Edhekiɛl 5 - JAM DE NHIALIC 2011

Edhekiɛl Atem Nhïmke

¹ Go Bɛ̈nydït lueel an, “Mɛnh ë raan nöm abätäu moth ku loi ke ye rën muut yïn yïthok ku nhïm kedhie, ëtɛ̈ɛ̈n ja ë nhïmkuönkë them në këde thëm ku tek ke yiic në diäk.

² Nyop këde diäŋden në pänydït, miäk cïï geeu cï ë pänydït gɛɛu cil wan, nöm diäŋ kɔ̈kë ku tɛ̈m ë keek në abätäu të le yïn ke yï cath në wut këc, wɛɛrë diäŋ kɔ̈k cï döŋë në yomic ku jɔ ke ya kaaŋiic në abätäudï.

³ Both ka lik ku jɔ ke duööt në lupɔdu thok.

⁴ Na ëlë ke yï be kalik kɔ̈k bɛ̈ɛ̈i bei, cuat ë ke mɛɛc, ku tɔ ke dɛ̈p ëbɛ̈n. Në dëpden yic mac abï guɔ thiäi baai de Yithriɛl ëbɛ̈n.”

⁵ Acïï Bɛ̈nydït Awärjäŋ lueel an, “Tiëŋkï Jeruthalem. Acä tääu ë juöör yiic cil, ku jɔ piiny kɔ̈k tɔ̈u ë yelɔ̈ɔ̈m ëbɛ̈n.

⁶ Ku kɔc ke Jeruthalem acïk lööŋkï rɛɛc ku nyooth luɔi rɛɛc kek awär juöör kɔ̈k, ayek a rɛɛc awär juöör thiääk në yen. Jeruthalem acï yöökdï rɛɛc ku jiëi lööŋkï.

⁷ Ënɔɔnë Jeruthalem piŋ kë luɛɛl, Yɛn Bɛ̈ny cït Awärjäŋ. Në biäk kën wek lööŋkï gam ku cäkkï yöökdï muk, wek cï nuɛɛn juëc looi awär juöör thiääk në week. Wek cï ciɛɛŋ de juöör kɔ̈k kuany yiic.

⁸ Ka wek yɔ̈ɔ̈k keek Yɛn Bɛ̈nydït Awärjäŋ nɔn aa wek kɔc ke aterdï. Yɛn bï luŋdun teem të bïï ë juöör week woi kedhie.

⁹ Në biäk ya wek kamaan keek kedhie looi, Yɛn bï Jeruthalem luöi këtuc, cït kë kɛ̈n kɔn looi ɣɔn thɛɛr, ku acä bï bɛ nyɔk.

¹⁰ Kë bï tïc, wärken ke mïth ku märken ke mïth abïk mïthken cuet, ku mïth abïk wärken ku märken cuet në Jeruthalem. Wek bä luöi këtuc ku thiäi kɔc bï pïïr në piny nɔm ëbɛ̈n.

¹¹ “Ka ënɔɔnë, ke ya ye Nhialic pïïr, kënë ee jam de Bɛ̈nydït Awärjäŋ në biäk cä wek tëdiën ɣeric dhiöök në kërac yak looi ëbɛ̈n, kanhiany cäk looi, we bä ke nɔ̈k ke cïn kokëpiɔ̈u.

¹² Biäk töŋ de diäk ë kɔckun abï thou në jɔk ku cɔk ë pänydïtic, ku thou biäk däŋ de diäk në abätäu biic në pänydït thok, ku biäk töŋ de diäk ciëën abä thiäi piny në ɣään ke yom kedhie, ku cuɔp keek në abätäu.

¹³ “Yïn bï riɛl de agönhdï yök në yïguöp ku ja gɔ̈th agut të bän piɔ̈u thök. Të le ee kënë rɔt looi ëbɛ̈n, abä jɔ gam nɔn cän jam wo yïn, Yɛn Bɛ̈nydït në biäk cïï ciɛ̈n adötdu yɛn tɔ göth.

¹⁴ Kɔc ke juöör thiääk ë week ëbɛ̈n, kɔc ee tëëk ëtɛ̈ɛ̈n, abïk yïn aa dɔl guöp, ku mëëckï röt në week.

¹⁵ “Të cän gɔ̈th ku cä piɔ̈u diu arëët wo week, juöör thiääk ë week ëbɛ̈n ayek riɔ̈ɔ̈c. Abïk week aa woi në dhääl, ku dɔlkï wegup.

¹⁶ Yɛn bï kueer ye kacaamkun bɛ̈n thïn thiöök thok, ku ta we nɛ̈k cɔk. Wek bï arɛɛm de cɔk yök abäk ciët ka cï tuöc wiɛth ke dhaŋ lɔ we riɔ̈ɔ̈k.

¹⁷ Yɛn bï cɔk ku läi roor tuɔɔc lek mïthkun nɔ̈k, ku tuɔɔc juäi, ku akuöörkuöör, ku tɔɔŋ bïk we lɔ nɔ̈k. Acä lueel, Yɛn Bɛ̈nydït.”