Edhekiɛl 48 - JAM DE NHIALIC 2011

Tëŋ de Piny ë Kɛm ke Dhiën

^1-7 Aken de piny ë biäk të lɔ rut, leer të lɔ aköl amiäk në Wɛ̈ɛ̈r Ɣer, lee pänydït de Ɣadharenon, ku lee Ɣamath thok, leer në aken tɔ̈u ë kaam de Ciɛɛŋ de Damathko kekë Ɣamath. Dhiën tök ë dhiëën yiic abï biäk töŋ de piny aa nööm, aye jɔt në aken nu ë biäk të lɔ aköl amiäk në biäk de aköl athɛ̈i de Wɛ̈ɛ̈rdïït ɣer, acï guiir në ee kueerë, gɔl në rut leer wöuwic: Dan Acer Naptali Manatha Eparaim Ruben Juda.

Të piɛth cï Lɔc në Piny Yic Cil

⁸ Biäk däŋ de piny abï tɔ̈ɔ̈u pei ke ye këde luɔɔi däŋ. Abï bɛ̈ɛ̈r de yen kɔ̈u gɔl ë rut leer wöuwic aa meel kathiëër, ku abï bɛ̈ɛ̈r aya gɔl aköl amiäk leer aköl athɛ̈i, cït man de biäk cï gäm dhiën. Tëɣeric abï tääu ee biäkë yic.

⁹ Në ee biäkë yic cil, ade të cï lɔc pei, aye bɛ̈ɛ̈rde meel kathiëër, ku ye dït de yen yic meel kabɛ̈t, ee kë bï gäm Bɛ̈nydït.

¹⁰ Bäny ke kake Nhialic abï ke gäm biäk de të cï gäm Nhialic. Gɔl aköl amiäk leer aköl athɛ̈i biäkden abï aa meel kathiëër, ku gɔl rut leer wöuwic abï aa meel kaŋuan. Ku tëɣeric abï tɔ̈u ë pëër yic cil.

¹¹ Yen ee të cï thieeiyë abï ya tëde bäny ke kake Nhialic ke kuat de Dhadok. Acïk ya luööi në piɔ̈n adöt, ku akënkï röt mat ë kɔc ke Yithriɛl kɔ̈kë yiic në luɔi de kërac, cït man cï kɔc kɔ̈k ke Lebai ye looi.

¹² Ka keek abï ke gäm të piɛth të thiäk ke të cï gäm kɔc ke Lebai të thiääk ke kɔc ke Lebai, ku abï ya tëɣeric aläl awär ɣään kedhie.

¹³ Kɔc ke Lebai aya abïk ke gäm tëdɛn piɛth, në lɔ wöuwic në tëde bäny ke kake Nhialic. Yen aya abï aa meel kathiëër (10), gɔl aköl amiäk leer aköl athɛ̈i, ku meel kaŋuan gɔl ë rut leer wöuwic.

¹⁴ Të cï gäm Bɛ̈nydït yen ee të piɛth ë piny yic ëbɛ̈n, ku acïn të thiin duëërë ɣaac ku nɔn waar ë däŋ. Kënë ee tëɣeric, ku ee këde Bɛ̈nydït

¹⁵ Ɣään piɛth cï döŋë, ye bɛ̈ɛ̈rde meel kathiëër (10), ku ye dït yen yic meel kaarou (2), acïï lɔgɔk, ee këde luɔi de kɔc tei. Kɔc aduëërkï ceŋ ë tɛ̈ɛ̈n ku yek piny puur. Ku pänydït abï tɔ̈u në ye yic cil,

¹⁶ Ku abï dɛk aguuk kaŋuan, biäk lɔ rut, ku biäk lɔ wöuwic, ku biäk lɔ aköl amiäk, ku biäk lɔ aköl athɛ̈i, aake ye thëm de biäk tök akeem ka 2,520, në aguuk kedhie.

¹⁷ Biäk tök ëbɛ̈n në pänydït këc abï dɛk të lääu ye thëmde bɔt ku thiërdhïc de akeem ë baŋ të lɔ rut, ku baŋ lɔ wöuwic, ku baŋ lɔ aköl amiäk, ku baŋ lɔ aköl athɛ̈i, keek kedhie.

