Edhekiɛl 46 - JAM DE NHIALIC 2011

Wɛ̈ɛ̈t Bäny ku Dhuëëŋ

¹ Acïï Bɛ̈nydït Awärjäŋ lueel an, “Kueer nu në biäk lɔ aköl amiäk abï tɔ̈u ke guöör thok në akööl ke luɔi yiic kadhetem, ku abï aa liep në kööl ë Thabath, ku në kööl ë dhuëëŋ de Wil ë Pɛɛi.

² Wën bɛ̈ny mac baai abï lɔ thïn në biäk biic de kal, leer ɣöt ku kɛɛc në nïn de ɣöt thok. Ku bɛ̈ny de kake Nhialic abïk miɔ̈c ye nyop ë bɛ̈n, ku miɔ̈c de mät gam ëtɛ̈ɛ̈n në biäkde, ku lam tëde käm ë kal thok. Ku ëtɛ̈ɛ̈n abï rɔt pɔ̈k ciëën le biic, ku kal acïï bï guur thok agut cï thëën.

³ Në akööl ke Thabath yiic ku akööl Wil ë Pɛɛi kɔc kedhie abïk kemiɔl aa tuk ke ke läm Bɛ̈nydït në kal thok tueŋ.

⁴ Në kööl ë Thabath wën bɛ̈ny abï nyök amɛ̈l kor kadhetem, ku nyɔɔŋ amäl tök cïn gup tëdak yiɛ̈n Bɛ̈nydït ke ye miɔ̈c nyop ëbɛ̈n.

⁵ Abï löth de miɔ̈c ë rap aa bɛ̈ɛ̈i kekë nyɔɔŋ tök, ku abï këdɛn lëu bï gam aa bɛ̈ɛ̈i kekë nyɔɔŋ kor. Ku lönh töŋ de miɔ̈c ë rap abï litiir ke miök kadiäk aa bɛ̈ɛ̈i ke yen.

⁶ Në kööl de dhuëëŋ de Wil ë Pɛɛi, abï miɔɔr atiëëk gam ke ye miɔ̈c, ku nyök ke amɛ̈l kor kadhetem, ku nyɔɔŋ amäl tök, abïk gup ciɛ̈n tëdak kedhie.

⁷ Miɔɔr tök ku nyɔɔŋ tök abïk aa dɛk lönh töŋ de rap, ku nyɔɔŋ amäl koor tök, miɔ̈c ë rap abï aa kɔɔr ë wën bɛ̈ny bï gam ë yepiɔ̈u. Litiir kadiäk de miök de olip, abï keek aa gam në biäk töŋ de lönh ë rap.

⁸ Wën bɛ̈ny abï dhil aa lɔ ɣöt në kueer de kal biic ku bïï bei në kueer ë le yen thïn.

⁹ “Të bïï kɔc ke piny tëde de Bɛ̈nydït në akööl ke dhuëŋ cï mac, kɔc wën ee lɔ thïn në thoŋ të lɔ rut lek lam abïk aa bɛ̈n bei në thoŋ nu të lɔ wöuwic, ku kɔc ee lɔ thïn në thoŋ nu të lɔ wöuwic, abïk aa bɛ̈n bei në thoŋ nu të lɔ rut. Acïn raan bï aa lɔ biic në thoŋ wën ë bïï yen thïn, raan ëbɛ̈n abï dhil aa lɔ biic ke cök yenɔm.

¹⁰ Të le kek thïn wën bɛ̈ny abï dhil lɔ thïn keek, ku të le kek biic abï lɔ biic.

¹¹ Në akööl ke dhuëŋ, ku në akööl cï mac, miɔ̈c de miɔɔr atiëëk tök abï cath miɔ̈c ë rap në aduŋ tök, ku miɔ̈c de nyɔɔŋ amäl abï cath ke ke lëu ë raan bïï gam, kekë aguun de miök ku aduŋ de rap.

