Edhr 1 - JAM DE NHIALIC 2011

Thairuth Ayöök Kɔc ke Judai Bïk Lɔ Ciëën

¹ Na ɣɔn ë ruöön tueŋ cïï Thairuth Melik de Perthia aa Melik de Babilon, go Bɛ̈nydït Melik Thairuth gut piɔ̈u, në biäk bïï jam aa yic, jam wään cïï Bɛ̈nydït lueel në röl ë tiët Jeremia an bïk bɛ̈n ciëën. Ago Thairuth tɔ gɛ̈ɛ̈r këdäŋ piny, ku tɔ kë cï gɔ̈ɔ̈r ciɛɛlë ë wuötke yiic kedhie, ku kën ë gɛ̈ɛ̈r kï:

² “Thairuth Melik de Perthia acï lueel an, Bɛ̈nydït, Nhialic de paannhial, acï ya gäm ciɛɛŋ de wuöt ke piny nɔm ëbɛ̈n, ku acï yɛn gäm luɔi bän ɣönde tɔ yïk në Jeruthalem ë Juda.

³ Raan ëbɛ̈n në weyiic, raan ee rɔt tɔ ye raan ë kɔcke, Nhialicde abï tɔ̈u ke yen, ku aduëër lɔ Jeruthalem paan ë Juda, ku bïï ɣön de Bɛ̈nydït, Nhialic de Yithriɛl lɔ yïk, Nhialic ee Yen ye lɔ̈ŋ në Jeruthalem.

⁴ Ku raan cï döŋ ke pïïr ëbɛ̈n ë wuöt rëër kek thïn, ŋɛk abï kɔc jël ë yelɔ̈ɔ̈m aa kuɔny në atek, ku adhɛ̈p, ku ka kɔ̈k, ku läi ee käŋ ɣääc, ku miɔ̈c de dhuëëŋ, bï lɛɛr ɣön ë Nhialic në Jeruthalem.”

⁵ Na wën ke röördït ke dhiën nïïm ke Juda kekë Benjamin, ku bäny ke kake Nhialic, ku Lebai acïk röt coc, raan ëbɛ̈n raan cï Bɛ̈nydït gut piɔ̈u, bïï jäl ku le ɣön de Bɛ̈nydït yïk në Jeruthalem.

⁶ Go kɔc wën rɛ̈ɛ̈r ë keek ke kuɔny në aduuk ë loi atek, ku adhɛ̈p, ku ka kɔ̈k, ku läi ee käŋ ɣääc, ku lɔ miɔ̈c tuc ë ɣööcde, ayï miɔ̈c ëbɛ̈n ye gam në dhuëëŋ.

⁷ Ku Melik Thairuth acï aduuk ke Luaŋdït bɛ̈ɛ̈i bei kedhie ayadäŋ, ka wään cïï Nebukadnedhar keek jɔt ë Jeruthalem ku le ke tääu ɣön de yiëthke.

⁸ Thairuth, Melik de Perthia ë kakë tɔ bïï ë bei në Mitheredath, raan ee wëu muk, ku kuën keek raan cɔl Cethabadhar, bɛ̈ny de Juda.

^9-10 Ku kuënden kï: Thɛ̈k ë loi adhääp ayek thiërdiäk, Thɛ̈k ë loi atek ayek agum, Abïïny kɔ̈k ayek thiërrou ku dhoŋuan, Guöl ë loi adhääp ayek thiërdiäk, Kak ë loi ë däŋ ayek aguum kaarou 2,000, Guöl ë loi pïïu ke ateek ayek bot kaŋuan ku thiëër, Aduuk kɔ̈k ayek agum 1,000.

¹¹ Kuën ë aduuk ë loi në adhääp ku ateek kedhie ayek aguum kadhïc ku bot kaŋuan 5,400, go Cethabadhar keek tɔ leerë në yen ëtök, të wään bïï yen kɔc ciëën në pɛ̈cic në Babilonia puk kenïïm Jeruthalem.