Edhr 10 - JAM DE NHIALIC 2011

Kueer bï Thiëŋ ë Duet ke Juöör tɔ Kääc

¹ Të ɣɔn ŋoot Edhera ke ye rɔt cuat piny ke dhiau ku lɛ̈ŋ ke gam awɛ̈ɛ̈cken në ɣön ë Nhialic thok, go amatnɔm dïït ë kɔc ke Yithriɛl guëër ë yelɔ̈ɔ̈m, röör ku diäär ku mïth, ke ke dhiau arëët në dhiën ë kɛc ë piɔ̈u.

² Go Cekania wën ë Jeɣel, raan ë dhiën Eelam lɛ̈k Edhera an, “Wok cï ciën adöt në Nhialicda, në kë cïï wok lööŋ dhoŋ kɔ̈ɔ̈th në thiëŋ cïï wok thiëëk në duet ke juöör tɔ̈u ee pinyë. Ku na cï rɔt cak looi aya tei, ke Yithriɛl aŋoot ke de nɔm aŋäth.

³ Wok bï löŋ mac piny në Nhialic nɔm, yïn wekë kɔc ee riɔ̈ɔ̈c në löŋ ë Nhialic, bäk lɛ̈k wook kueer bï wok ë diäärkë pɔ̈l në mïthken ku buk luui në kë cïï löŋ de Nhialic lueel.

⁴ Riɛl atɔ̈u në yïciin, lɔ tueŋ në luɔidu, wok bï tɔ̈u në yïcök.”

⁵ Go Edhera rɔt jɔt ku tɔ bänydït ke kake Nhialic ku kɔc ke Lebai ku kɔc ke Yithriɛl kedhie loi gutguut bïk kë cï Cekania lueel dhil looi. Gokï gutguut jɔ looi.

⁶ Na wën ke Edhera jël ë ɣön ë Nhialic thok ku le ɣön ë Jeɣoɣanan wën Eliacip, të cïï yen lɔ tɔ̈u ke cïï cäm ku cïï dëk, në biäk ŋoot en ke dhiau piɔ̈u në ciën adöt ë kɔc ë bɔ̈ ciëën ë pɛ̈cic.

⁷ Go awerek gäär Jeruthalem ku Juda ëbɛ̈n, an bï kɔc ë bɔ̈ ciëën ë pɛ̈cic kedhie kenïïm kut në Jeruthalem.

⁸ Cït man cïï bäny nu në kɔc nïïm ku röördït löŋ tääu piny an, raan cïï lɔ bɛ̈n në thök de nïn kadiäk, ke kake abï ke nööm, ku copë wei në akutnɔm de kɔc ë bɔ̈ ciëën në pɛ̈cic.

⁹ Ku ë nïnkë yiic kadiäk, kɔc ke Juda ku Benjamin ë ceŋ akɛɛth nïïm acïk bɛ̈n bɛ̈n kedhie ku kutkï kenïïm ë Jeruthalem ë pëër ë ɣön ë Nhialic yic, në kööl ye pɛɛi de dhoŋuan thok thiërrou, deŋ aa tueny, ku në biäk de yom ku kën ë cɔ̈lë keek, kɔc ë bɛ̈n aake lɛthë keek.

¹⁰ Go Edhera bɛ̈ny de kake Nhialic rɔt jat nhial ku jiëëm keek lueel an, “Wek cïn adöt, wek cï awɛ̈ɛ̈c ŋuak nyïïn në weyiëth në kë cï wek thiëëk në duet ke juöör.

¹¹ Ënɔɔnë, gamkï awɛ̈ɛ̈ckun në Bɛ̈nydït nɔm, Nhialic de kuarkun, ku yak këde piɔ̈nde looi, tɛkï weyiic në juöör ceŋ ee pinyë ku pälkï duet ke juöör ë cäk ke thiaak.”

¹² Go amatnɔm ëbɛ̈n bɛ̈ɛ̈r në röldït an, “Täude ka, abuk looi cït man cï yïn e lueel.”

¹³ Ku luelkï an däŋ aya, “Kɔc ajuëckï arëët, ku deŋ alɔ ke tueny aläl, wok cïï duëër tɔ̈u në pëër cït ee kënë yic, ku acie kë duëër guɔ thök ë kööl tök ku nɔn ee nïn kaarouwiic, kɔc juëc arëët në woyiic anukï në awänyë yic.

¹⁴ Takï bänykuɔn rɛ̈ɛ̈r ë Jeruthalem cɔl amatnɔm ëbɛ̈n, ku dɔmkï ee luɔiyë, ku takï raan ëbɛ̈n raan cï thiëëk ë nyan ë jur bɔ̈ në kööl cï lueel kekë röördït ke wunden ku bɛ̈ny ee löŋ guiir, bïk aa bɛ̈n në wuöt, ku ee kënë abïï agönhdïït ë Nhialic nyaai në woyiëth.”

