Edhekiɛl 9 - JAM DE NHIALIC 2011

Jeruthalem acï Luöi Këtuc

¹ Na wën, guɔ röl de Bɛ̈nydït piŋ ke jam an, “Bäkkï tënë, wek kɔc lɔ pänydït luöi këtuc. Bɛ̈ɛ̈ikï tɔɔŋkun ë week ë tök.”

² Ënɔɔnë thiinë, go kɔc kadhetem bɛ̈n të lɔ rut në kal thoŋ biic de Luaŋdït, ŋɛk amuk tɔɔŋke. Ku raan tök ë keyiic aceŋ lupɔ de linɔn ku amuk këde gäär në yeciin. Gokï bɛ̈n kedhie ku kɛ̈ɛ̈ckï në yïïŋ de maläŋ kɔ̈u.

³ Go dhuëëŋ de Nhialic de Yithriɛl bɛ̈n nhial në wuök ke cerubiim yiic, të wën tɔ̈u en thïn, ku jɔ cath ke lɔ Luaŋdït thok. Go Bɛ̈nydït raan ceŋ lupɔ de linɔn cɔɔl an,

⁴ “Lɔ caathë pänydït ë Jeruthalem yic ëbɛ̈n, ku ye raan cï yök ke nuan, ku jiɛth piɔ̈u në biäk de karɛc ku kanhiany ye kɔc keek looi ë pänydïtic, ye jak nɔm në kït.”

⁵ Ku piɛŋ Nhialic ke lɛ̈k kɔc kɔ̈kë an, “Kuanykï cök të tëëk en ë pänydïtic, ku näkkï. Në cïn raan pälkï, ku cïn raan kuɔɔk wek piɔ̈ɔ̈th.

⁶ Näkkï röördït, ku dhuök, ku diäär kor, ku märken ke mïth, ku mïth. Ku duökï raan de nɔm kït jak. Galkï thar eenë tëɣeric.” Agokï gɔl në bäny ë kääc ëtɛ̈ɛ̈n Luaŋdït.

⁷ Go Bɛ̈nydït lɛ̈k keek an, “Takï Luaŋdït nhiany! Thiäŋkï kalde yic në gup ke kɔc cï thou. Lakkï ë luɔi yic! Gokï luɔi ë näŋ de kɔc gɔl në pänydïtic!”

⁸ Të wën le ë kɔc ke ke näk, yɛn aa tɔ̈u ëtɛ̈ɛ̈n yatök. Guɔ yanɔm guöt piny, ku cööt në röl dït an, “Bɛ̈nydït Awärjäŋ, cï gɔ̈th arëët we Jeruthalem ka Yïn kɔɔr bä raan cï döŋ ë Yithriɛl ëbɛ̈n nɔ̈k?”

⁹ Go ë Nhialic bɛ̈ɛ̈r an, “Baai de Yithriɛl ku Juda acïk awɛ̈ɛ̈c juëc looi. Ayek kɔc nɔ̈k piny ë piny yic ëbɛ̈n, ku acïk Jeruthalem thiɔ̈ɔ̈ŋ yic në luɔi rac. Ayek lueel an, Yɛn Bɛ̈nydït, Yɛn cï pinyden nyääŋ piny, ku nɔn cän keek ee tïŋ.

¹⁰ Ku Yɛn cïï piɔ̈u bï kok wo keek, abä keek luöi ka wään cïk keek kɔn luöi kɔc kɔ̈k.”

¹¹ Ëtɛ̈ɛ̈n ku jɔ raan ceŋ lupɔɔ ke linɔn rɔt puk ku jɔ lɔ lɛ̈k Bɛ̈nydït an, “Yɛn cï luɔi cï lɛ̈k ɛn looi.”