¹⁸ Të cï däŋ döŋ në pänydït thok të wään cïï ë yen yïk, të lɔ wöuwic de tëɣeric, aye bɛ̈ɛ̈rde meel kaŋuan, ku ye dït de yen yic meel kaarou 2, ku ye meel kaŋuan në biäk të lɔ aköl amiäk, ku meel kaarou në biäk lɔ të lɔ aköl athɛ̈i, abï thiääk ke tëɣeric, ku abï ya tëde pɔ̈ɔ̈r de kɔc ceŋ pänydït.

¹⁹ Raan ëbɛ̈n, raan rɛ̈ɛ̈r në pänydïtic, në dhiëën ke Yithriɛl yiic ëbɛ̈n, ade nɔm yic bïï pur ë piny yic ëtɛ̈ɛ̈n.

²⁰ Ku ëtɛ̈ɛ̈n piny ëbɛ̈n tɔ̈u në ciɛɛlic, të wën cï lɔc pei, abï dɛk aguuk kaŋuan ye thëmde meel kathiëër në biäk kedhie, ku abï biäk ɣeric de piny tɔ̈u ë pänydït thïn mat thïn.

^21-22 Në baŋ de aköl amiäk ku aköl athɛ̈i de piny tɔ̈u tëɣeric thïn, ku piny de bäny ke kake Nhialic, ku piny de kɔc ke Lebai, ku piny de pänydït, piny cï döŋ ee këde wën melik mac baai. Ee ɣeet aken nu në aköl amiäk ku biäk të la aköl athɛ̈i de Wɛ̈ɛ̈rdïït ɣer, ku ade akeu kekë Juda në biäk de rut, ku të lɔ wöuwic ade akeu kekë Benjamin.

Piiny ke Dhiën Kɔ̈k

^23-27 Në baŋ de wöuwic de biäk piɛthë, dhiën tök në dhiëën kɔ̈k cï döŋ, abï aa gäm biäkdɛn de piny, jɔt në aken de biäk të lɔ aköl amiäk, ku biäk de aköl athɛ̈i de Wɛ̈ɛ̈rdïït ɣer, acï guiir në ee kueerë, gɔl rut leer wöuwic: Benjamin Thimion Yithakar Dhebulun Gad

²⁸ Në biäk de wöuwic de biäk cï gäm dhiën de Gad, akeu ee tëëk të lɔ wöuwic në Tamar leer në awuul ke Kadec nïïm, ku jɔt ë biäk të lɔ rut de aköl athɛ̈i ke kuany aken de Rip nɔm leer ë Wɛ̈ɛ̈rdïït ɣer kɔ̈u.

²⁹ Acïï Bɛ̈nydït Awärjäŋ lueel an, “Yen kueer bïï ë piny tek ka, abï tɛ̈k dhiëën ke Yithriɛl ke ye pinyden.”

Thook ke Jeruthalem

^30-34 Ade thook kathiëër ku rou ee lɔ pänydït de Jeruthalem. Päny tök në ee pɛ̈ɛ̈nykë kaŋuan, aye thëmde akeem ka 2,520 ku ade yic thook kadiäk, tök aye cäk në rin ke dhiën tök ë dhiëën ke Yithriɛl yiic. Thook nu të lɔ rut, acï ke cäk në rin ke Ruben, Juda ku Lebai, ku thook tɔ̈u në biäk de aköl amiäk acï ke cäk në rin ke Jothep, ku Benjamin ku Dan, ku thook tɔ̈u të lɔ wöuwic, acï ke cäk në rin ke Thimion, ku Yithakar, ku Dhebulun, ku thook tɔ̈u të lɔ aköl athɛ̈i, acï ke cäk në rin ke Gad ku Acer ku Naptali.

³⁵ Bɛ̈ɛ̈r de päny ëbɛ̈n në biäk ke pänydït kedhie kaŋuan, ee agum kathiëër ku thiërbɛ̈t (10,080) de akeem. Ku rin ke pänydït gɔl ënɔɔnë leer wadäŋ abï aa, “Bɛ̈nydït anu ee tënë!”