Edhr 3 - JAM DE NHIALIC 2011

Läm Abe Nyɔk ë Göl

¹ Na ɣɔn aa cï pɛɛi ye pɛ̈i dhorou bɛ̈n ku rɛ̈ɛ̈r kɔc ke Yithriɛl në wuötken yiic, go kɔc kenïïm lɔ kut Jeruthalem në piɔ̈n tök.

² Go Jecua wën ë Jeɣodhadak kekë mïthëkɔcken ɣɔn ee bäny ke kake Nhialic ku Dherubabel ee wën de Caltiɛl kekë mïthëkɔcken acïk yïŋ de Nhialic de Yithriɛl bɛ̈n yïk, bïï kek miɔ̈c ye nyop ëbɛ̈n gam në yenɔm, cït kë cï gɔ̈ɔ̈r ë löŋ de Mothe yic, raan de Nhialic.

³ Agokï yïk tääu tëde, na cakaa nɔn riɔ̈ɔ̈c kek në kɔc ceŋ piny, ku gɛ̈mkï Bɛ̈nydït miɔ̈c ye nyop ëbɛ̈n ë yenɔm, miɔ̈c ye nyop ëbɛ̈n miäk kekë thëën.

⁴ Agokï Dhuëëŋ de Kɛ̈ɛ̈t looi, cït man cï ye gɔ̈ɔ̈r, ku yek miɔ̈c ye nyop ëbɛ̈n gam në aköölnyïïn, në kuën cït kë cï mäc en në kë ye kööl tök kɔɔr.

⁵ Ku ëtɛ̈ɛ̈n, acïk miɔ̈c ye nyop ëbɛ̈n bɛ̈n aa gam aköölnyïïn, ku miɔ̈c de pɛɛi ë piɛc wil, ku lɔ miɔ̈c ke akööl ke dhuëëŋ cïï Bɛ̈nydït ke lueel ëbɛ̈n, ku jɔ ya miɔ̈c de raan ëbɛ̈n raan ee miɔ̈c de miɛtëpiɔ̈u gäm Bɛ̈nydït.

⁶ Gɔl në kööl tueŋ ye pɛ̈i dhorou, acïk miɔ̈c ye nyop ëbɛ̈n gɔl në gɛm gëm kek e Bɛ̈nydït, cakaa wään ŋoot ë këërkëër de Luaŋdït ke kënë guɔ tääu piny.

Luaŋdït Abe ë Yïk

⁷ Na wën ke kɔc ë ke gëm wëu kɔc ee kur guaŋ kekë kɔc ee tiim guaŋ, ku gëmkï kɔc ke wun cɔl Thidon ku Tayer kacaam ku kadek ayï miök, agokï tiim ke thidar bɛ̈ɛ̈i në Lebanɔn në kueer wïïr agut cï Jopa, cït man cïï ye päl keek në Thairuth Melik de Perthia.

⁸ Na ɣɔn aa cïk run aa rou në pɛɛi ë rouwic, në bɛ̈nden ɣön ë Nhialic në Jeruthalem, go Dherubabel wën de Caltiɛl, kekë Jecua wën ë Jeɣodhadak, acïk luɔi ë yïk bɛ̈n gɔl në mïthëkɔcken kɔ̈kë ëtök, bäny ke kake Nhialic, ku Lebai ku kɔc kedhie, kɔc ë bɔ̈ Jeruthalem ë pɛ̈cic. Jɔkï Lebai kuany gɔl në raan ee run thiërrou leer nhial, bïï luɔi ë Luaŋdït tääu në kecin.

⁹ Go Jecua ke wɛ̈ɛ̈tke ku mïthëkɔcken ku Kadmiel kekë wɛ̈ɛ̈tke, dhiën ë Juda kedhie kek aa tɔ̈u ë luɔi de yïŋ ë ɣön ë Nhialic në kecin, (ku kony ke në wɛ̈ɛ̈t ke Ɣenadad në mïthken ku mïthëkɔcken Lebai.)

¹⁰ Na wën aacï kɔc yïk këërkëër de Luaŋdït tääu piny, go bäny ke kake Nhialic bɛ̈n tueŋ ke ke cieŋ lupɔɔken ku mukkï kɛŋ, ku bɔ̈ Lebai dhiën de Athap ke ke muk apajiiken, në luɔi bï kek Bɛ̈nydït leec, cït man cï Debid, melik de Yithriɛl ye lueel.

¹¹ Gokï ket në diɛt piɔɔny kek Bɛ̈nydït ku jɔkï pal ke ke wëër diɛt në kët, an: “Bɛ̈nydït apiɛth, ku nhiëërdɛn agɔk atɔ̈u athɛɛr ke Yithriɛl.” Go kɔc kedhie kiɛɛu moc ë röldït wën piɔɔny kek Bɛ̈nydït, në biäk cïï këërkëër de Luaŋdït tääu piny.

¹² Ku bäny juëc ke kake Nhialic ku Lebai ku röördït ke dhiëën nïïm, röördït ɣɔn cï luaŋdït tueŋë kɔn tïŋ, acïk pïïu bɛ̈n lööny ku dhiaukï në röldït wën cïï kek ɣön ë Bɛ̈nydïïtë tïŋ ke cï keeric, cakaa nɔn lee kɔc juëc ke ke moc kiɛɛu ë röldït në miɛtëpiɔ̈u.

¹³ Ka kɔc acïkï kiɛɛu de miɛtëpiɔ̈u ee bɛ pääk kekë dhiëëu, në baŋ ë ye kɔc kiɛɛudït moc arëët, ka awuɔɔuden aaye piŋ tëmec.