¹² Të bïï ë wën bɛ̈ny miɔ̈c de miɛtëpiɔ̈u, na ee miɔ̈c ye nyop ëbɛ̈n, ku nɔn ee miɔ̈c de mät, ke ye miɔ̈c de miɛtëpiɔ̈u gëm Bɛ̈nydït, kal thoŋ të lɔ aköl amiäk abïï liëp en, ku abï miɔ̈cdɛn ye nyop ëbɛ̈n gam, ku nɔn ee miɔ̈cdɛn de miɛtëpiɔ̈u, cït man yen ye looi në kööl ë Thabath, ku kal abï thiɔ̈ɔ̈k thok të cï yen rɔt puɔ̈k biic.”

Miɔ̈c de Akööl nyïïn

¹³ Aye Bɛ̈nydït lueel an, “Miäk rial aköölnyïïn ëbɛ̈n nyɔɔŋ amääl cïn guöp tëdak abïï dhil aa nɔ̈k, ke ye miɔ̈c ye nyop ëbɛ̈n këde Bɛ̈nydït. Miɔ̈cë abïï aa looi aköölnyïïn.

¹⁴ Ayadäŋ miɔ̈c ë rap ye thëmde kilɔɔ kadhïc abï aa looi miäk rial aköölnyïïn, kekë aguun töŋ de miök de olip ye liääp kekë aɣaar. Lööŋ ke miɔ̈cë bïï aa gäm Bɛ̈nydït abïk dhil aa tɔ̈u tëden aɣet athɛɛr.

¹⁵ Nyɔɔŋ thiin amääl, ku aɣaar, ku miök de olip, abïï ke dhil aa gäm Bɛ̈nydït miäk rial në aköölnyïïn aɣet athɛɛr.”

Wën Melik ku Piny

¹⁶ Bɛ̈nydït Awärjäŋ acï löŋ tääu piny. “Na cï wën bɛ̈ny mac baai biäk de pinyde gäm mɛnh tök në mïthke yiic, ke ye miɔ̈c, abï aa këde ee mɛnhë ke ye biäk töŋ de kake baaide.

¹⁷ Ku na cï wën bɛ̈ny mac baai biäk de pinyde gäm raan däŋ në kɔc ee lui në yen, abï bï bɛ aa këde wën bɛ̈ny në ruöön ye käŋ puk nïïm, abï rɔt bɛ pɔ̈k wën bɛ̈ny, ee wɛ̈ɛ̈tke kapäc kek de nïïm yic bïk piny cï gäm keek ë wun nööm.

¹⁸ Wën bɛ̈ny mac baai acïï kake kɔc bï aa nööm. Piny bï gäm wɛ̈ɛ̈tke abï dhil aa piny ë cï gäm yen, ke cïï kɔckï bï yɔŋ, në nɔ̈m yen piinyken nööm.”

Ɣööt ke Thät Luaŋdït

¹⁹ Go raan a jɔt leer ɛn ɣöt thoŋ të lɔ biäk de kal të lɔ rut, në abeer ke ɣööt ɣeriic ke bäny ke kake Nhialic, ku ëtɛ̈ɛ̈n guɔ tëdäŋ tïŋ ke mec në biäk të lɔ aköl athɛ̈i.

²⁰ Go lueel an, “Tënë ee të bïï bäny ke kake Nhialic rïïŋ aa thaal thïn, rïïŋ de miɔ̈c de kërac, ku miɔ̈c de awäc, ku bïk miɔ̈c ë rap aa thaal thïn, ago ciɛ̈n kë ɣeric bï lɛɛr ë kal yic biic, të duëër yen kɔc riɔ̈ɔ̈k.”

²¹ Go yɛn bɛ̈ɛ̈i në kal thok biic, ku ciɛɛth yɛn në aguuk ke kal kaŋuan, ku në aguuk yiic kedhie aa de kal lääuwic,

²² në aguuk ke kal kaŋuan ëbɛ̈n, aade kɛ̈l thik ye bɛ̈ɛ̈rden mitïïr kathiërŋuan, ku ye dït de kek yiic mitïïr kathiërdiäk, keek kaŋuan aake kït.

²³ Biäk tök në keyiic ade pänydɛn ë kuur cï ye gɛɛu piny, kekë ɣään ke thät cï yiëk në päny kɔ̈u.

²⁴ Go raan lɛ̈k yɛn an, “Kake ayek ɣööt ke thät, të ye awuut ee lui Luaŋdït miɔ̈c cï kɔc nɔ̈k thaal.”