl guöp, ka wok tuc jamë Melik ke bïï ŋic.

¹⁵ Ke bï awereek thɛɛr ke wärken kɔɔric, abï yök në awereek thɛɛriic, ku abï ŋic an pänydïïtë ee kɔc yiɛ̈n tɔŋ, ee Meliik kekë wuöt jieeth piɔ̈ɔ̈th, ku kiɛɛr rac ee rɔt looi thïn acïk dap gɔl thɛɛr ke ke loi ee kakë, yen kën ë dhoŋ wunë piny ka.

¹⁶ Acuk tɔ ŋic Melik, an, të le pänydïïtë bɛ nyɔk ë yïk ku thök kɛ̈l, ke yïn cïï nɔm bï bɛ dɛk piny tɔ̈u në wɛ̈ɛ̈r ë Yuparat lɔŋ tui.”

¹⁷ Go Melik awerek pɔ̈k nɔm keek an, “Kënë alɔ tëde Reɣum bɛ̈ny de wuöt ku Cimcai raan ee käŋ gɔ̈ɔ̈r ku kɔc luui ë keek në Thamaria ku jɔ ya wuöt kɔ̈k tɔ̈u në piny ë wɛ̈ɛ̈r ë Yuparat lɔŋ tui, wek cuk thiëëc, cäk niin apiɛth?

¹⁸ Awerek wään tuöckï wook acï kueen në yanɔm ku acä yökic apiɛth,

¹⁹ Yɛn cï löŋ tääu piny bï awereek kɔɔric, ku acï bɛ̈n yök ë yic nɔn cïï ee wunë ee kakë dap gɔl thɛɛr nɔn ye kek awuɔɔu luöi Meliik, ku yek Meliik yiɛ̈n tɔŋ, ku kiɛɛr rac aye ke looi thïn.

²⁰ Ku Jeruthalem aa mɛc Meliik ril, kɔc ɣɔn mac piny tɔ̈u ë wɛ̈ɛ̈r ë Yuparat lɔŋ tui, ku yek athölbö kut ëbɛ̈n.

²¹ Ënɔɔnë tääuwë löŋ piny bï röörkë luɔi dɔ̈m kɔ̈ɔ̈c, ago wunë tɔ̈u ke cïï be ë yïk, agut të bä yɛn jam däŋ nyɔk ë luɛl.

²² Ku dötkï ee kënë apiɛth, duökï tɔ dhɔtic. Eeŋö bïï wok riääk tɔ ŋuak yenyin abï bääny de Melik jak guöp?”

²³ Na wën, kueenë awerek ë gɛ̈ɛ̈r melik Ateradath yic, kuënë yic Reɣum kekë Cimcai raan ë käŋ gɔ̈ɔ̈r ku kɔc lui ë keek, gokï lɔ ënɔɔnthiinë tëde Judai tɔ̈u në Jeruthalem ku pënkï kɔc luɔi në riɛl.

Luɔi de Ɣön ë Nhialic Abe Rɔt Gɔl

²⁴ Luɔi de yïŋ de ɣön ë Nhialic ye lɔ̈ŋ në Jeruthalem acï bɛ̈n kɔ̈ɔ̈c, aɣët ruöön ë rou në bääny de Dariouth, melik de Perthia.