Edhekiɛl 7 - JAM DE NHIALIC 2011

Thök ë Yithriɛl acï Thiɔ̈k

¹ Go jam de Bɛ̈nydït bɛ̈n tëde yɛn an:

² “Mɛnh ë raan lueel yen kë luɛɛl kï Yɛn Bɛ̈nydït Awärjäŋ, alɛ̈k kɔc ke Yithriɛl: yen thiök de piny ëbɛ̈n kï!

³ “Yithriɛl, thök acï bɛ̈n. Yïn bï agönhdï yök në yïguöp, në biäk luöi Ɛn yïn këtuc në biäk de kë cï looi. Yïn bä gäm ariöp de karɛckuön cï looi.

⁴ Yïn cä bï kɔn pɔ̈l ku cä yïn nyuth kokdepiɔ̈u. Yïn bä luöi këtuc në biäk de karɛckuön cï looi, ago jɔ ŋic nɔn ee Yɛn Bɛ̈nydït.”

⁵ Kë lueel ë Bɛ̈nydït Awärjäŋ kï an, “Riäŋë abï bɛ̈n në riäŋë cök tëde yïn.

⁶ Abï nu ë ɣään yiic ëbɛ̈n. Thökde kï. Wek cï thök.

⁷ Thök abï tëde week wek kɔc ceŋ ee pinyë. Akööl abïkï, akööl bïï ciën dhuëëŋ be ë looi në yïk ke kur yiic, abï ya anuɔɔn yetök.

⁸ “Në akööl lik bï bɛ̈n tueŋë, yïn bï riɛl de agönhdï yök. Yïn luöi këtuc në biäk de kë cï looi, ku yïn bä cuöl ariöp de karɛckuön cï looi ëbɛ̈n.

⁹ Yïn cä bï kɔn pɔ̈l ku cä yïn nyuth kokdepiɔ̈u. Yïn bä luöi këtuc në biäk de karɛckuön cï looi, ago jɔ ŋic nɔn ee Yɛn Bɛ̈nydït, ku ee Yɛn ee raan ee kɔc luöi këtuc.”

¹⁰ Akööl ke riääk abïkï tëde Yithriɛl. Akuöörkuöör alɔ ke dït. Lɛc acï lɔ nhial.

¹¹ Akuöörkuöör luɔi de karɛc bɛ̈ɛ̈i. Acïn këdɛn bï döŋ, acïn kajuëckɛn bï nu, ayï kakɛn ke dhuëëŋ, ku diɛk abïk liu.

¹² Akööl acïk bɛ̈n. Akööl acïk thiɔ̈k, akööl bïï ɣɛɛc ku ɣööc de käŋ ciën naamden, në biäk bïï agönh ë Nhialic lööny ë kɔc yiëth kedhie athöŋ.

¹³ Acïn raan ee ɣɛɛc bï pïïr abïï dhiɔp abïï kakɛn cï määr yök, në biäk tɔ̈u agönh de Bɛ̈nydït ë kɔc yeth ëbɛ̈n. Kɔc ee karɛc looi acïkï duëër pïïr.

¹⁴ Kaaŋ acï kooth ka raan ëbɛ̈n ë rɔt guiir. Ku acïn raan lɔ tɔŋ, në luɔi bïï agönh de Bɛ̈nydït lööny në kɔc yiëth kedhie athöŋ.

Yithriɛl Aluiyë Këtuc në biäk de Awɛ̈ɛ̈cke

¹⁵ Ade tɔŋ në kuɛɛr yiic, ku juäi ku cɔk në ɣööt yiic. Raan ee lɔ biic ëbɛ̈n abï thou në tɔŋic, ku raan tɔ̈u në pänydït yic ëbɛ̈n, abï thou në juäi ku cɔk.

¹⁶ Kɔc abïk röt kual ë kur nïïm cït guk cï riɔ̈ɔ̈c ë wakic. Keek kedhie abïk dhiau në biäk de awɛ̈ɛ̈cken.

¹⁷ Raan ëbɛ̈n abïï ë cinke nuëŋ ku lɛthë ke miɔl.

¹⁸ Keek abïk lupɔɔ ke cuɔl tääu në kekɔ̈ɔ̈th ku abï ke lath ëbɛ̈n. Abïï ke muut nïïm, ku abïk gup yäär kedhie.

¹⁹ Abïk Adhɛ̈pken ku atekken cuat wei në kuɛɛr yiic, cï ka rɛɛc, në biäk cïï atekken ku adhɛ̈pken, keek bï kony të le Bɛ̈nydït agönh de wäl piny. Acïn kë bïk looi në yen bïï ke kueth në ka kɔɔrkï, ku nɔn thiëëŋ kek keyiic. Adhääp ku ateek acï keek lɛɛr awɛ̈ɛ̈c yiic.

²⁰ Wään aake ye röt kɔn lɛɛc në guëtken, ku acïk ke bɛ̈n looi kek yiëth racken bɛ̈n looi. Yeka cïï Bɛ̈nydït kajuëcken tɔ riääk.

²¹ Acïï ë Bɛ̈nydït lueel an, “Abä keek tɔ rum alɛi, ku nöm kɔc rac kuɛthden ku riäkkï keek.”

²² Yɛn cïï bï lɔ në kaken yiic, të cï kek ɣöndiën ë Bɛ̈nydït riɔ̈ɔ̈k, ku të cï cuɛ̈ɛ̈r lɔ thïn ku riäkkï keek.

²³ “Këriëëc ëbɛ̈n acï anuɔɔn, piny acï thiäŋ ke kɔc ee kɔc nɔ̈k, ku pɛ̈ɛ̈nydït acïk yiic thiäŋ në akuöörkuöör.

²⁴ Yɛn bï juöör rac arëët bɛ̈ɛ̈i ëtënë ku ta ke nöm ɣöötkun. Kɔckuön ril abïk ciën aŋäth të lan ɣäänkuön ɣeriic bɛ̈n riɔ̈ɔ̈k.

²⁵ Mum ë nɔm abɔ̈. Wek bï mät kɔɔr ku acäkï bï yök.

²⁶ Riäŋë abï bɛ̈n ë riäŋë cök, ku thook luel karɛc abïk aa bɛ̈n. Wek bï nyuuth kɔɔr tëde tiët bï we lɛ̈k ka cï tïŋ. Bäny ke kake Nhialic abïk nïïm ciën kë bï kek kɔc wɛ̈ɛ̈t, ku röördït abïk nïïm ciën ka jiëëm kek kɔc.

²⁷ Melik abï dhiau, ku wën melik abï nɔm ciën aŋäth, ku kɔc abïï ke lath në riɔ̈ɔ̈c. Wek bä luöi këtuc në biäk de ka cäk keek looi kedhie, ku guiɛɛr löŋdun në kueer wään ya wek lööŋ ke kɔc kɔ̈k guiir. Kënë abï we nyuöth nɔn ee Yɛn Bɛ̈nydït.”