¹⁵ Ku kɔc lik ë cï jaai ee yï Jɔnathan wën Athaɣel ku Jathaya wën Tikba mɛt Meculam thïn kekë Cabethai raan ë Lebai.

¹⁶ Go kɔc ë bɔ̈ ciëën ë pɛ̈cic ee löŋë gam ku loikï, ku jɔ Edhera bɛ̈ny de kake Nhialic kekë bäny nu ë dhiëën nïïm nyuc, ku gäärkï ke rin. Kööl tueŋ de pɛɛi de thiëër, yen aa gɔl kek lopdɛn ë kɔc cök, kɔc cï thiëëk në juöör.

¹⁷ Na ɣɔn ë pɛɛi ë tök ke ye thok tök, ke ke jɔ thök në guiëër ë löŋ de kɔc cï thiëëk në duet ke juöör.

Röör cï Duet ke Juöör Thiaak

¹⁸ Kakë ee rin ke kɔc cï duet ke juöör thiaak: Dhiën ë Jecua wën ë Jeɣodhadak, ku mïthëkɔcken yï Maathia, ku Eliedher ku Jarip ku Gadalia.

Bäny ke kake Nhialic, në dhiëënken:

¹⁹ Acïk kuëëŋ an bïk diäärken pɔ̈l, ku raan tök ë keek abï nyɔɔŋ amääl gam ke ye miɔ̈c de awäc.

²⁰ Dhiën ë Yimer ee yï: Ɣanani ku Dhebadia.

²¹ Dhiën ë Ɣarim ee yï Maathia ku Elija ku Cemaya ku Jeɣel ku Yudhia.

²² Dhiën ë Pacur ee yï Eliyonai ku Maathia ku Yicmiɛl ku Nethaniɛl ku Jodhabad ku Elatha

Lebai

²³ Kɔc ke Lebai kï: yï Jodhabad ku Cimei ku Kelaya (ku rinkɛn kɔ̈k acɔl Kelita) ku Pethaya ku Juda ku Eliedher

Kɔc ee ket

²⁴ Kɔc ee Nhialic pal ë diɛt: ee Eliacip. Ku kɔc ee kal tiit thok ee yï Calum ku Telem ku Yuri

Kɔc kɔ̈k

²⁵ Ku jɔ ya kɔc kɔ̈k ke Yithriɛl: ke dhiën ë Paroc, yï Ramia ku Yidhia ku Mijamin ku Eleyadhar ku Ɣacabia ku Malikija ku Benaya.

²⁶ Dhiën ë Eelam ee yï Matania ku Dhekaria ku Jeɣel ku Abdi ku Jeremoth ku Elija.

²⁷ Dhiën ë Dhatu ee yï Eliyonai ku Eliacip ku Matania ku Jeremoth ku Dhabad ku Adhidha.

²⁸ Dhiën ë Bebai ee yï Jeɣoɣanan ku Ɣanania ku Dhabai ku Athelai.

²⁹ Dhiën ë Bani, ee yï Meculam ku Maluc ku Adaya ku Yacup ku Ceyal ku Jeremoth.

³⁰ Dhiën ë Paɣath Mowap ee yï Adena ku Kelal ku Benaya ku Maathia ku Matania ku Bedhalel ku Binui ku Manatha.

^31-32 Dhiën ë Ɣarim ee yï Eliedher ku Yicija ku Malikija ku Cemaya ku Cimion ku Benjamin ku Maluc ku Cemaria.

³³ Dhiën ë Ɣacum ee yï Matenai ku Matata ku Dhabad ku Elipelet ku Jeremai ku Manatha, ku Cimei.

^34-37 Dhiën ë Bani ee yï Maadai ku Amiram, ku Yuel, ku Benaya, ku Bedeya ku Kelui, ku Bania, ku Meremoth, ku Eliacip, ku Matania, ku Matenai ku Jaathu.

^38-42 Dhiën ë Binui ee yï Cimei ku Celemia ku Nathan ku Adaya ku Makenadebai ku Cacai ku Carai ku Adharel ku Celemia ku Cemaria ku Calum ku Amaria, ku Jothep.

⁴³ Dhiën ë Nebo ee yï Jeyel ku Matithia ku Dhabad ku Dhebina ku Jadai ku Jowɛl ku Benaya.

⁴⁴ Kek ë kɔckë kedhie acïk duet ke juöör thiaak, ku kɔ̈k në keyiic acïk ke dhiëth mïth ku pälkï keek në mïthken.